នៅក្នុងត្រីមាសទី 3 ឆ្នាំ 2018 នេះ ការនាំចេញស្មាតហ្វូនពិភពលោកគឺមានការធ្លាក់ចុះដល់ទៅ 5% នេះបើតាមទិន្នន័យដែលប្រមូលដោយក្រុមហ៊ុន Counterpoint Research។ ប៉ុន្តែនៅក្នុងការទម្លាយតាមរបាយការណ៍ចុងក្រោយបំផុតនោះ ការនាំចេញទៅលើស្មាតហ្វូនថ្នាក់ប្រណិតគឺមានការកើនឡើងនៅក្នុងតួរលេខដែលគួរអោយកត់សម្គាល់ផងដែរ។
នៅក្នុងរយៈពេល 3 ខែគឺកក្កដា សីហា និងកញ្ញានោះ ការលក់ស្មាតហ្វូនដែលមានតម្លៃ $400 ឬខ្ពស់ជាងនេះ គឺមានចំនួន 22% នៃទីផ្សារពិភពលោក។ នេះបង្ហាញអំពីការកើនឡើង 19% បើធៀបជាមួយនឹងឆ្នាំមុននេះ។ សរុបមក ចំនួននៃស្មាតហ្វូន iPhone របស់ក្រុមហ៊ុនបច្ចេកវិទ្យា Apple គឺមានចំនួនស្ទើរតែពាក់កណ្តាលនៃការលក់សរុបនៅក្នុងត្រីមាសនេះ។ ក្រុមហ៊ុនបច្ចេកវិទ្យា Samsung ស្ថិតនៅក្នុងចំណាត់ថ្នាក់លេខ 2 ជាមួយនឹង 22% ស្របពេលដែលក្រុមហ៊ុន Huawei ឈរនៅចំណាត់ថ្នាក់លេខ 3 ជាមួយនឹង 12% ហើយនេះគឺជាលើកដំបូងបំផុតរបស់ក្រុមហ៊ុន Huawei ដែលមានតូរលេខ 2 ខ្ទង់បែបនេះ។
បើគិតទៅលើតម្លៃរបស់ស្មាតហ្វូននេះ ក្រុមហ៊ុន Samsung គ្រប់គ្រងទៅលើចំណែកទីផ្សារស្មាតហ្វូនដែលមានតម្លៃ $400-600 ជាមួយនឹងចំណែកទីផ្សារ 25%។ ក្រុមហ៊ុន Apple និង Huawei កំឈរនៅចំណាត់ថ្នាក់លេខ 2 និងលេខ 3 ជាមួយនឹងចំណែកទីផ្សារ 21% និង 17%។ ក្រុមហ៊ុន Vivo និង Oppo ឈរនៅចំណាត់ថ្នាក់ Top 5 នៅក្នុងប្រទេសចិន ស្របពេលក្រុមហ៊ុន Xiaomi ឈរនៅចំណាត់ថ្នាក់ទី 6 ជាមួយនឹងចំណែកទីផ្សារ 6% ។ សម្រាប់ស្មាតហ្វូនថ្នាក់ប្រណិតដែលមានតម្លៃ $600-$800 គឺគ្រប់គ្រងចំណែកទីផ្សារដោយក្រុមហ៊ុន Apple និងSamsung ដែលមានសរុបដល់ទៅ 82% ។ ទោះជាយ៉ាងណាក៏ដោយ ក្រុមហ៊ុន Apple គឺទាក់ទាញនូវប្រជាប្រិយភាពខ្លាំងជាងជាមួយនឹងតម្លៃចាប់ពី $800+។ ជាក់ស្តែង វត្តមានរបស់ស្មាតហ្វូន iPhone X ដែលបង្ហាញខ្លួនកាលពីឆ្នាំមុននេះ និងវត្តមានរបស់ស្មាតហ្វូន iPhone XS និង XS Max គឺមានចំនួនដល់ទៅ 79%នៃការលក់សរុបនៅក្នុងទីផ្សាររបស់ក្រុមហ៊ុន។
បើទោះបីជាមិនស្ថិតនៅក្នុង Top 5 នៃចំណែកទីផ្សារពិភពលោកក៏ដោយនោះ ក្រុមហ៊ុន Counterpoint Research ក៏ចាត់ទុកថាក្រុមហ៊ុន OnePlus គឺជាម៉ាកយីហោដែលមានកំណើនកើនឡើងលឿនបំផុតនៅក្នុងទីផ្សារដែលមានតម្លៃ $400-600 នេះ គឺដោយសារតែការពេញនិយមនៅក្នុងប្រទេសឥណ្ឌា ចិន និងចក្រភពអង់គ្លេស។ ក្រុមហ៊ុនបច្ចេកវិទ្យា Google ក៏បន្តនូវកំណើនរបស់ខ្លួននៅក្នុងទីផ្សារស្មាតហ្វូនសម្រាប់ត្រីមាសទី 3 នេះផងដែរ ហើយវាគឺជាស្មាតហ្វូនមួយនៅក្នុង Top 5 ដែលពេញនិយមនៅអ៊ឺរ៉ុប និងអាមេរិកខាងជើង៕
