ការបញ្ចេញនូវស្មាតហ្វូនស៊េរីថ្មីត្រកូល Galaxy S គឺប្រហែលជាឆាប់ៗនេះហើយ ជាពិសេសយើងបានលឺព័ត៌មានជាច្រើនអំពីស្មាតហ្វូនស៊េរីថ្មីនេះនៅលើអនឡាញផងដែរ។ នៅក្នុងឆ្នាំនេះ ក្រុមហ៊ុន Samsung បានត្រៀមបញ្ចេញនូវស្មាតហ្វូន Galaxy S10 ចំនួន 4 ម៉ូដែលដែលត្រូវគេដឹងថាត្រៀមខ្លួននឹងវាយលុកទីផ្សារនៅក្នុងរយៈពេលប៉ុន្មានខែខាងមុខនេះ។ ប៉ុន្តែព័ត៌មាននានានិយាយថា ក្រុមហ៊ុន Samsung ប្រហែលជាបញ្ចេញនូវស្មាតហ្វូនចំនួន 5 ម៉ូដែលនៅលើទីផ្សារ។ តាមការបញ្ជាក់របស់ SlashGear នោះ នឹងមានស្មាតហ្វូន Galaxy S10 ជំនាន់ថ្មីមួយបន្ថែមទៀត។
សម្រាប់ជំនាន់ថ្មីនេះគឺ Galaxy S10 5G ដែលនឹងដាក់លក់ផ្តាច់មុខនៅលើ Verizon ហើយមានលេខកូដឈ្មោះថា Bolt ។ លក្ខណៈពិសេសដែលយើងបានដឹងពីភាពខុសគ្នាសម្រាប់ស្មាតហ្វូនថ្មីនេះគឺ Galaxy S10 Bolt នឹងមានថាមពលថ្មធំជាងម៉ូដែល Galaxy S10 5G ធម្មតា។ ដំណឹងនេះយើងបានលឺកាលពីពេលមុននេះចេញពី Verizon ហើយក្រុមហ៊ុន Samsung ក៏មានការសហការយ៉ាងជិតស្និទ្ធិក្នុងការនាំយកនូវប្រព័ន្ធ 5G ទៅកាន់ទីផ្សាររបស់សហរដ្ឋអាមេរិកផងដែរ។ មកទល់នឹងពេលនេះ នៅមិនទាន់មានលក្ខណៈពិសេសអ្វីច្រើននោះទេដែលមានការពង្រឹងពីស្មាតហ្វូន Galaxy S10 5G នេះ ក្រៅពីការបន្ថែមនូវថាមពលថ្មធំជាងមុននោះទេ។
ស្មាតហ្វូននេះនឹងប្រើប្រាស់នូវបន្ទះឈីបចុងក្រោយបំផុត ហើយពាក្យចចាមអារ៉ាមនានា បាននិយាយថា ស្មាតហ្វូននេះ នឹងប្រើប្រាស់នូវប្រព័ន្ធកាមេរ៉ា 4 គ្រាប់នៅខាងក្រោយ កាមេរ៉ាខាងមុខពីរគ្រាប់ និងម៉េមូរីធំជាងមុនថែមទៀត។ សម្រាប់ម៉ូដឹម 5G modems ក៏ត្រូវការប្រើប្រាស់ថាមពលថ្មច្រើនជាងមុន។ សូមជំរាបថា នៅក្នុងឆ្នាំនេះ ក្រុមហ៊ុន Samsung នឹងបញ្ចេញនូវស្មាតហ្វូន Galaxy S10 និង Galaxy S10+ ហើយ។ ប៉ុន្តែអ្វីដែលពិសេសនោះ ក្រុមហ៊ុន ក៏នឹងបញ្ចេញនូវ Galaxy S10 Lite, Galaxy S10 5G និងម៉ូដែលជំនាន់ទី 5G សម្រាប់ដាក់លក់ផ្តាច់មុខនៅលើ Verizon ផងដែរ។ ស្មាតហ្វូន Galaxy S10 ចំនួន 3 ស៊េរីម៉ូដែលនឹងបង្ហាញខ្លួនជាផ្លូវការនៅថ្ងៃទី 20 ខែកុម្ភៈនេះ ស្របពេលដែលម៉ូដែល 5G អាចនឹងបង្ហាញខ្លួនជាផ្លូវការនៅក្នុងខែមីនា៕
