ស្របពេលដែលពេលវេលាបានខិតជិតចូលមកដល់ហើយនោះ ក្រុមហ៊ុនបច្ចេកវិទ្យាយក្ស Samsung ត្រូវបានគេដឹងថា ជិតនឹងបញ្ចេញនូវស្មាតហ្វនស៊េរីថ្មីរបស់ខ្លួនជាច្រើនម៉ូដែលផងដែរ ខណៈពេលដែលមនុស្សជាច្រើននៅលើពិភពលោក រំពឹងថានេះ គឺជាស្មាតហ្វូនត្រកូល Galaxy S-Series។ កន្លងមក មានព័ត៌មានបែកធ្លាយ និងពាក្យចចាមអារ៉ាមជាច្រើនអំពីស្មាតហ្វូនស៊េរីថ្មីទាំងនេះរបស់ក្រុមហ៊ុនបច្ចេកវិទ្យាយក្សកូរ៉េខាងត្បូងមួយនេះ ប៉ុន្តែពាក្យចចាមអារ៉ាមទាំងនេះ មិនបញ្ឈប់នៅត្រឹមនេះនោះទេ។ សម្រាប់ទំហំថាមពលថ្មផ្សេងគ្នានៅលើស្មាតហ្វូនស៊េរីថ្មី Galaxy S10+, S10, និង S10 E (Lite) នឹងមានទំហំ 4000mAh, 3500mAh និង 3100mAh ។
ស្មាតហ្វូនដែលមានអេក្រង់បត់បានរបស់ក្រុមហ៊ុននេះគឺ Galaxy Flex/Fold និងស្មាតហ្វូន 5G Galaxy S10 នឹងបង្ហាញខ្លួននៅក្នុងឆ្នាំ 2019 នេះផងដែរ ហើយវាពិតជាស្មាតហ្វូនដែលពិតជាគួរអោយចាប់អារម្មណ៍ខ្លាំងមែនទែន។ ពេលនេះ តាមការបញ្ជាក់របស់ GalaxyClub.nl ក៏បានបង្ហើបអំពីទំហំនៃថាមពលថ្មផ្សេងគ្នារបស់ស្មាតហ្វូនទាំងនេះផងដែរ។ សម្រាប់ស្មាតហ្វូន 5G Galaxy S10 ដែលមានឈ្មោះហៅថា Beyond X (SM-G977)នឹងមានថាមពលថ្មធំដល់ទៅ 5,000mAh។ ថាមពលថ្មធំនេះ គឺមានលក្ខណៈដូចគ្នាទៅនឹងស្មាតហ្វូន Galaxy M20 និងM30 ដែលជាស្មាតហ្វូនថ្នាក់កណ្តាលផងដែរ។
ទន្ទឹមគ្នានេះផងដែរ សម្រាប់ស្មាតហ្វូនដែលអាចបត់បានគឺ Galaxy Flex នឹងមានថាមពលថ្មទំហំ 3,100mAh ចំនួន 2 គ្រាប់ដូចនេះ ថាមពលថ្មសរុបគឺដល់ទៅ 6,200mAh ដែលមានកម្លាំងខ្លាំងក្នុងការប្រែក្លាយជាថេប្លេតដ៏អស្ចារ្យបំផុត។ ស្មាតហ្វូននេះ អាចកាន់ថាមពលថ្មបានដល់ទៅ 3 ថ្ងៃដែលមានន័យថាអ្នកបញ្ចូលថាមពលថ្មពីរដងគឺប្រើប្រាស់បានមួយអាទិត្យ។ យើងបានលឺព័ត៌មានជាច្រើនបញ្ជាក់ថា ស្មាតហ្វូនជាច្រើនរបស់ក្រុមហ៊ុនបច្ចេកវិទ្យាយក្ស Samsung អាចនឹងបង្ហាញខ្លួននៅក្នុងពេលណាមួយនៅចុងខែកុម្ភៈនេះ នៅក្នុងព្រឹត្តិការណ៍ Unpacked ដែលធ្លាប់រៀបចំធ្វើឡើងដូចឆ្នាំមុននេះផងដែរ។ យើងជឿជាក់ថា ស្មាតហ្វូនស៊េរីថ្មី Galaxies នេះ នឹងបង្ហាញវត្តមានពិតប្រាកដមែន ប៉ុន្តែសម្រាប់ស្មាតហ្វូដែលមានអេក្រង់បត់បាននោះអាចនឹងបង្ហាញខ្លួននៅក្នុងព្រឹត្តិការណ៍ផ្សេងមួយទៀតរបស់ Samsung នៅពេលក្រោយ៕
