ក្រុមហ៊ុនបច្ចេកវិទ្យាយក្ស Samsung Electronics នឹងរៀបចំនូវមហាព្រឹត្តិការណ៍នៃការសម្ពោធស្មាតហ្វូនស៊េរីថ្មីរបស់ខ្លួន Galaxy S10 Unpacked ដែលនឹងធ្វើឡើងនៅទីក្រុង San Francisco នៅពាក់កណ្តាលខែកុម្ភៈខាងមុខនេះ នេះបើតាមប្រភពបញ្ជាក់នៅថ្ងៃទី 9 ខែមករាកន្លងទៅនេះ។ ស្មាតហ្វូន Galaxy S ជំនាន់ទី 10 ជាច្រើនម៉ូដែល នឹងបង្ហាញខ្លួននៅក្នុងទីក្រុងដែលជាផ្ទះរបស់ក្រុមហ៊ុនបច្ចេកវិទ្យាយក្សធំៗ ដែលមានភាពច្នៃប្រឌិតបំផុតនៅលើពិភពលោក រយៈមួយសប្តាហ៍នៅមុនព្រឹត្តិការណ៍តាំងពិពរណ៍ Mobile World Congress 2019 ដែលនឹងធ្វើឡើងនៅក្នុងទីក្រុងបាសេឡូណាប្រទេសអេស្ប៉ាញនៅថ្ងៃទី 28 ខែកុម្ភៈនេះ នេះបើតាមប្រភពបញ្ជាក់អោយដឹងពីសារព័ត៌មាន The Korea Herald ។
ប្រភពខាងលើបញ្ជាក់ថា កន្លងមកមានព័ត៌មានជាច្រើននិយាយថា ក្រុមហ៊ុន Samsung ធ្លាប់បានប្រកាសថា នឹងបង្ហាញចេញនូវស្មាតហ្វូន Galaxy S10 Series នៅក្នុងព្រឹត្តិការណ៍ MWC 2019 នៅក្នុងទីក្រុងបាសេឡូណា ដូចអ្វីដែលខ្លួនធ្លាប់ធ្វើសម្រាប់ស្មាតហ្វូនត្រកូល Galaxy S9-Series អញ្ចឹងដែរ។ មូលហេតុដែល ក្រុមហ៊ុន Samsung ផ្លាស់ប្តូរទៅបង្ហាញស្មាតហ្វូននេះលឿនជាងនេះ ត្រូវបានគេនិយាយថា គឺដោយសារតែក្រុមហ៊ុន Huawei ក៏អាចនឹងបង្ហាញនូវស្មាតហ្វូន ដែលមានអេក្រង់បត់បានដំបូងបំផុតរបស់ខ្លួននៅក្នុងព្រឹត្តិការណ៍ MWC 2019 នេះផងដែរ។
ទន្ទឹមគ្នានេះសម្រាប់កាលបរិច្ឆេទនៃការប្រកាសចេញនូវស្មាតហ្វូនស៊េរីថ្មី ដែលមានអេក្រង់បត់បានរបស់ក្រុមហ៊ុន Samsung នេះនៅមិនទាន់បញ្ជាក់នៅឡើយទេ នេះបើតាមការបញ្ជាក់របស់បុគ្គលិកជាន់ខ្ពស់ពីក្រុមហ៊ុន Samsung។ បុគ្គលិករូបនេះ បាននិយាយថា “ដោយសារតែនេះ គឺជាស្មាតហ្វូនដំបូងបំផុតរបស់ក្រុមហ៊ុន Samsung នោះ យើងគិតអំពីការផ្តល់នូវមាតិកាដ៏អស្ចារ្យសម្រាប់បទពិសោធន៍នៃការប្រើប្រាស់កាន់តែអស្ចារ្យសម្រាប់ស្មាតហ្វូនដែលអាចបត់បាននេះ។ ” ស្មាតហ្វូនដែលអាចបត់បាននេះ ក៏មានការបង្ហាញនូវគំរូជាច្រើនសម្រាប់នាយកប្រតិបត្តិជាន់ខ្ពស់ជាច្រើននៅក្នុងព្រឹត្តិការណ៍ពិពរណ៍គ្រឿងអេឡិចត្រូនិច Consumer Electronics Show 2019 នៅក្នុងទីក្រុង Las Vegas ។
តាមការបញ្ជាក់របស់បុគ្គលិកពីក្រុមហ៊ុន Samsung នេះ ស្មាតហ្វូនដែលមានអេក្រង់បត់បាននេះ នឹងមានឈ្មោះបណ្តោះអាសន្នហៅថា “Galaxy F” ដែលនឹងមានតម្លៃ 2 លានវ៉ុន ($1,788)។ ស្មាតហ្វូន Galaxy F ចំនួន 1 លានគ្រឿង នឹងដាក់លក់នៅលលើទីផ្សារជាច្រើននៅក្នុងប្រទេសកូរ៉េខាងត្បូង និងសហរដ្ឋអាមេរិ ចិន និងអ៊ឺរ៉ុប៕
