ដើម្បីអោយរថយន្តដឹកទំនិញជាច្រើនរបស់ខ្លួនបំពាក់នូវបច្ចេកវិទ្យាស្វ័យប្រវត្តិ 4 autonomous technology នៅលើដងផ្លូវនៅទសវត្ស៍ក្រោយនោះ ក្រុមហ៊ុន Daimler បានធ្វើការវិនិយោគប្រាក់កាស និងចំណាយពេលវេលាអស់ជាច្រើន។ នៅថ្ងៃនេះ មានពព័ត៌មានថា រថយន្តដឹកទំនិញ Tesla Semi truck របស់ក្រុមហ៊ុន Daimler នឹងបង្ហាញខ្លួនជាមួយនឹងរថយន្តដឹកទំនិញ semi-truck ដែលអាចបើកបរដោយខ្លួនឯងនៅចុងឆ្នាំនេះហើយ។
គួរបញ្ជាក់ថា ការបង្ហាញ រថយន្តស៊រីថ្មី Freightliner Cascadia នៅក្នុងព្រឹត្តិការណ៍ CES 2019 កន្លងទៅនេះ បានក្លាយជារថយន្តដំបូងបំផុត នៃរថយន្តដឹកទំនិញសម្រាប់ទីផ្សារនៃអាមេរិកខាងជើង ដែលផ្តល់នូវកម្រិតស្វ័យប្រវត្តិកម្រិត 2 ដោយប្រព័ន្ធថ្មីនេះ នឹងអាចធ្វើការបើកបរដោយស្វ័យប្រវត្តិជាមួយនឹងការកំណត់នូវល្បឿននៅតាមកម្រិតផ្សេងៗគ្នាដោយប្រើប្រាស់នូវរ៉ាដា និងកាមេរ៉ាសម្រាប់ជួយទៅលើហ្វាំ្រង និងការបន្ថែមល្បឿននោះ។
រថយន្តដឹកទំនិញស៊េរីថ្មី Cascadia នេះ មានការរចនារូបរាងយ៉ាងប្រណិតស្រស់ស្អាតបំផុត ហើយក្រុមហ៊ុន Daimler បានអះអាងថា រថយន្តនេះ គឺមានការពង្រឹងទៅលើប្រសិទ្ធិភាពនៃការប្រើប្រាស់ប្រេងឥន្ធនៈល្អជាងមុនដល់ទៅ 35% បើធៀបជាមួយនឹងរថយន្ត Cascadia ដំបូងបំផុតដែលបង្ហាញខ្លួននៅក្នុងឆ្នាំ 2007 នោះ។ រថយន្តនេះ អាចធ្វើការសន្សំប្រេងឥន្ធនៈបានដល់ទៅ 4,700 gallons ក្នុងរថយន្តដឹកទំនិញមួយក្នុងមួយឆ្នាំនោះ ហើយនេះ គឺស្មើទៅនឹងបរិមាណនៃការប្រើប្រាស់រថយន្តគ្រួសារចំនួន 6 ក្នុងមួយឆ្នាំនោះ។ ការពង្រឹងទៅលើមុខងារ Aerodynamic នេះ គឺមានដូចជាប្រព័ន្ធ Aerodynamic Height Control ដែលធ្វើការគ្រប់គ្រងទៅលើសំហូរនៃខ្យល់។ ក្នុងនោះក៏មានការពង្រឹងទៅលើប្រព័ន្ធជាច្រើនទៀតដូជជា Michelin X Line D+ Energy ដែលធ្វើការអភិវឌ្ឍជាមួយនឹងក្រុមហ៊ុន Michelin ផងដែរ។
នៅពេលនេះ រថយន្តស៊េរីថ្មី Freightliner Cascadia នេះគឺមានកម្រិតស្វ័យប្រវត្តិត្រឹមតែ Level 2 ប៉ុណ្ណោះ ប៉ុន្តែក្រុមហ៊ុន Daimler បានធ្វើការវិនិយោគទឹកប្រាក់ប្រមាណជា $570 លានដុល្លារអាមេរិកបន្ថែមទៀត សម្រាប់បច្ចេកវិទ្យាបើកបរដោយខ្លួនឯង Level 4 self-driving technology ផងដែរ សម្រាប់ទសវត្ស៍ក្រោយនេះ។ ក្រុមហ៊ុន Daimler បាននិយាយថា បច្ចេកវិទ្យានេះ នឹងពង្រឹងទៅលើប្រព័ន្ធសុវត្ថិភាព ប្រសិទ្ធិភាព និងផលិតកម្ម។ ក្រុមហ៊ុននេះ ក៏បោះបង់ចោលនូវការអភិវឌ្ឍទៅលើប្រព័ន្ធ Level 3 systems ដោយសារតែវាមិនផ្តល់នូវអ្វីដែលជាតម្រូវការរបស់អតិថិជននោះទេ ទៅលើបច្ចេកវិទ្យាដែលមានស្រាប់នៅក្នុងពេលបច្ចុប្បន្ននេះ៕
