ថ្មីៗនេះ ក្រុមហ៊ុន Google ទើបតែទិញយកនូវបច្ចេកវិទ្យារបស់ស្មាតវ៉ចនៃក្រុមហ៊ុន Fossil Group នៅក្នុងតម្លៃ 40 លានដុល្លារអាមេរិក។ ក្រុមហ៊ុនបច្ចេកវិទ្យានេះ ទទួលកម្មសិទ្ធិបញ្ញាពីក្រុមហ៊ុន Fossil ពាក់ព័ន្ធទៅនឹងបច្ចេកវិទ្យាស្មាតវ៉ចនេះ ដែលបច្ចុប្បន្ននេះស្ថិតនៅក្រោមការអភិវឌ្ឍ។ នៅក្នុងកម្មសិទ្ធិបញ្ញានេះ ក្រុមការងារស្រាវជ្រាវ និងអភិវឌ្ឍរបស់ក្រុមហ៊ុន Fossil Group កំពុងតែធ្វើការនៅលើបច្ចេកវិទ្យាស្មាតហ្វូននេះ នឹងចូលរួមជាមួយនឹងក្រុមហ៊ុន Google ក្នុងការដំណើរការនៅលើផលិតផលថ្មីដែលនឹងបង្ហាញខ្លួនឆាប់ៗនេះនៅលើទីផ្សារ។
កិច្ចព្រមព្រៀងនេះ គឺជាជំហានមួយឆ្ពោះទៅមុខសម្រាប់ក្រុមហ៊ុន Google ក្នុងការបង្កើតនូវស្មាតវ៉ចផ្ទាល់ខ្លួន ដើម្បីធ្វើការប្រកួតប្រជែងជាមួយនឹងក្រុមហ៊ុន Apple និង Fitbit ដែលកំពុងតែដឹកនាំគេទៅលើបច្ចេកវិទ្យានាឡិកានោះ។ តាមការបញ្ជាក់របស់លោក Greg McKelvey ដែលជា EVP និងប្រធានផ្នែកយុទ្ធសាស្រ្ត និងបុគ្គលិកផ្នែកឌីជីថលរបស់ក្រុមហ៊ុន Fossil Group បាននិយាយថា កិច្ចព្រមព្រៀងនេះ ត្រូវគេមើលឃើញថា គឺជាប្រតិបត្តិការមួយជាជាងការទិញលក់។ “យើងបង្កើតនូវបច្ចេកវិទ្យាកម្រិតខ្ពស់ជាច្រើនដែលមានសមត្ថភាពក្នុងការពង្រឹងទៅលើ Platform ដែលមានស្រាប់របស់យើងនៅលើស្មាតវ៉ច។ នៅក្នុងការសហការជាមួយនឹងក្រុមហ៊ុន Google ភាពជាដៃគូទៅលើការច្នៃប្រឌិតនេះ យើងនឹងបន្តនូវការដោះសោរទៅរកភាពរីកចម្រើនកាន់តែខ្លាំងបន្ថែមទៀតនៅលើស្មាតវ៉ចនេះ។”
ក្រុមហ៊ុន Fossil Group ចូលទៅក្នុងទីផ្សារស្មាតវ៉ចនៅក្នុងឆ្នាំ 2015 ជាមួយនឹងការទិញយកក្រុមហ៊ុន Misfit នៅក្នុងតម្លៃ 260 លានដុល្លារអាមេរិក។ ក្រុមហ៊ុន Misfit គឺជាក្រុមហ៊ុនបច្ចេកវិទ្យាមួយដែល ធ្វើការផលិតស្មាតវ៉ច និងឧបករណ៍ថែរក្សាសុខភាពជាច្រើនទៀត ហើយស្ថាបនិកគឺអតីតអ្នកស្រាវជ្រាវ Sonny Vu, Sridhar Iyengar របស់ក្រុមហ៊ុន Microsoft និងអតីតនាយកប្រតិបត្តិលោក John Sculley របស់ក្រុមហ៊ុន Apple ។ យោងតាមទិន្នន័យចេញពីក្រុមហ៊ុនស្រាវជ្រាវ IDC បញ្ជាក់ថា ការនាំចេញឧបករណ៍ថែរក្សាសុខភាពនៅលើពិភពលោកនេះ គឺមានដល់ទៅ 125.3 លានគ្រឿងនៅក្នុងឆ្នាំ 2018 ដែលមានការកើនឡើង 8.5% នៅក្នុងឆ្នាំ 2017 ហើយទីផ្សាររបស់វានឹងមានការកើនឡើង 11% នៅក្នុងឆ្នាំ 2022 ៕