ស្របពេលដែលពេលវេលាកាន់តែកៀកមែនទែនសម្រាប់ព្រឹត្តិការណ៍នៃការប្រកាសចេញនូវស្មាតហ្វូនស៊េរីថ្មីត្រកូល Samsung Galaxy S10 នៅក្នុងខែកុម្ភៈខាងមុខនោះ គឺមានពាក្យចចាមអារ៉ាមកាន់តែច្រើនឡើងៗ ដែលនិយាយអំពីស្មាតហ្វូនស៊េរីថ្មីនេះពិសេសគឺវិញ្ញាបនប័ត្រ ដែលចេញពីប្រទេសផ្សេងៗគ្នាជាច្រើន។ តាមការបញ្ចាក់របស់ MySmartPrice អោយដឹងថា ក្រុមហ៊ុន Samsung ទើបតែទទួលវិញ្ញាបនបត្រសម្រាប់ស្មាតហ្វូន Galaxy S10 និង S10+ របស់ខ្លួនចេញពីទីភ្នាក់ងារ 3C របស់ចិនរួបរាល់ហើយ។ ប៉ុន្តែនៅមិនទាន់ដឹងអំពីព័ត៌មានទាំងស្រុងរបស់ស្មាតហ្វូននេះទេ។
ស្មាតហ្វូននេះ នឹងមានលេខកូដ SM-G9730 និង SM-G9750 ភ្ជាប់ជាមួយនឹង Charger ដែលមានកម្លាំង 9.0V/1.67A ឬ 5.0V/2.0A ដូចគ្នា ទៅនឹងកម្លាំង Chargers ដែលផ្គត់ផ្គង់នៅលើស្មាតហ្វូន Galaxy S9, S9+ និង Note 9 ផងដែរ។ ជាមួយនឹងការប្រើប្រាស់នូវបច្ចេកវិទ្យា Adaptive Fast Charging technology នោះ កម្រិតនៃ Chargers របស់ស្មាតហ្វូន Galaxy S9, S9+ និង Note 9 ត្រូវចំណាយពេលវេលានៃការបញ្ចូលថាមពលថ្មដល់ទៅ 1 ម៉ោង 40 នាទី។ ប្រសិនបើក្រុមហ៊ុន Samsung មិនបង្កើននូវល្បឿនទៅលើបច្ចេកវិទ្យា Fast Charging technology អោយលឿនជាងនេះទេនោះ វានឹងមានល្បឿននៃការបញ្ចូលថាមពលថ្មដូចគ្នា។
មានពាក្យចចាមអារ៉ាមជាច្រើនអំពីស្មាតហ្វូន Galaxy S10 ដែលនឹងប្រើប្រាស់ជាមួយថាមពលថ្ម 3,500mAh ស្របពេលដែលស្មាតហ្វូន Galaxy S10+ ត្រូវបានគេរំពឹងថា នឹងប្រើប្រាស់នូវថាមពលថ្ម 4000mAh។ អ្នកប្រហែលជាដឹងរួចមកហើយថា ក្រុមហ៊ុនបច្ចេកវិទ្យា Samsung ត្រូវគេរំពឹងថានឹងបញ្ចេញនូវស្មាតហ្វូន Galaxy S10 E ដែលមានថាមពលថ្មទំហំ 3100mAh និងស្មាតហ្វូន 5G Galaxy S10 ត្រូវគេរំពឹងថានឹងមានថាមពលថ្ម 5,000mAh ។ យើងនឹងដឹងព័ត៌មានជាច្រើនទៀតនៅក្នុងការប្រកាសបង្ហាញជាផ្លូវការនូវស្មាតហ្វូនស៊េរីថ្មីទាំងនេះនៅថ្ងៃទី 20 ខែកុម្ភៈខាងមុខនេះ៕
