ទូរស័ព្ទ Nokia 3.1 Plus ត្រូវបានក្រុមហ៊ុន HMD ធ្វើការប្រកាសចេញកាលពីកំឡុងខែតុលាឆ្នាំ 2018 ជាមួយការដំឡើងមកស្រាប់នូវប្រព័ន្ធប្រតិបត្តិការ Android 8.1 Oreo ចេញប្រអប់។ ហើយបើតាមគម្រោងរបស់ HMD នឹងបើកអោយធ្វើការអាប់ដែតឡើងមកកាន់ Android Pie ដែលជំនាន់ចុងក្រោយបង្អស់សម្រាប់ស្មាតហ្វូនរបស់ខ្លួនមួយនេះផងដែរ។ ប៉ុន្តែស្រាប់តែថ្មីៗនេះ លោក Nashville Chatter បានធ្វើការបង្ហាញចេញនូវ Nokia 3.1 Plus ដែលដំឡើងនូវប្រព័ន្ធប្រតិបត្តិការ Android 9 Pie នៅលើបណ្តាញ GeekBench ដូច្នេះ គេអាចប៉ាន់ស្មានបានថាការធ្វើបច្ចុប្បន្នភាពឡើងទៅកាន់ប្រតិបត្តិការ Android ចុងក្រោយសម្រាប់ Nokia 3.1 Plus នឹងត្រូវបានធ្វើឡើងក្នុងពេលឆាប់ៗនេះ។
នៅលើកម្មវីធីតេស្ត៍ GeekBench បានបង្ហាញថា “HMD Global Nokia 3.1 Plus” ពិតជាបានធ្វើការតេស្តសាកល្បងជាមួយប្រតិបត្តិការ Android 9 ពិតប្រាកដមែន។ សូមជម្រាបថា Nokia 3.1 Plus គឺជាស្មាតហ្វូនថ្នាក់ទាបដែលមានការរចនារូបរាងបែបប្រណិតដែលបានដំឡើងមកជាមួយនូវបន្ទះឈីប MediaTek Helio P22 ជាមួយជម្រើសទំហំរ៉េមពីរផ្សេងគ្នាគឺ 2GB និង 3GB។ ស្មាតហ្វូននេះ បំពាក់អេក្រង់ទំហំ 6.0 អ៊ីងកម្រិតបង្ហាញ HD+, មានថ្មកំលាំង 3,500mAh, មានទំហំម៉េមូរីផ្ទុកក្នុងម៉ាស៊ីនទំហំ 16GB និង 32GB ហើយក៏អាចដាក់បន្ថែមទំហំម៉េមូរីក្រៅបានផងដែរ។ ចំពោះកាមេរ៉ាវិញ Nokia 3.1 Plus បំពាក់នូវប្រព័ន្ធកាមេរ៉ាពីរគ្រាប់ទំហំ 13MP+5.0MP នៅលើកកាមេរ៉ាក្រោយ និងកាមេរ៉ាសែលហ្វីខាងមុខទំហំ 8.0MP។ Nokia 3.1 Plus មានដាក់លក់នៅតាមបណ្តាហាងលក់ទូរស័ព្ទដៃទំនើបក្នុងទីផ្សារព្រះរាជាណាចក្រកម្ពុជាយើងដែលមានតម្លៃត្រឹមតែ $179 តែប៉ុណ្ណោះ៕
