នៅថ្ងៃទី 28 ខែមករាខាងមុខនេះ ក្រុមហ៊ុនបច្ចេកវិទ្យាយក្ស Samsung នឹងប្រកាសសម្ពោធស្មាតហ្វូនស៊េរីថ្មីរបស់ខ្លួនហើយដែលត្រូវបានគេរំពឹងថា នឹងមានការបង្ហាញនូវស្មាតហ្វូនស៊េរីថ្មីត្រកូល M-series ដែលរួមមានស្មាតហ្វូន Galaxy M10 និង Galaxy M20 ជាដើម។ ស្របពេលជាមួយដែលយើងបានឃើញរួចមកហើយនូវរូបភាពបែកធ្លាយជាច្រើនរបស់ស្មាតហ្វូនទាំងនេះនោះ មានការបង្ហាញថា ផ្នែកខាងក្រោយរបស់ស្មាតហ្វូន Galaxy M20 នឹងប្រើប្រាស់អេក្រង់ប្រភេទ Infinity-V display។ រូបភាពបែកធ្លាយនេះ បានបញ្ជាក់ថា ស្មាតហ្វូននេះ នឹងប្រើប្រាស់ជាមួយនឹងប្រព័ន្ធកាមេរ៉ាភ្លោះ និងប្រព័ន្ធស្កេនក្រយ៉ៅដៃសម្រាប់ការបន្ថែមនូវប្រព័ន្ធសុវត្ថិភាពកាន់តែរឹងមាំ។ កាមេរ៉ាភ្លោះនេះ គឺបញ្ឈរ ហើយស្ថិតនៅផ្នែកខាងលើខាងឆ្វេងជាមួយនឹងភ្លើង LED Flash ហើយប្រព័ន្ធស្កេនក្រយ៉ៅដៃស្ថិតនៅកណ្តាលនៃផ្នែកខាងក្រោយខាងលើ។
បើនិយាយអំពីលក្ខណៈសម្បត្តិវិញនោះ ស្មាតហ្វូននេះនឹងមានអេក្រង់ទំហំ 6.3-inch PLS LCD display ជាមួយនឹងកម្រិតភាពច្បាស់ដល់ទៅ 1080x2340 pixels Full HD+ ជាមួយនឹងកម្រិត 19.5:9 aspect ratio។ ស្មាតហ្វូននេះ នឹងប្រើប្រាស់នូវបន្ទះឈីប 14nm Exynos 7885 octa-core ជាមួយរ៉េមទំហំ 3GB ។ ស្មាតហ្វូននេះនឹ ងប្រើប្រាស់នូវកាមេរ៉ាភ្លោះទំហំ 13MP+5MP នៅផ្នែកខាងក្រោយ ហើយសម្រាប់កាមេរ៉ាខាងមុខរបស់ស្មាតហ្វូននេះនៅមិនទាន់ដឹងនៅឡើយទេ។ ស្មាតហ្វូននេះដំណើរការនូវប្រព័ន្ធប្រតិបត្តិការ Android OS ហើយវានឹងមានថាមពលថ្មដល់ទៅ 5,000mAh ថែមទៀត។
តាមការបញ្ជាក់របស់របាយការណ៍ទាំងនេះ ស្មាតហ្វូនស៊េរីថ្មី Samsung Galaxy M20 នឹងមានតម្លៃដល់ទៅ Rs. 12,990 នៅក្នុងប្រទេសឥណ្ឌាដែលប្រហែលជា $182។ ស្មាតហ្វូនត្រកូល Galaxy M-series របស់ក្រុមហ៊ុន Samsung គឺមានគោលដៅក្នុងការប្រកួតប្រជែងទៅលើស្មាតហ្វូនដែលមានតម្លៃធូរថ្លៃនៅក្នុងទីផ្សារនៃប្រទេសឥណ្ឌា ហើយវាក៏នឹងមានការចាប់អារម្មណ៍ខ្លាំងក្នុងការប្រើប្រាស់ផងដែរ។ ស្មាតហ្វូន Galaxy M-series នឹងមានលក្ខណៈសម្បត្តិល្អប្រសើរជាងស្មាតហ្វូនត្រកូល Galaxy J-series។ ក្រុមហ៊ុន Samsung មានក្តីសង្ឃឹមថា ស្មាតហ្វូនត្រកូល Galaxy M-series ដែលគ្រោងនឹងបង្ហាញខ្លួននៅក្នុងពេលខាងមុខនេះ ពិតជាជួយអោយក្រុមហ៊ុន Samsung យកឈ្នះទៅលើក្រុមហ៊ុនប្រកួតប្រជែងជាច្រើននៅក្នុងប្រទេសឥណ្ឌានេះ៕