ថ្មីៗនេះ អ្នកទម្លាយព័ត៌មានដែលអាចជឿជាក់បានលោក Roland Quandt បានចែករំលែកនូវរូបភាព Renders ថ្មីៗរបស់ស្មាតហ្វូន Galaxy S10 និងGalaxy S10+ ត្រូវបានគេរំពឹងថា នឹងបង្ហាញខ្លួននៅក្នុងទ្វីបអ៊ឺរ៉ុប។សម្រាប់រូបភាព Renders ថ្មីនេះបង្ហាញអំពីពណ៌ខ្មៅ (Midnight Black) ពណ៌បៃតង(Emerald Green) និងពណ៌ស(Prism White editions) របស់ស្មាតហ្វូនត្រកូល Galaxy S10 នេះ។
ពណ៌របស់ស្មាតហ្វូន Samsung Galaxy S10 និង Samsung Galaxy S10+
ពណ៌ខ្មៅ Midnight Black edition របស់ស្មាតហ្វូន Galaxy S10 និង Galaxy S10+ គឺមិនមានពណ៌ gradient នោះទេ នៅផ្នែកខាងក្រោយរបស់វា។ សម្រាប់ពណ៌បៃតង Emerald Green មានពន្លឺភ្លឺលេចឡើងនៅផ្នែកខាងលើ និងងងឹតនៅផ្នែកខាងក្រោមរបស់វា។ សម្រាប់ពណ៌ស Prism White មានលាយពណ៌ខៀវ និងពណ៌ស្វាយជាមួយនឹងពណ៌សផងដែរ។ ក្រៅពីពណ៌ទាំងនេះ ស្មាតហ្វូន Galaxy S10 និងGalaxy S10+ អាចនឹងមានពណ៌ខៀវផងដែរ ប៉ុន្តែវានៅមិនទាន់បញ្ចេញភ្លាមៗទេនៅពេលនេះ។
ការរចនារូបរាងរបស់ស្មាតហ្វូន Samsung Galaxy S10 និង Samsung Galaxy S10 +
ស្មាតហ្វូន Samsung Galaxy S10 និង Samsung Galaxy S10+ នឹងប្រើប្រាស់នូវអេក្រង់គែមកោង AMOLED Infinity-O panels នៅផ្នែកខាងមុខរបស់វា។ ផ្នែកខាងក្រោម និងផ្នែកខាងលើនៃអេក្រង់ពិតជាស្តើងមែនទែន។ ស្មាតហ្វូន Galaxy S10 មានរន្ធតូចមួយនៅលើអេក្រង់សម្រាប់ដាក់កាមេរ៉ាខាងមុខស្ថិតនៅផ្នែកខាងលើខាងស្តាំ ខណៈពេលដែលស្មាតហ្វូន Galaxy S10+ មានរន្ធវែងមួយសម្រាប់ដាក់កាមេរ៉ា Selfies និង ToF Sensor។
ស្មាតហ្វូន Galaxy S10 និង Galaxy S10+ នឹងប្រើប្រាស់នូវប្រព័ន្ធស្កេនក្រយ៉ៅដៃក្រោមអេក្រង់ ultrasonic in-display fingerprint scanner ។ នៅចំហៀងរបស់ស្មាតហ្វូន Galaxy S10 គឺមានភ្ជាប់ជាមួយនឹងប៊ូតុង Bixby ប៊ូតុងឡើងចុះសំលេង Speaker ខាងក្រៅ រន្ធដោតកាសស្តាប់ 3.5mm audio jack និងរន្ធដោត USB-C Port។ ផ្នែកខាងក្រោយរបស់ស្មាតហ្វូន Galaxy S10 និង Galaxy S10+ គឺមានលក្ខិណៈស្រដៀងគ្នាបេះបិទដោយសារតែស្មាតហ្វូននេះប្រើប្រាស់នូវប្រព័ន្ធកាមេរ៉ាខាងក្រោយ ៣ គ្រាប់។ អ្វីដែលកាន់តែអស្ចារ្យជាងនេះទៀតនោះ ស្មាតហ្វូននេះប្រើប្រាស់នូវកាមេរ៉ាខាងក្រោយទំហំ 12-megapixel primary sensor និង 13-megapixel telephoto lens និងទំហំ 16-megapixel wide-angle lens ។ ផ្នែកខាងក្រោយនេះមានកាមេរ៉ា ៣ គ្រាប់រួមជាមួយនឹងភ្លើង dual-tone LED flash និងសេនស័រវាស់ចង្វាក់បេះដូងថែមទៀត។
លក្ខណៈសម្បត្តិរបស់ស្មាតហ្វូន Samsung Galaxy S10 និង Samsung Galaxy S10+
ស្មាតហ្វូន Samsung Galaxy S10 និង Samsung Galaxy S10+ មានអេក្រង់រៀងគ្នាទំហំ 6.1-inch និង 6.4-inch Infinity-O AMOLED displays ដែលមានកម្រិតភាពច្បាស់ quad HD+ ។ ស្មាតហ្វូននេះប្រើប្រាស់នូវបន្ទះឈីប Snapdragon 855 mobile platform ដែលនឹងបង្ហាញខ្លួននៅក្នុងទីផ្សារមួយចំនួនដូចជាសហរដ្ឋអាមេរិក និងចិន។ សម្រាប់ទី្វបអ៊ឺរ៉ុប និងទីផ្សារជាច្រើនទៀតនៅជុំវិញពិភពលោកនឹង ប្រើប្រាស់នូវបន្ទះឈីប Exynos 9820 chipset editions សម្រាប់ស្មាតហ្វូន Galaxy S10 ។ ស្មាតហ្វូនទាំងពីរនេះ ត្រូវគេរំពឹងថា នឹងមានរ៉េមទំហំ 6GB និងម៉េមូរីក្នុងម៉ាស៊ីនទំហំ 128GB។ ស្មាតហ្វូននេះប្រើប្រាស់នូវប្រព័ន្ធប្រតិបត្តិការ Android 9 Pie OS ។ ស្មាតហ្វូន Galaxy S10 មានថាមពលថ្មទំហំ 3,300mAh ខណៈពេលដែលស្មាតហ្វូន Galaxy S10+ មានថាមពលថ្មទំហំ 4,000mAh ។
តម្លៃ និងកាលបរិច្ឆេទនៃការដាក់លក់ស្មាតហ្វូន Galaxy S10 និង Galaxy S10+
Galaxy S10, S10+ និងម៉ូដែលទាបជាងនេះ គឺ Galaxy S10e នឹងបង្ហាញខ្លួននៅថ្ងៃទី 20 ខែកុម្ភៈខាងមុខនេះ។ ពាក្យចចាមអារ៉ាមជាច្រើន បានបញ្ជាក់ថា ស្មាតហ្វូនទាំងនេះ នឹងបង្ហាញខ្លួននៅក្នុងទីផ្សារនៃប្រទេសមួយចំនួនចាប់ពីថ្ងៃទី 8 ខែមីនានេះទៅ។ ស្មាតហ្វូន Galaxy S10 នឹងមានតម្លៃចាប់ពី $799 ខណៈពេលដែលស្មាតហ្វូន Galaxy S10+ នឹងមានតម្លៃចាប់ពី $899 ៕