ក្រុមហ៊ុន Samsung នឹងរៀបចំនូវព្រឹត្តិការណ៍ Unpacked 2019 របស់ខ្លួននៅថ្ងៃទី 20 ខែកុម្ភៈខាងមុខនេះហើយដើម្បី បង្ហាញវត្តមាននូវស្មាតហ្វូនស៊េរីថ្មី Galaxy S10 Series។ ពាក្យចចាមអារ៉ាមមួយចំនួន បានអះអាងថា ការកម្ម៉ង់ទិញមុនសម្រាប់ស្មាតហ្វូន Galaxy S10 នេះ នឹងចាប់ផ្តើមនៅប៉ុន្មានថ្ងៃក្រោយការបង្ហាញស្មាតហ្វូនស៊េរីថ្មីនេះ។ ទោះជាយ៉ាងណាក៏ដោយ រូបភាពបែកធ្លាយថ្មីមួយដែលបង្ហាញខ្លួននៅលើ Twitter បានទម្លាយថា ការកម្មង់ទិញមុនសម្រាប់ស្មាតហ្វូននេះ នឹងចាប់ផ្តើមនៅថ្ងៃទី 21 ខែកុម្ភៈតែម្តង។
ការកម្មង់ទិញមុនស្មាតហ្វូន Galaxy S10
រូបភាពខាងក្រោមនេះបង្ហាញថា ស្មាតហ្វូន Galaxy S10 នឹងបង្ហាញខ្លួននៅក្នុងប្រទេសឥណ្ឌូនេស៊ីតាមរយៈព្រឹត្តិការណ៍ Unpacked នៅថ្ងៃទី 21 ខែកុម្ភៈនេះ។ ការកម្មង់ទិញមុនទៅលើស្មាតហ្វូនស៊េរីថ្មីនេះនឹងចាប់ផ្តើមនៅថ្ងៃទី 22 ខែកុម្ភៈនៅក្នុងប្រទេសនេះ។ ជាក់ស្តែង ស្មាតហ្វូននេះនឹងបង្ហាញខ្លួននៅថ្ងៃទី 20 ខែកុម្ភៈសម្រាប់លោកខាងលិច ហើយវាគឺទទួលការកម្មង់ទិញមុនដែលចាប់ផ្តើមនៅថ្ងៃទី 21 ខែកុម្ភៈនេះ។ ស្មាតហ្វូនត្រកូល Galaxy S10 Series នេះនឹងមានស្មាតហ្វូនចំនួន 3 ម៉ូដែលគឺ Galaxy S10, Galaxy S10+ និង Galaxy S10e ។ ស្មាតហ្វូនទាំង 3 នេះ នឹងធ្វើការកម្មង់ទិញមុននៅថ្ងៃដដែលតែម្តង។ ពាក្យចចាមអារ៉ាមជាច្រើនកាលពីពេលមុននេះជាច្រើនអះអាងថា Samsung នឹងចាប់ផ្តើមការដាក់លក់ស្មាតហ្វូនត្រកូល Galaxy S10 Series នេះនៅថ្ងៃទី 8 ខែមីនា។ រូបភាពខាងលើនេះ ភ្ជាប់ជាមួយនឹងតំណទៅកាន់ www.GalaxyLaunchPack.com។ គេហទំព័រនេះមានភ្ជាប់ជាមួយថ្ងៃសម្ភោធន៍ និងវីដេអូ Teaser ផងដែរ។
មុខងារពិសេសៗ និងតម្លៃរបស់ស្មាតហ្វូន Galaxy S10 Series
ស្មាតហ្វូនស៊េរីថ្មី Galaxy S10 Series នេះនឹងបង្ហាញខ្លួនជាលក្ខណៈខួប 10 ឆ្នាំនៃស៊េរីត្រកូល Galaxy S របស់ក្រុមហ៊ុននេះ។ ស្មាតហ្វូនទាំងនេះនឹងភ្ជាប់ជាមួយនឹងអេក្រង់ដែលមានរន្ធប្រហោងនៅលើអេក្រង់ punch-hole AMOLED screens រួមជាមួយនឹងប្រព័ន្ធស្កេនក្រយ៉ៅដៃក្រោមអេក្រង់ បន្ទះឈីប Snapdragon 855 និង Exynos 9820 រ៉េមទំហំ 8GB ម៉េមូរីទំហំ 512GB កាមេរ៉ាខាងក្រោយ ៣ គ្រាប់ ថាមពលថ្មធំជាងមុន ជាមួយនឹងបច្ចេកវិទ្យា Reverser Charging បច្ចេកវិទ្យាសាកថ្មឥតខ្សែ Wireless Charging កម្រិតខ្ពស់ និងបច្ចេកវិទ្យា Wi-Fi 6 (Wi-Fi 802.11ax) technology ចុងក្រោយបំផុតថែមទៀត។ ស្មាតហ្វូនកម្រិតខ្ពស់ Galaxy S10+ នឹងមានតួខ្លួនសេរ៉ាមិច រ៉េមទំហំ 12GB និងម៉េមូរីទំហំ 1TB ថែមទៀត។
សម្រាប់ស្មាតហ្វូន Galaxy S10e ថ្នាក់ទាបមានរ៉េមទំហំ 6GB និងម៉េមូរីទំហំ 128GB ។ ស្មាតហ្វូននេះនឹងមានតម្លៃ 779 អ៊ឺរ៉ូ (~$889) នៅក្នុងប្រទេសអ៊ីតាលី។ សម្រាប់ទំហំ 6GB+128GB និង 8GB+512GB របស់ស្មាតហ្វូន Galaxy S10 នឹងមានតម្លៃ 929 អ៊ឺរ៉ូ ($1,059) និងតម្លៃ 1,179 អ៊ឺរ៉ូ ($1,349) រៀងគ្នានៅក្នុងប្រទេសអ៊ីតាលី។ ស្មាតហ្វូន Galaxy S10+ ដែលមានរ៉េមទំហំ 6GB+128GB, 8GB+512GB, 12GB+1TB នឹងមានតម្លៃ 1,049 អ៊ឺរ៉ូ ($1,199), 1,299 អ៊ឺរ៉ូ ($1,479) និង 1,599 អ៊ឺរ៉ូ ($1,819) រៀងគ្នានៅក្នុងប្រទេសនេះ៕
