ថ្មីៗនេះមានការបង្ហាញចេញនូវលក្ខណៈសម្បត្តិទាំងស្រុងរបស់ស្មាតហ្វូនស៊េរីថ្មី vivo V15 Pro ស្របពេលដែលលក្ខណៈសម្បត្តិរបស់ស្មាតហ្វូននេះ បានបែកធ្លាយផងដែរ។ កន្លងមក មានរបាយការណ៍ជាច្រើនបានបញ្ចេញនូវលក្ខណៈសម្បត្តិធំៗចំនួន 2 របស់ស្មាតហ្វូននេះ គឺទំហំនៃអេក្រង់ និងទំហំនៃថាមពលថ្ម។ បន្ថែមពីនេះទៀតនោះ តម្លៃរបស់ស្មាតហ្វូននេះក៏ទើបតែបែកធ្លាយនៅក្នុងព័ត៌មានបែកធ្លាយថ្មីនេះផងដែរ។
យោងតាមព័ត៌មានចុងក្រោយបំផុតនេះ បានទម្លាយថា ស្មាតហ្វូន vivo V15 Pro នឹងមានអេក្រង់ប្រភេទ Super AMOLED display6.39 inches ជាមួយនឹងកម្រិតភាពច្បាស់ Full HD+ ដោយមានអេក្រង់ពេញគែមតែម្តង គឺគ្មាន Notch នោះទេ ហើយអេក្រង់នេះ ត្រូវបានគេដឹងថាមានឈ្មោះ “Ultra FullView Display”។ នៅក្នុងបញ្ជីរបស់ Geekbench ក៏បានទម្លាយព័ត៌មានអំពីស្មាតហ្វូននេះផងដែរ។ ស្មាតហ្វូន vivo V15 Pro នឹងប្រើប្រាស់នូវបន្ទះឈីប Snapdragon 675។ នេះគឺជាស្មាតហ្វូនដំបូងបំផុតដែលបង្ហាញខ្លួននៅក្នុងប្រទេសឥណ្ឌា ជាមួយនឹងបន្ទះឈីប SD675 SoC។ បន្ទះឈីបនេះ នឹងប្រើប្រាស់ជាមួយនឹងរ៉េមទំហំ 6GB។ ស្មាតហ្វូននេះ មានម៉េមូរីក្នុងម៉ាស៊ីនទំហំ 128GB។ ដូចគ្នាទៅនឹងជំនាន់មុននេះដែរ គឺស្មាតហ្វូន vivo V11 Pro វានឹងមានរន្ធសម្រាប់ដោត microSD card។
សម្រាប់ការថតរូបភាពវិញនោះ ស្មាតហ្វូន vivo V15 Pro មានកាមេរ៉ាខាងមុខទំហំ 32MP Pop-Up Selfie និងមានកាមេរ៉ាខាងក្រោយចំនួន 3 គ្រាប់ ដែលមានទំហំ 48MP+8MP+5MP ដែលមានភ្ជាប់ជាមួយនឹង AI ទាំងអស់។ កន្លងមកមានពាក្យចចាមអារ៉ាមជាច្រើន បានបញ្ជាក់ថា កាមេរ៉ាគោលរបស់ស្មាតហ្វូននេះ នឹងប្រើប្រាស់នូវ ISOCELL GM1 របស់ក្រុមហ៊ុន Samsung ដែលនេះគឺជាសេនស័រ ដែលធ្លាប់បានប្រើប្រាស់នៅលើស្មាតហ្វូនជាច្រើនរួចមកហើយដូចជា Samsung Galaxy A8s, Huawei Nova 4 និង Redmi Note 7 ជាដើម។ ស្មាតហ្វូន V15 Pro វិញនឹងមានថាមពលថ្មទំហំធំជាងមុនដល់ទៅ 3,700mAh ដោយមានភ្ជាប់នូវបច្ចេកវិទ្យាបញ្ចូលថាមពលថ្មលឿន dual-engine fast charging ផងដែរ។
ស្មាតហ្វូន vivo V15 Pro នឹងមានតម្លៃចន្លោះពី $350 និង $420 ប៉ុន្តែទោះជាយ៉ាងណាក៏ដោយ នៅក្នុងការការបែកធ្លាយចុងក្រោយបំផុតនេះ បានអះអាងថា ស្មាតហ្វូន V15 នេះ ប្រហែលជាមានតម្លៃខ្ពស់ជាងនេះ គឺដល់ទៅ $460 ឯណោះ។ vivo ត្រូវគេរំពឹងថា នឹងបង្ហាញវត្តមានស្មាតហ្វូន vivo V15 ជាមួយនឹងស្មាតហ្វូន vivo V15 Pro ក្នុងពេលតែមួយ។ សម្រាប់លក្ខណៈសម្បត្តិរបស់ស្មាតហ្វូន V15 នៅមិនទាន់ទម្លាយនៅឡើយទេ។ ប៉ុន្តែតម្លៃរបស់វាប្រហែលជានៅចន្លោះពី $280 និង $350។ ការកម្មង់ទិញមុនសម្រាប់ស្មាតហ្វូននេះ គឺនឹងចាប់ផ្តើមនៅថ្ងៃទី 15ខែកុម្ភៈមុនព្រឹត្តិការណ៍បង្ហាញជាផ្លូវការនៅថ្ងៃទី 20 ខែកុម្ភៈ៕
