បន្ទាប់ពីឈប់សម្រាកនៅក្នុងបុណ្យចូលឆ្នាំចិនកាលពីដើមខែ! នៅថ្ងៃនេះ ក្រុមហ៊ុន Meizu បានបញ្ចេញនូវរូបភាព Poster ដើម្បីប្រកាសថា ខ្លួនបានត្រៀមខ្លួនក្នុងការរៀបចំនូវព្រឹត្តិការណ៍មួយនៅថ្ងៃទី 14 ខែកុម្ភៈស្អែកនេះ។ រូបភាព Poster ដែលធ្វើការរាប់ថយក្រោយនេះ សម្រាប់ព្រឹត្តិការណ៍នេះ គឺបានបង្ហាញអំពីរូបរាងបញ្ឆិតរបស់ស្មាតហ្វូននេះនេះ ហើយក៏មានអក្សរជាភាសាចិនមួយចំនួន ដែលយើងជឿជាក់ថាជា Lyrics ចេញពីបទចម្រៀងដែលធ្វើការសរសេរនៅក្នុងរូបភាព Poster នោះផងដែរ។
នៅថ្ងៃនេះ ក្រុមហ៊ុន Meizu បានធ្វើការចែករំលែកនូវរូបភាព Poster មួយនៅលើគណនី Weibo កាលពីម្សិលមិញនេះដែលបង្ហាញនូវស្មាតហ្វូនស៊េរីថ្មី Meizu 16th ស្ថិតនៅជា Background នៃពាក្យជាច្រើន ដែលពាក់ព័ន្ធជាមួយនឹងពានរង្វាន់តន្រ្តី ក្នុងនោះក៏មានរលកសញ្ញាមួយនៅលើរូបភាព Poster នេះផងដែរ។ មានការប៉ាន់ស្មានថា ស្មាតហ្វូននេះ នឹងប្រើប្រាស់នូវជំនួយការឆ្លាតវៃ AI Voice Assistant របស់ក្រុមហ៊ុន Meizu ឬ Smart Speaker ផ្ទាល់ខ្លួនថែមទៀត។
អ្នកតាមដាននានា មានជំនឿជឿជាក់ថា ស្មាតហ្វូនដែលបង្ហាញខ្លួននៅលើរូបភាព Poster នេះ អាចជាវត្តមាននៃស្មាតហ្វូន Meizu Note 9។ គិតត្រឹមថ្ងៃនេះ គឺនៅសល់រយៈពេលតែ 1 ថ្ងៃទៀតប៉ុណ្ណោះ ព្រឹត្តិការណ៍នេះ នឹងចាប់ផ្តើមហើយ។ គ្រប់គ្នារំពឹងថា ក្រុមហ៊ុន Meizu នឹងបញ្ចេញនូវរូបភាព poster កាន់តែច្រើនជាងនេះ ទៀតដែលនឹងផ្តល់តម្រុយជាច្រើនអំពីគម្រោងរបស់ខ្លួនដែលគ្រោងនឹងបង្ហាញនោះ។ រង់ចាំតាមដានជាមួយនឹងខ្ញុំទាំងអស់គ្នា៕