នៅក្នុងត្រីមាសទី 4 នៅក្នុងឆ្នាំ 2018 នេះ ការនាំចេញ iPhone ត្រូវបានគេរាយការណ៍ថាមានការធ្លាក់ចុះ 20% នៅក្នុងប្រទេសចិន ដែលជាទីផ្សារមួយធំជាងគេបំផុត នៅលើពិភពលោកនេះ ស្របពេលដែលក្រុមហ៊ុន Huawei បាននឹងកំពុងតែកាន់ក្តាប់ទីផ្សារនេះយ៉ាងណែន ដោយថែមទាំងបានដណ្តើមយកកៅអីចំណាត់ថ្នាក់លេខ 2 ពី Apple ទៀតផងផង ។ តាមការបញ្ជាក់ចេញពីរបាយការណ៍របស់ IDC បានអោយដឹងថា ទីផ្សារក្នុងស្រុកមានការធ្លាក់ចុះចំនួន 9.7% នៅក្នុងត្រីមាសនេះ ប៉ុន្តែក្រុមហ៊ុន Apple មានការធ្លាក់ចុះដល់ទៅ 2 ដង។
នៅក្នុងរបាយការណ៍នេះ បានបន្ថែមថា ការធ្លាក់ចុះនៃការលក់ iPhone គឺដោយសារតែកត្តាចំនួន 3 យ៉ាងគឺ សេដ្ឋកិច្ចនៅយឺតយ៉ាវ ការអូសបន្លាយពេលវេលា និងតម្លៃខ្ពស់របស់ iPhone។ ទោះជាយ៉ាងណាក៏ដោយ តាមរបាយការណ៍របស់ IDC នោះ បានបញ្ជាក់ទៀតថា ក្រុមហ៊ុនផលិត iPhone មិនមែនមានប្រតិបត្តិការមិនល្អដូចគ្នាទៅនឹងក្រុមហ៊ុន Xiaomi Corp និងម៉ាកយីហោជាច្រើនទៀតនៅក្នុងប្រទេសចិននោះទេ។ នៅក្នុងរយៈពេលប៉ុន្មានខែចុងក្រោយនេះ នៅក្នុងឆ្នាំនេះ ការនាំចេញរបស់ក្រុមហ៊ុននេះ គឺមានការធ្លាក់ចុះដល់ទៅ 35%។
តាមការបញ្ជាក់នៅក្នុងរបាយការណ៍របស់ IDC នោះ ក្រុមហ៊ុន Apple ស្ថិតនៅក្នុងចំណាត់ថ្នាក់លេខ 4 នៅក្នុងការនាំចេញនៅក្នុងប្រទេសនេះដែលតាមពីក្រោយក្រុមហ៊ុនបច្ចេកវិទ្យា Huawei, Oppo និង Vivo របស់ចិន។ អ្នកប្រើប្រាស់ស្មាតហ្វូននៃម៉ាកយីហោជាច្រើនដូចជា Apple ពេលនេះ គឺប្រឈមមុខទៅនឹងការធ្លាក់ចុះបើទោះបីជាវាមានការមើលឃើញថាវាមានកំណើនក៏ដោយ។ ហេតុផលដ៏សំខាន់នៃការធ្លាក់ចុះនេះគឺដោយសារតែកង្វះនៃបច្ចេកវិទ្យាច្នៃប្រឌិត ដែលមិនអាចធ្វើអោយអ្នកប្រើប្រាស់ចង់ផ្លាស់ប្តូរស្មាតហ្វូនថ្មីរបស់ពួកគេនោះទេ។ ប្រាក់ចំណូលរបស់ក្រុមហ៊ុនដែលមានមូលដ្ឋាននៅក្នុងសហរដ្ឋអាមេរិកបានមកពី iPhone គឺមានការធ្លាក់ចុះ 15% នៅក្នុងចន្លោះពីខែតុលា ដល់ខែធ្នូ។
ដើម្បីទូទាត់សងសម្រាប់ការខាតបង់នេះ Apple បានព្យាយាមក្នុងការជំនួសនូវការលក់ទូរស័ព្ទជាមួយនឹងប្រាក់ចំណូលពីសេវាកម្មជាច្រើន។ លោក Tim Cook នាយកប្រតិបត្តិរបស់ Apple បានមើលឃើញថា ប្រទេសចិន គឺជាផ្នែកមួយដ៏សំខាន់នៃយុទ្ធសាស្រ្តរបស់ Apple។ នៅក្នុងរបាយការណ៍នៃប្រាក់ចំណូលនៅក្នុងត្រីមាសចុងក្រោយឆ្នាំមុននេះ ក្រុមហ៊ុននេះ បានរកប្រាក់ចំណូលបានជិត 52 ពាន់លានដុល្លារអាមេរិក ពីប្រទេសចិនដែលរួមទាំងហុងកុងផងដែរ។ ប៉ុន្តែទោះជាយ៉ាងណាក៏ដោយ ដោយសារតែវាមានកំណើនសេដ្ឋកិច្ចនៅយឺតយ៉ាវតាំងពីឆ្នាំ 2009 នោះ បានធ្វើអោយការលក់របស់ខ្លួន គឺមានការធ្លាក់ចុះដល់ទៅ 27% នៅក្នុងត្រីមាសនៃរដូវកាលឈប់សម្រាកនេះ។
ប្រភពព័ត៌មាននេះ បានបញ្ជាក់ថា ដោយសារតែភាពយឺតយ៉ាវនៅក្នុងប្រទេសចិននេះហើយ ដែលជាកត្តាធ្វើអោយមានការខាតបង់ប្រាក់ចំណូលរបស់ក្រុមហ៊ុន Apple ជាលើកដំបូងបំផុតនៅក្នុងរយៈពេលជិត 2 ទសវត្សន៍នេះ។ ពេលនេះ ក្រុមហ៊ុន Huawei បានវ៉ាយកដំណែងរបស់ក្រុមហ៊ុន Apple ក្នុងការក្លាយខ្លួនជាក្រុមហ៊ុនបច្ចេកវិទ្យាចំណាត់ថ្នាក់ទី 2 ពិពលោកនៅក្នុងឆ្នាំ 2018 ហើយក្រុមហ៊ុននេះ ក៏បានបង្កើនការនាំចេញរបស់ខ្លួនបន្ទាប់ពីឯកតា មានការកើនឡើង 23.3% នៅក្នុងត្រីមាសខែធ្នូកន្លងទៅនេះ ដែលខ្ពស់ជាងម៉ាកយីហោណាៗទាំងអស់៕
