បន្ទាប់ពីការប្រកាសបង្ហាញស្មាតហ្វូនស៊េរីថ្មី Galaxy M-series រួចមកនៅក្នុងប្រទេសឥណ្ឌា ជំហានបន្ទាប់របស់ក្រុមហ៊ុនបច្ចេកវិទ្យា Samsung គឺនៅក្នុងប្រទេស ឥណ្ឌូនេស៊ី។ មានការបង្ហាញថា គឺមានតែស្មាតហ្វូន Galaxy M20 ប៉ុណ្ណោះ ដែលអាចរកទិញបាននៅក្នុងតំបន់អាស៊ីអាគ្នេយ៍នេះ។ ក្រុមហ៊ុនលក់រាយអនឡាញជាច្រើនដូចជា Lazada និង JD នៅក្នុងប្រទេសឥណ្ឌូនេស៊ី នៅពេលនេះ បានបង្កើតនូវទំព័រពិសេសជាច្រើន នៅមុនការដាក់លក់ស្មាតហ្វូននេះ នៅថ្ងៃទី 14 ខែកុម្ភៈស្អែក នេះ។
ក្រុមហ៊ុន Lazada បានធ្វើការរាប់ថយក្រោយទៅលើកាលបរិច្ឆេទនៃការដាក់លក់នេះនៅលើវ៉ិបសាយរបស់ខ្លួន ខណៈពេលដែលក្រុមហ៊ុន JD នៅក្នុងប្រទេសឥណ្ឌូ នេស៊ី បានអះអាងថា ស្មាតហ្វូននេះអាចរកទិញបាននៅថ្ងៃទី 14 ខែកុម្ភៈនេះហើយ។ Galaxy M20 គឺជាស្មាតហ្វូនថ្នាក់កណ្តាលជំនាន់ថ្មី មានថាមពលថ្មទំហំ 5,000mAh ដែលអាចចាក់វីដេអូបានចំនួន 17 ម៉ោង ឬការស្តាប់តន្ត្រីបាន 100 ម៉ោង ឬការខលបានពេញមួយថ្ងៃ។ ស្មាតហ្វូននេះ មានអេក្រង់ Infinity-V Display និងកាមេរ៉ាខាងក្រោយភ្លោះ ។ ស្មាតហ្វូនស៊េរីថ្មី M20 មានអេក្រង់ទំហំ 6.3-inch LCD display ជាមួយនឹង waterdrop notch។
ស្មាតហ្វូននេះ ប្រើប្រាស់នូវបន្ទះឈីប Exynos 7904 octa-core ជាមួយនឹងរ៉េមទំហំ 3GB និង 4GB និងម៉េមូរីក្នុងម៉ាស៊ីនទំហំ 32GB និង 64GB ។ ស្មាតហ្វូននេះមានកាមេរ៉ាខាងមុខទំហំ 8MP និងកាមេរ៉ាខាងក្រោយភ្លោះខាងក្រោយទំហំ 13MP+5MP ហើយក៏មានប្រើប្រាស់នូវប្រព័ន្ធស្កេនក្រយ៉ៅដៃនៅខាងក្រោយផងដែរ។ ស្មាតហ្វូននេះ ដំណើរការនូវប្រព័ន្ធប្រតិបត្តិការ Android 8.1 Oreo ហើយវាអាចធ្វើការអាប់ដេតទៅលើប្រព័ន្ធប្រតិបត្តិការ Android Pie នៅពេលខាងមុខ។ ស្មាតហ្វូននេះ ក៏ត្រូវបានក្រុមហ៊ុនដាក់អោយប្រើប្រាស់នូវ hybrid SIM slot ហើយអ្នកអាចផ្លាស់ប្តូរនូវស៊ីមទីពីរនេះ ជាមួយនឹងម៉េមូរី MicroSD card (512GB)។ សម្រាប់ការបញ្ចូលថាមពលថ្ម និងការបញ្ចូនទិន្នន័យ គឺតាមរយៈរន្ធដោត USB Type-C។ ស្មាតហ្វូន Galaxy M20 នេះ មានពណ៌ខៀវ Ocean Blue និងពណ៌ខ្មៅ Charcoal Black ប៉ុន្តែសម្រាប់ប្រទេសឥណ្ឌូនេស៊ីនេះស្មាតហ្វូននេះ មានតែពណ៌ខៀវប៉ុណ្ណោះ៕