ថ្មីៗនេះ ក្រុមហ៊ុន Fujifilm ទើបតែបានប្រកាសចេញកាមេរ៉ាប្រភេទ Mirrorless ជំនាន់ថ្មីរបស់ខ្លួនម៉ូដែល Fujifilm X-T30 ដែលជាជំនាន់បន្ទាប់ពី X-T20 ដែលទទួលបានទីផ្សារជោគជ័យខ្លាំងនាពេលកន្លងមក។ កាមេរ៉ា Mirrorless ជំនាន់ថ្មីមួយនេះ បំពាក់មកជាមួយសែនស័រកាមេរ៉ាទំហំ 26.1MP ដែលជាសែនស័រប្រភេទ Fujifilm X-Trans CMOS Sensor ដែលប្រើនូវលើម៉ូដែល Fujifilm X-T3 ជាមួយអង្គគណនា Quad-core X-Processor 4។
ដូច្នេះ មានន័យថា អ្នកប្រើប្រាស់អាចប្រើបច្ចេកវិទ្យាកាមេរ៉ាកម្រិតខ្ពស់ក្នុងការផលិតសាច់រូបភាពបានច្បាស់បំផុតដូចគ្នាទៅនឹងម៉ូដែល X-T3 ដែលមានតម្លៃខ្ទង់ $1,500 អីចឹងដែរ។ ជាងនេះទៅទៀត Fujifilm X-T30 បានបំពាក់នូវមុខងារ Hybrid AF System ជាមួយនឹង 425 AF Points និងពង្រឹងលើមុខងារ Face detection ហើយនឹងភ្ជាប់នូវមុខងារ Eyes detection AF ថែមទៀតផង។ សម្រាប់ប្រព័ន្ធ Focus System របស់ X-T30 គឺធ្វើការបានប្រសើរជាង X-T3 បន្តិច ប៉ុន្តែវានឹងធ្វើការបានកាន់តែល្អប្រសើរបំផុតជាង X-T3 តាមរយះការធ្វើបច្ចុប្បន្នភាពនៅលើ Firmware។
ចំពោះសមត្ថភាពដែលកាមេរ៉ាជំនាន់ថ្មី X-T30 ធ្វើការបានដូចគ្នាទៅនឹងម៉ូដែល X-T3 គឺការថតវីដេអូដោយវាអាចថតបានដល់ 4K 30fps កម្រិត 8-bit 4:2:0 internal recording និង 10-bit 4:2:2 external recording via HDMI ប៉ុន្តែវាមិនអាចថតបានដល់ 4K 60fps កម្រិត 10-bit 4:2:2 external recording ដូច X-T3 នោះទេ ហើយក៏មិនមានកន្លែងសម្រាប់ដាក់បន្ថែម SD Card ទីពីរដូច X-T3 នោះដែរ។
Fujifilm X-T30 បំពាក់នូវអេក្រង់ប្រើបច្ចេកវិទ្យាអេឡិចត្រូនិច 2.36 dot OLED EVF និងអេក្រង់ថាច់ស្រ្គីនទំហំ 3.0 អ៊ីងប្រភេទ 1.04M dot tilting LCD សម្រាប់ធ្វើការគ្រប់គ្រង់លើការបញ្ជាថត និងមុខងារទូទៅ។ កាមេរ៉ាជំនាន់ថ្មីនេះមានភ្ជាប់នូវរន្ធដោត microphone jack តែមិនមានរន្ធដោតកាស Headphone jack នោះទេ ប៉ុន្តែអ្នកប្រើប្រាស់អាចដោតកាសស្តាប់សំលេងចេញបានតាមរយះការប្រើប្រាស់រន្ធដោត USB-C ហើយជាមួយគ្នានេះដែរវាក៏បំពាក់នូវប្រព័ន្ធបច្ចេកវិទ្យា Bluetooth និង Wi-Fi ដើម្បីធ្វើការតភ្ជាប់ និងចែករំលែកទៅកាន់ឧបករណ៍អេឡិចត្រូនិចផ្សេងៗ និងស្មាតហ្វូនបានកាន់តែងាយស្រួលផងដែរ។Fujifilm X-T30 នឹងត្រូវបានក្រុមហ៊ុនធ្វើការចេញលក់នៅក្នុងខែមិនាខាងមុខនេះជាមួយតម្លៃខ្ទង់ $899 សម្រាប់តម្លៃតួរខ្លួនរបស់វា និងតម្លៃខ្ទង់ $999 បូកជាមួយលែនតស៊េរី XC15-45mm ហើយនិងតម្លៃខ្ទង់ $1,899 បូកជាមួយលែនតស៊េរី XF18-55mm៕
