កន្លងមក លោកអ្នកប្រាកដជាបានឃើញនូវការបែកធ្លាយជាច្រើន រួចមកហើយអំពី Galaxy S10 ក្នុងនោះក៏មានស្មាតហ្វូន Galaxy S10e និងស្មាតហ្វូន Galaxy S10 និង Galaxy S10+ ផងដែរ។ បើនិយាយអំពីតម្លៃរបស់ស្មាតហ្វូននេះ គឺស្រដៀងគ្នាទៅនឹងតម្លៃរបស់ iPhones 2018 អញ្ចឹង។ ស្មាតហ្វូន Galaxy ស៊េរីថ្មីនេះ គឺមានតម្លៃប្រហែលជា $750 ឡើងទៅ។ សម្រាប់ស្មាតហ្វូន S10e គឺមានលក្ខណៈសម្បត្តិ មិនសូវខ្លាំងក្លាប៉ុន្មាននោះទេ ដោយសារតែវាមិនមានភ្ជាប់ជាមួយនឹងប្រព័ន្ធស្កេនក្រយ៉ៅដៃក្រោមអេក្រង់ ហើយវាក៏គ្មានកាមេរ៉ាភ្លោះខាងមុខផងដែរ។ ប៉ុន្តែសម្រាប់ស្មាតហ្វូននេះ គឺមានពណ៌យ៉ាងទាក់ទាញផងដែរ។
សម្រាប់ស្មាតហ្វូន ដែលមានតម្លៃថ្លៃជាងគេ គឺប្រើប្រាស់នូវសេរ៉ាមិច នៅផ្នែកខាងក្រោយ ហើយស្មាតហ្វូននេះ មានពណ៌សសេរ៉ាមិច និងពណ៌ខ្មៅសេរ៉ាមិចយ៉ាងស្រស់ស្អាត។ តាមព័ត៌មានបែកធ្លាយទាំងអស់នេះ បង្ហាញថា Galaxy S10+ គឺមានតម្លៃថ្លៃជាងគេ ដោយសារតែវាមានទំហំម៉េមូរីទំហំដល់ទៅ 1TB នឹងអាចនឹងមានរ៉េមទំហំដល់ទៅ 12GB។ សូមជំរាបថា ស្មាតហ្វូនជាច្រើនពេលនេះ បានចាប់ផ្តើមមានតម្លៃថ្លៃទៅៗហើយ ហេតុផល គឺដោយសារតែនុស្សជាច្រើនមិនទាន់ធ្វើការ Upgrade ទៅលើស្មាតហ្វូនរបស់ពួកគេនោះទេ ដោយសារតែស្មាតហ្វូនទាំងនោះនៅល្អ ហើយទីផ្សារស្មាតហ្វូនក៏មិនសូវជាល្អដែរ។ ការលក់គឺកំពុងតែមានការធ្លាក់ចុះ។ ដើម្បីទប់ទល់ទៅនឹងការលក់ធ្លាក់ចុះនេះ ក្រុមហ៊ុនជាច្រើន បានធ្វើការផ្លាស់ប្តូរយុទ្ធសាស្រ្តរបស់ខ្លួន។ រឿងមួយដែលសំខាន់បំផុតនោះគឺប្រព័ន្ធ Ecosystems និងសេវាកម្មជាច្រើន ដែលបន្ថែមពីលើលក្ខណៈសម្បត្តិរបស់ស្មាតហ្វូនទាំងនេះ បានបង្កើនតម្លៃផងដែរ ដើម្បីពង្រឹងទៅលើប្រាក់ចំណូលរបស់ខ្លួនឡើងវិញ។
នៅក្នុងសម័យកាលថ្មីនៃការវិវត្តន៍របស់ស្មាតហ្វូននោះ ក្រុមហ៊ុនផលិតស្មាតហ្វូនជាច្រើន មានបំណងចង់អោយស្មាតហ្វូនរបស់ពួកគេអស្ចារ្យនាពេលអនាគត។ ស្របពេលដែលមនុស្សជាច្រើន មិនចង់ប្រើប្រាស់នូវស្មាតហ្វូនដែលមានអាយុកាល 1 ឬ 2 ឆ្នាំនោះទេ ខណៈពេលដែលមនុស្សមួយចំនួនទៀតប្រើប្រាស់ស្មាតហ្វូនរបស់ពួកគេមានអាយុប្រហែលជា 3 ឬ 4 ឬ ច្រើនឆ្នាំជាងនេះទៀត។ នៅពេលដែលនិយាយអំពីស្មាតហ្វូនដែលមានរ៉េមទំហំ 12GB និងម៉េមូរី 1TB នោះ គឺពិតជាមានតម្លៃថ្លៃមែនទែនហើយនៅពេលនេះ។ ជាមួយនឹងការមកដល់ស្មាតហ្វូនថ្មីនេះ ក្រុមហ៊ុន Samsung អាចនឹងលក់ Galaxy S10+ ក្នុងតម្លៃប្រហែលជា $1500៕