កាលពីឆ្នាំមុននេះ មានការលេចធ្លាយនូវគំរូជាច្រើនរបស់ស្មាតហ្វូនស៊េរីថ្មី ASUS ZenFone 6 ដែលបានបង្ហាញថា ស្មាតហ្វូននេះ មានរូបរាងថ្មី និងប្លែកពីម៉ូដែលមុនៗ ដែលគេដឹងថា អាចនឹងមានរន្ធប្រហោងនៅលើអេក្រង់ផងែរ ប៉ុន្តែសម្រាប់ការរចនារូបរាងចុងក្រោយបំផុត របស់ស្មាតហ្វូននេះ ហាក់ដូចជាមានលក្ខណៈផ្សេងមួយទៀត ដោយនៅពេលនេះ មានរូបភាពផ្ទាល់ៗ របស់ស្មាតហ្វូនស៊េរីថ្មី ZenFone 6 បានបង្ហាញលើបណ្តាញអ៊ីនធឺណិត ដែលបញ្ជាក់ថា នេះគឺជាផលិតផលចុងក្រោយបំផុតហើយ ដោយសារតែមានប្រអប់លក់រាយនៅក្នុងរូបភាពនេះ។
ស្មាតហ្វូនស៊េរីថ្មី Zenfone 6 នឹងភ្ជាប់មកជាមួយកាមេរ៉ា 3 គ្រាប់នៅផ្នែកខាងក្រោយ ហើយកាមេរ៉ានេះ ត្រូវបានរចនាជារូបរាងបញ្ឈរដោយមានកាមេរ៉ាពីរ គ្រាប់នៅជាប់គ្នា ហើយកាមេរ៉ាទី 3 និងភ្លើង LED គឺត្រូវបំបែកផ្សេង។ ស្មាតហ្វូននេះ នឹងពីរពណ៌នៅក្នុងរូបភាពនេះ ដោយមានមួយ គឺមានពណ៌ខៀវលាយពណ៌ក្រហម ហើយមួយទៀត គឺមានពណ៌ខ្មៅដែលគ្របដណ្តប់ដោយកញ្ចក់។ នៅលើរូបភាពនេះ គឺមិនមានការបង្ហាញនូវផ្នែកខាងមុខរបស់ស្មាតហ្វូននេះទេ ប៉ុន្តែប្រអប់លក់រាយរបស់វាលេចឡើងនៅក្នុងរូបថតនេះ ដែលបង្ហាញពីព័ត៌មានសំខាន់ៗមួយចំនួនដែលអាចយកជាផ្លូវការបាន ។
ដូចដែលអ្នកអាចឃើញស្រាប់ ទូរស័ព្ទនេះ មិនមានប្រព័ន្ធស្កេនស្នាមម្រាមដៃនៅខាងក្រោយនោះទេ។ នោះគឺដោយសារតែវានៅពីមុខស្ថិតនៅផ្នែកខាងក្រោមនៃអេក្រង់។ នៅពេលនេះ ក្រុមហ៊ុន ASUS នឹងបំពាក់នូវប្រព័ន្ធស្កេនស្នាមម្រាមដៃនៅខាងមុខវិញ។ មានការបញ្ជាក់ថា ស៊ុមព័ទ្ធអេក្រង់របស់ស្មាតហ្វូននេះ កាន់តែមានទំហំក្រាស់ បើទោះបីជាវាមិនក្រាស់ដូចជំនាន់សម័យ 18:9 ក៏ដោយ។ ផ្នែកខាងលើបំផុតនៃអេក្រង់របស់ស្មាតហ្វូននេះ គឺមើលឃើញមិនសូរច្បាស់នោះទេ ប៉ុន្តែយើងដឹងថាស្មាតហ្វូននេះ មិនមាន Notch ឬរន្ធប្រហោងនៅលើអេក្រង់នោះទេ។ មួយវិញទៀត និន្នាការចាស់ៗ ទំនងជានៅតែអាចកើតសម្រាប់ស្មាតហ្វូនស៊េរីថ្មី ZenFone 6 នេះ ក្រុមហ៊ុនអាចនឹងបញ្ចេញនូវច្រើនទំហំសម្រាប់ធ្វើការជ្រើសរើស។ ស្មាតហ្វូននេះ ប្រហែលជាដំណើរការនូវបន្ទះឈីប Snapdragon 855 ដូចដៃគូកំពូលៗផងដែរ៕
