Galaxy Fold របស់ក្រុមហ៊ុន Samsung ដែលអាចក្លាយទៅជាស្មាតហ្វូនមួយនៅពេលបិទ ហើយក្លាយជាថេប្លេតនៅពេលដែលវាបើកនោះ បានក្លាយជាគំរូថ្មីមួយនៃការនាំយកនូវការរចនារូបរាងកាន់តែអស្ចារ្យទៅកាន់កម្រិតមួយផ្សេងទៀត។ យោងតាមក្រុមហ៊ុន Samsung នៅថ្ងៃទី 20 ខែកុម្ភៈនៅក្នុងព្រឹត្តិការណ៍ Samsung Unpacked នៅក្នុងទីក្រុងសានហ្វ្រាន់ស៊ីស្កូ បានឱ្យដឹងថា ស្មាតហ្វូនស៊េរីថ្មី ដែលអាចបត់បញ្ចូលបានដំបូងបង្អស់នេះ នឹងដាក់លក់នៅថ្ងៃទី 26 ខែមេសាក្នុងតម្លៃចាប់ផ្តើម 1.980 ដុល្លារអាមេរិក។
ប្រធានក្រុមហ៊ុនទូរស័ព្ទចល័ត Samsung Electronics លោក Koh Dong-jin បាននិយាយថា "ស្មាតហ្វូន Galaxy Fold គឺជាឧបករណ៍ថ្មីមួយដ៏អស្ចារ្យ។ ស្មាតហ្វូននេះ នឹងផ្តល់ភាពសប្បាយរីករាយដល់អ្នកប្រើប្រាស់ជាមួយនឹងភាពច្នៃប្រឌិតដ៏អស្ចារ្យថែមទៀត"។ ការផ្លាស់ប្តូរទៅលើរូបរាងរបស់ស្មាតហ្វូននេះមានដូចជា - ទំហំ សមាសភាព និងផ្នែករឹង - គឺជាបញ្ហាប្រឈមដ៏ធំមួយសម្រាប់ឧស្សាហកម្មនេះ។ ចាប់តាំងពីឆ្នាំ 2007 នៅពេលដែលក្រុមហ៊ុន Apple បញ្ចេញនូវ iPhone ដែលមានរូបរាងជាចតុកោណកែងនោះ ស្មាតហ្វូនជាច្រើនក៏ចាប់ផ្តើមមានការវិវត្តន៍ផ្លាស់ប្តូរតាមផងដែរ។
កាលពីមុននេះ ក្រុមហ៊ុនបច្ចេកវិទ្យាជាច្រើន បានព្យាយាមលប់ចោលនូវការរចនារូបរាងស្មាតហ្វូនតាមបែបប្រពៃណី។ នៅឆ្នាំ 2013 ក្រុមហ៊ុន Samsung បានបញ្ចេញនូវ Galaxy Round ដែលជាស្មាតហ្វូនមួយដែលមានអេក្រង់គែមកោង។ នៅឆ្នាំ 2014 ក្រុមហ៊ុន LG បានធ្វើការផ្លាស់ប្តូរជាមួយភាពកោងនៅលើស្មាតហ្វូន G Flex របស់ខ្លួន។ ទោះបីជារូបរាងថ្មីនេះ បានផ្តល់នូវការក្តាប់ស្រួលក៏ដោយ ក៏ពួកគេនៅតែរក្សាការរចនារូបរាងចតុកោណកែង ដែលមានមូលដ្ឋានធ្វើពីកញ្ចក់ និងលោហធាតុនោះ។ ក្រុមហ៊ុនផលិតទូរស័ព្ទជាច្រើន ត្រូវបានគេរំពឹងថា នឹងធ្វើតាមផងដែរ។
យោងតាមព័ត៌មានកន្លងមក បញ្ជាក់ថា ក្រុមហ៊ុនផលិតស្មាតហ្វូន Android ដ៏ធំមួយទៀត គឺក្រុមហ៊ុន LG ទើបតែដាក់ពាក្យសុំប៉ាតង់សម្រាប់ឧបករណ៍ដែលអាចបត់ចូលគ្នាបានផងដែរ ហើយក្រុមហ៊ុន Huawei ក៏ធ្លាប់បានប្រកាស កាលពីឆ្នាំមុននេះដែរថា ខ្លួននឹងបញ្ចេញស្មាតហ្វូនស៊េរីថ្មីដែលបំពាក់នូវបច្ចេកវិទ្យា 5G ក៏ដូចជាស្មាតហ្វូន ដែលមានអេក្រង់ដែលអាចបត់ចូលគ្នាបានផងដែរ៕
