បន្ទាប់ពីមានព្រឹត្តិការណ៍ MWC 2019 មានពាក្យចចាមអារ៉ាមជាច្រើន អំពីស្មាតហ្វូនស៊េរីថ្មី Meizu Note 9 នៅក្នុងមួយរយៈពេលចុងក្រោយនេះ ស្មាតហ្វូនស៊េរីថ្មីនេះ ក៏ទទួលនូវការអនុម័តពី 3C និង TENAA នៅក្នុងប្រទេសចិនផងដែរ។ នៅថ្ងៃនេះ ក្រុមហ៊ុន Meizu បានបញ្ជាក់នៅលើគណនី Weibo របស់ខ្លួនថា ស្មាតហ្វូន Meizu Note 9 នឹងបង្ហាញខ្លួនជាផ្លូវការនៅថ្ងៃទី 6 ខែមីនាខាងមុខនេះ។ នៅក្នុងរូបភាព Poster របស់ស្មាតហ្វូនស៊េរីថ្មី Meizu Note 9 នេះ មិនមានទម្លាយព័ត៌មានច្រើនអំពីលក្ខណៈសម្បត្តិរបស់ស្មាតហ្វូននេះនោះទេ ប៉ុន្តែមានការបញ្ជាក់អំពីកាលបរិច្ឆេទគឺនៅថ្ងៃទី 6 ខែមីនាខាងមុខនេះ។
សម្រាប់ការរចនារូបរាងរបស់ស្មាតហ្វូននេះវិញ ក៏មានការបញ្ជាក់នៅលើ TENAA ផងដែរ។ រូបភាពជាច្រើនរបស់ TENAA បញ្ជាក់ថា ស្មាតហ្វូននេះ នឹងមានភ្ជាប់ជាមួយនឹង waterdrop ដែលផ្តល់នូវអេក្រង់កាន់តែធំងាយស្រួលសម្រាប់ការទស្សនានៅលើស្មាតហ្វូននេះ។ ស្មាតហ្វូនស៊េរីថ្មី Note 9 នេះ នឹងបង្ហាញខ្លួនជាមួយនឹងអេក្រង់កម្រិតភាពច្បាស់ 6.2 inches FHD+ display ។ ស្មាតហ្វូននេះ នឹងប្រើប្រាស់នូវបន្ទះឈីប Snapdragon 675 SoC និងរ៉េមទំហំ 6GB ។ ស្មាតហ្វូននេះនឹងមានថាមពលថ្ម 4,000mAh ។ ក្រុមហ៊ុន Meizu បញ្ជាក់ថា ស្មាតហ្វូននេះ នឹងប្រើប្រាស់នូវបច្ចេកវិទ្យា 18W mCharge rapid charging technology ដែលធ្លាប់ប្រើប្រាស់នៅលើស្មាតហ្វូន Meizu Note 8 ។ ដូច្នេះ ក្រុមហ៊ុនបច្ចេកវិទ្យាយក្សរបស់ចិននេះត្រូវគេរំពឹងថានឹងប្រើប្រាស់នូវមុខងារនេះ នៅលើស្មាតហ្វូន Note 9 របស់ខ្លួនផងដែរ។
Flyme UI គឺផ្អែកនៅលើប្រព័ន្ធប្រតិបត្តិការ Android 9 Pie OS ។ ស្មាតហ្វូននេះនឹងមានម៉េមូរីក្នុងម៉ាស៊ីនទំហំ 64 GB ។ យ៉ាងណាមិញ ស្មាតហ្វូននេះមិនអាចបន្ថែមនូវម៉េមូរីខាងក្រៅបាននោះទេ។ សម្រាប់ Notch ខាងមុខរបស់ស្មាតហ្វូននេះគឺមានកាមេរ៉ាដែលមានទំហំ 20-megapixel selfie ហើយផ្នែកខាងក្រោយរបស់ស្មាតហ្វូននេះក៏មានភ្ជាប់ជាមួយនឹងភ្លើង LED ភ្លោះផងដែរ។ ស្មាតហ្វូននេះមានកាមេរ៉ាគោលទំហំ 48-megapixel main sensor និង 5-megapixel secondary sensor ។ សម្រាប់សេនស័រ Samsung ISOCELL Bright GM1 sensor ដែលប្រើប្រាស់នៅលើស្មាតហ្វូន Redmi Note 7 ក៏នឹងក្លាយជា Primary Lens នៅលើស្មាតហ្វូននេះផងដែរ។
មានពាក្យចចាមអារ៉ាមជាច្រើនអំពីស្មាតហ្វូនស៊េរីថ្មី Meizu Note 9 នេះ ដែលបានអះអាងថា ស្មាតហ្វូននេះ នឹងមានតម្លៃ 999 Yuan (~$149) ហើយវាក៏អាចក្លាយជាគូប្រកួតប្រជែងជាមួយនឹងស្មាតហ្វូន Redmi Note 7 ផងដែរ។ យ៉ាងណាមិញ វាក៏ដល់ពេលដែលក្រុមហ៊ុន Redmi នឹងប្រកាសបង្ហាញស្មាតហ្វូន Redmi Note 7 Pro ដែលនឹងបំពាក់នូវបច្ចេកវិទ្យាស្កេនក្រយ៉ៅដៃក្រោមអេក្រង់ បន្ទះឈីប Snapdragon 675 កាមេរ៉ា 48-megapixel Sony IMX586 primary sensor រ៉េមទំហំ 6GB និងម៉េមូរីក្នុងម៉ាស៊ីនទំហំ 128GB ផងដែរ៕