បន្ទាប់ពីការបង្ហាញវត្តមានរបស់ស្មាតហ្វូន Galaxy M10 និង Galaxy M20 ស្ថិតនៅក្នុងត្រកូល Galaxy M ស៊េរីថ្មីរួចហើយនោះ ឥឡូវនេះ ក្រុមហ៊ុន Samsung ត្រូវបានគេកំណត់ថា នឹងបញ្ចេញនូវស្មាតហ្វូនទី 3 របស់ខ្លួននៅក្នុងស៊េរីត្រកូល Galaxy M នេះ នោះគឺ Samsung Galaxy M30។ ស្របពេលដែលមានរបាយការណ៍ជាច្រើនអំពីស្មាតហ្វូននេះ ក៏មានការទម្លាយនូវព័ត៌មានទាក់ទងនឹងស្មាតហ្វូននេះ ជាច្រើនផងដែរ ប៉ុន្តែកាលបរិច្ឆេទនៃការបង្ហាញវត្តមានរបស់ស្មាតហ្វូននេះ មិនត្រូវគេដឹងនៅឡើយទេរហូតមកដល់ឥឡូវនេះ។
ក្រុមហ៊ុនបច្ចេកវិទ្យាយក្ស ដែលមានមូលដ្ឋាននៅក្នុងប្រទេសកូរ៉េខាងត្បូង ឥឡូវនេះ បានបញ្ជាក់ពីកាលបរិច្ឆេទនៃការប្រកាសបង្ហាញវត្តមានរបស់ស្មាតហ្វូនស៊េរីថ្មី Samsung Galaxy M30 នៅក្នុងប្រទេសឥណ្ឌាតាមរយៈសារបង្ហោះមួយនៅលើគណនី Twitter ផ្លូវការរបស់ខ្លួន។ ក្រុមហ៊ុននេះ បានបង្ហាញថា ស្មាតហ្វូននេះ នឹងបង្ហាញវត្តមាននៅថ្ងៃទី 27 ខែកុម្ភៈខាងមុខនេះ វេលាម៉ោង 6 PM IST។ លើសពីនេះទៅទៀត ក្រុមហ៊ុនបច្ចេកវិទ្យានេះ បានលើកឡើងថា ស្មាតហ្វូននេះ នឹងអាចរកទិញបានតែនៅលើទីផ្សារអនឡាញក្រុមហ៊ុន Amazon របស់ប្រទេសឥណ្ឌា តែប៉ុណ្ណោះសម្រាប់ការដាក់លក់ដំបូងនេះ។ ស្របពេលដែលកាលបរិច្ឆេទនៃការដាក់លក់នៅមិនទាន់ដឹងនៅឡើយទេនោះ ត្រូវបានគេរំពឹងថា នឹងដាក់លក់នៅសប្តាហ៍ទី 1 ក្នុងខែមីនាខាងមុខនេះ។
ការបង្ហោះសារពីក្រុមហ៊ុន Samsung នៅក្នុងប្រទេសឥណ្ឌា បានទាក់ទងទៅនឹងស្មាតហ្វូនស៊េរីថ្មី Galaxy M30 លើកឡើងអំពី "ថាមពល 3X" ដែលទំនងជាសំដៅទៅលើការពិតដែលថា ស្មាតហ្វូននេះ នឹងភ្ជាប់មកជាមួយនឹងកាមេរ៉ាខាងក្រោយចំនួន 3 គ្រាប់។ ស្មាតហ្វូនថ្មីនេះក៏ទទួលវិញ្ញាបនបត្រពីFCC រួចហើយផងដែរ។ ស្មាតហ្វូនស៊េរីថ្មី Samsung Galaxy M30 ត្រូវបានគេរំពឹងថា នឹងមានអេក្រង់ទំហំ 6.38 អ៊ីង ប្រភេទ Super AMOLED Infinity-V ជាមួយនឹងការគាំទ្រទ្រង់កម្រិតភាពច្បាស់ Full HD+ (2220x1080 ភិចសែល)។ ស្មាតហ្វូននេះមានស៊ុមព័ទ្ធអេក្រង់ស្តើងមែនទែន ហើយវាបំពាក់កាមេរ៉ាមុខរាងអក្សរ V ស្ថិតនៅផ្នែកខាងលើនៃអេក្រង់របស់ស្មាតហ្វូននេះ។ ដូចគ្នាទៅនឹងស្មាតហ្វូន Galaxy M20 ដែរ ស្មាតហ្វូនេះនឹងបំពាក់ដោយបន្ទះឈីប Exynos 7904 របស់ក្រុមហ៊ុននេះ។
នៅក្នុងប្រទេសឥណ្ឌា ស្មាតហ្វូននេះនឹងមានរ៉េមទំហំ 4GB និងម៉េមូរីក្នុងម៉ាស៊ីនទំហំ 64GB ។ ស្មាតហ្វូននេះ អាចជម្រើសមួយទៀត ដែលមានរ៉េមទំហំ 6GB និងម៉េមូរីក្នុងម៉ាស៊ីនទំហំ 128GB ផងដែរ។ បើនិយាយអំពីប្រព័ន្ធកាមេរ៉ាវិញនោះ ស្មាតហ្វូននេះភ្ជាប់មកជាមួយកាមេរ៉ាខាងមុខទំហំ 16 មេហ្គាភិចសែលរួមជាមួយបច្ចេកវិទ្យាស្កេនមុខដោះសោរផងដែរ។ នៅផ្នែកខាងក្រោយរបស់ស្មាតហ្វូននេះ មានភ្ជាប់ជាមួយនឹងកាមេរ៉ា 13MP និង 5MP ចំនួន 2 គ្រាប់ទៀតរួមជាមួយភ្លើង LED flash ថែមទៀតផង។ ស្មាតហ្វូននេះ នឹងមានភ្ជាប់ជាមួយ Dual SIM, 4G VoLTE dual-band Wi-Fi a/b/g/n/ac, Wi-Fi Direct, Bluetooth, USB Type-C port និងរន្ធដោតកាសស្តាប់ 3.5mm headphone jack ថែមទៀត។ ស្មាតហ្វូននេះ នឹងដំណើរការនូវប្រព័ន្ធប្រតិបត្តិការ Android 9 Pie និងថាមពលថ្មទំហំ 5000 mAh៕
