កាលពីម្សិលមិញនេះ មានរបាយការណ៍ថ្មីមួយ បានអះអាងថា ក្រោយពេលដែល ក្រុមហ៊ុន Samsung បង្ហាញស្មាតហ្វូនស៊េរីថ្មី Galaxy A10, Galaxy 20 និង Galaxy A30 នៅត្រីមាសទី 1 ក្នុងឆ្នាំ 2019 នេះហើយ ក្រុមហ៊ុននេះ នឹងបង្ហាញចេញនូវស្មាតហ្វូន Galaxy A50 នៅត្រីមាសទី 2 ឆ្នាំនេះផងដែរ។ គួរបញ្ជាក់ថា កាលសប្តាហ៍មុននេះ ស្មាតហ្វូន Galaxy A50 ត្រូវបានគេបង្ហាញនូវលក្ខណៈពិសេសទាំងអស់ផងដែរ។ នៅក្នុងនោះ ក៏មានការចែករំលែកអំពីរូបភាព Renders របស់ស្មាតហ្វូន Galaxy A50 ដោយបង្ហាញពីការរចនារូបរាងពិតៗថែមទៀតផង។
គួរបញ្ជាក់ថា នៅក្នុងរូបភាពច្បាស់មួយនេះ គឺបានបង្ហាញថា ស្មាតហ្វូន Galaxy A50 នឹងមានអេក្រង់ប្រភេទ Infinity-U ទំហំ 6.4 អ៊ីញ។ ដោយសារតែស្មាតហ្វូននេះ នឹងបំពាក់ជាមួយប្រព័ន្ធស្កេនក្រយ៉ៅដៃក្រោមអេក្រង់នោះ ស្មាតហ្វូននេះ នឹងបំពាក់នូវអេក្រង់ OLED panel។ សម្រាប់ Notch ស្ថិតនៅផ្នែកខាងមុខរបស់ស្មាតហ្វូននេះនឹងភ្ជាប់កាមេរ៉ា Selfie ទំហំ 25 មេហ្គាភិចសែល។ ស្មាតហ្វូន Galaxy A50 មានវិមាត្រ 158.5 x 74.5 មីលីម៉ែត្រ។ សូមជំរាបថា យោងរបាយការណ៍មុននេះ បានបង្ហាញថា ស្មាតហ្វូននេះ នឹងភ្ជាប់ជាមួយនឹងកាមេរ៉ាបញ្ឈរចំនួន 3 គ្រាប់ដែលមានទំហំ 25MP+5MP+8MP។ នៅក្រោមកាមេរ៉ា 3 គ្រាប់នេះគឺមានភ្លើង LED flash មួយគ្រាប់។ រីឯគែមខាងក្រោមរបស់ស្មាតហ្វូននេះ គឺមានរន្ធដោត 3.5mm audio jack, រន្ធ USB-C និង Speaker បំពងសំលេងខាងក្រៅផងដែរ។
អេក្រង់ប្រភេទ AMOLED ទំហំ 6.4 អ៊ីញរបស់ស្មាតហ្វូននេះ ត្រូវបានគេរំពឹងថា នឹងមានគុណភាពបង្ហាញកម្រិត Full HD + 1080x2340 ភិចសែល ជាមួយនឹងសមាមាត្រអេក្រង់ aspect ratio 19:5: 9។ ស្មាតហ្វូននេះ អាចជាស្មាតហ្វូនដំបូងបំផុតដែលប្រើប្រាស់បន្ទះឈីប Exynos 9610 របស់ក្រុមហ៊ុន Samsung។ ស្មាតហ្វូនស៊េរីថ្មីនេះ ប្រហែលជាមានពីរម៉ូដែលគឺទំហំ 4GB+64GB និង 6GB+128GB។ ស្មាតហ្វូននេះ ក៏មានរន្ធដោតម៉េមូរីបន្ថែម microSD Card ផងដែរ។ ស្មាតហ្វូននេះ បំពាក់ថាមពលថ្មទំហំ 4000mAh ដែលទ្រទ្រង់នូវបច្ចេកវិទ្យា 15W fast charge ថែមទៀតផង។ Galaxy A50 ត្រូវបានគេរំពឹងថានឹងភ្ជាប់ជាមួយប្រព័ន្ធប្រតិបត្តិការ Android 9 Pie OS ហើយនៅពេលដែលវាចេញលក់នៅលើទីផ្សារគឺមានពណ៌ខៀវ ពណ៌ស និងពណ៌ខ្មៅ។ នៅពេលនេះ Samsung កំពុងធ្វើការនៅលើស្មាតហ្វូនថ្នាក់ខ្ពស់នៃត្រកូល Galaxy A ដូចជា Galaxy A70 និង Galaxy A90 ផងដែរ។ ស្មាតហ្វូនស៊េរីថ្មីទាំងនេះ នឹងបង្ហាញខ្លួននៅចុងឆ្នាំនេះហើយ ៕