ក្រុមហ៊ុនផលិតរថយន្ត Hyundai ទំនងជាមិនមានវត្តមាននៅក្នុងព្រឹត្តិការណ៍ពិពរណ៍រថយន្ត Geneva Motor Show នៅក្នុងឆ្នាំនេះទេប៉ុន្តែនេះមិនមែនមានន័យ ថា រឿងនេះ អាចបញ្ឈប់ក្រុមហ៊ុនផលិតរថយន្តរបស់ប្រទេសកូរ៉េខាងត្បូងនេះ នៅក្នុងការបង្ហាញនូវរថយន្តម៉ូដែលថ្មីនោះទេ។ មុនព្រឹត្តិការណ៍ពិពរណ៍ New York Auto Show នៅខែក្រោយនេះ ក្រុមហ៊ុន Hyundai ក៏ត្រៀមខ្លួនក្នុងការប្រកាសចេញញនូវរថយន្តស៊េរីថ្មី Sonata 2020 របស់ខ្លួនផងដែរ។ ជាមួយនឹងរថយន្តដែលមានរូបរាងយ៉ាងល្អឥតខ្ចោះនោះ នេះគឺជារថយន្ត Coupe ទ្វារ 4 ដែលពិតជាស្រស់ស្អាតកាលីបទាន់សម័យមែនទែន!
រថយន្តស៊េរីថ្មី Sonata 2020 នេះ គឺមានការបំផុសគំនិតចេញពីគំនិតនៃរថយន្ត Le Fil Rouge ដែលបង្ហាញខ្លួននៅក្នុងព្រឹត្តិការណ៍ពិពរណ៍ Geneva Motor Show 2018 ហើយនេះ គឺជារថយន្តដំបូងបំផុតដែលធ្វើការផលិតជាមួយនឹងតួខ្លួនស្ព័រ Sensuous Sportiness របស់ក្រុមហ៊ុន Hyundai។ រថយន្តស៊េរីថ្មី Hyundai Sonata 2020 នេះមានរូបរាងស្ព័រជាងរថយន្តជំនាន់មុនរបស់ខ្លួន។
សម្រាប់តួខ្លួនរបស់វាគឺវែងជាងមុនដល់ទៅ 1.3 inches ខណៈពេលដែលប្រវែងនៃរថយន្តនេះគឺវែងជាងមុនដល់ទៅ 1.7 inches។ ក្រឡេកទៅមើលផ្នែកខាងមុខរបស់រថយន្តនេះ ភ្លើងមុខរបស់រថយន្តស៊េរីថ្មី 2020 Sonata នេះគឺជាអំពូលប្រភេទ Hidden Lighting Lamps ដែលបំពាក់នៅលើរថយន្ត HDC-2 ដែលបង្ហាញវត្តមានដំបូងបំផុតនៅក្នុងព្រឹត្តិការណ៍ពិពរណ៍ Busan Motor Show កាលពីឆ្នាំមុននេះ។
រថយន្តនេះជាប្រភេទ Sedan ដែលពិតជាទាក់ទាញខ្លាំងមែនទែន! បើក្រឡេកមើលផ្នែកខាងក្នុងរបស់រថយន្តនេះគឺមានការផ្លាស់ប្តូរកាន់តែអស្ចារ្យ។ ផ្នែកខាងក្នុងរបស់រថយន្តនេះកាន់តែមានភាពទូលាយ និងស្រស់ស្អាត។ ក្រុមហ៊ុន Hyundai និយាយថា ខ្លួនមិនមែនជាអ្នកដែលចាប់អារម្មណ៍ខ្លាំងក្នុងការប្រើប្រាស់នូវអេក្រង់ទំហំធំបំពាក់នៅក្នុងរថយន្តប្រណិតនោះទេ។ ជាលទ្ធផល ក្រុមហ៊ុនផលិតរថយន្ត Hyundai គឺធ្វើការបញ្ចូលគ្នានៃប្រព័ន្ធ infotainment និងអេក្រង់ center-gauge cluster displays បញ្ចូលគ្នាដោយប្រើប្រាស់នូវ S curve តែមួយគត់។
នៅមិនទាន់មានព័ត៌មានដែលបញ្ជាក់អំពីម៉ាស៊ីនរបស់រថយន្តនេះនៅឡើយទេ ប៉ុន្តែយើងអាចនឹងឃើញនូវព័ត៌មានថ្មីជាច្រើនបន្ថែមទៀតនៅពេលដែលរថយន្ត Sedan ដែលមានការរចនារូបរាងថ្មីនេះបង្ហាញខ្លួននៅក្នុងព្រឹត្តិការណ៍ពិពរណ៍ New York Auto Show 2019 នៅខាងក្រោយនេះ។ សម្រាប់ការលក់រថយន្តស៊េរីថ្មី Sonata 2020 នឹងចាប់ផ្តើមនៅជុំវិញពិភពលោកនៅក្នុងឆមាសទី 2 នៅឆ្នាំនេះ៕