របាយការណ៍ថ្ងៃនេះ បានបញ្ជាក់ថា Apple នឹងរៀបចំនូវព្រឹត្តិការណ៍មួយរបស់ខ្លួននៅថ្ងៃទី 25 ខែមីនានេះ ដែលខ្លួននឹងប្រកាសនូវព័ត៌មានលម្អិតនៃសេវាកម្មថ្មីរបស់ខ្លួនគឺ Video-Streaming និងសេវាកម្មព័ត៌មា Subscription News ។ នៅក្នុងការអញ្ជើញរបស់ក្រុមហ៊ុន Apple នេះ គឺបញ្ជូនកាលពីថ្ងៃច័ន្ទ ប៉ុន្តែនៅមិនទាន់មានការបញ្ជាក់អំពីព័ត៌មានលម្អិតណាមួយអំពីខ្លឹមសារនៃព្រឹត្តិការណ៍នេះនៅឡើយទេ ប៉ុន្តែក៏មានការបង្ហាញនូវខ្សែភាពយន្តដែលមានការរាប់ថយក្រោយ ហើយនេះ ពិតជាធ្វើអោយមានការសង្ស័យថាក្រុមហ៊ុនបច្ចេកវិទ្យានេះអាចនឹងប្រកាសបង្ហាញនូវសេវាកម្មវីដេអូ Video ជាក់ជាមិនខាន។
ព្រឹត្តិការណ៍នេះនឹងចាប់ផ្តើមនៅវេលាម៉ោង 10 a.m. PT នៅក្នុងរោងមហោស្រព Steve Jobs Theater ដែលស្ថិតនៅក្នុងបរិវេណ Apple Park នៅក្នុងទីក្រុង Cupertino រដ្ឋកាលីហ្វញ៉ែរ។ ក្រុមហ៊ុន Bloomberg បានពណ៌នាថា សេវាកម្ម video-streaming service នេះគឺសម្រាប់ការប្រកួតប្រជែងជាមួយនឹងសេវាកម្ម Netflix និងAmazon Prime ដែលអនុញ្ញាតឱ្យអ្នកប្រើប្រាស់ចូលទៅកាន់កម្មវិធីជាច្រើនរបស់ក្រុមហ៊ុន Apple ហើយវាគ្រោងនឹងដាក់អោយដំណើរការនៅក្នុងរដូវក្តៅនេះ។ ក្រុមហ៊ុនបច្ចេកវិទ្យាApple ត្រូវគេនិយាយថា ខ្លួននឹងអញ្ជើញមនុស្សល្បីៗជាច្រើនដូចជា Jennifer Aniston និង Reese Witherspoon សម្រាប់ព្រឹត្តិការណ៍នៅថ្ងៃទី 25 ខែមីនានេះ។
ក្រុមហ៊ុន Apple ក៏មានគម្រោងក្នុងការប្រកាសបង្ហាញនូវសេវាកម្មព័ត៌មានថ្មីមួយទៀតរបស់ខ្លួននៅក្នុងព្រឹត្តិការណ៍នេះផងដែរ។ BuzzFeed News បានរាយការណ៍កាលពីខែមុននេះថា បន្ទាប់ពីរបាយការណ៍របស់កាសែត Wall Street Journal ដែលរាយការណ៍ថា ក្រុមហ៊ុនបច្ចេកវិទ្យានេះ បានធ្វើការចរចារជាមួយនឹងអ្នកបោះពុម្ពជាច្រើនដែលអនុញ្ញាតឱ្យពួកគេទទួលនូវប្រាក់ពាក់កណ្តាលនៃប្រាក់ចំណេញសម្រាប់សេវាកម្ម Subscriptions មួយនេះ។
ការបោះជំហាននេះ គឺដូចជាអ្វីដែលបានបង្ហាញអំពីកិច្ចខិតខំរបស់ក្រុមហ៊ុន Apple ក្នុងការបង្កើនទៅលើអាជីវកម្មនៃសេវាកម្មរបស់ខ្លួនខណៈពេលដែលការលក់ iPhones នៅមានសភាពយឺតយ៉ាវនោះ។ ក្រុមហ៊ុននេះ បាននិយាយនៅក្នុងរបាយការណ៍នៃប្រាក់ចំណេញចុងក្រោយរបស់ខ្លួនថា ការលក់ iPhones សម្រាប់ត្រីមាសនៃថ្ងៃឈប់សម្រាកលំហែរកាយនោះ គឺមានការធ្លាក់ចុះ 15% បើធៀបជាមួយនឹងត្រីមាសដូចគ្នាកាលពីឆ្នាំមុននេះ ស្របពេលដែលអាជីវកម្មនៃសេវាកម្មជាច្រើនរបស់ក្រុមហ៊ុននេះ គឺមានការកើនឡើងខ្ពស់ដល់ទៅទឹកប្រាក់ 10.9 ពាន់លានដុល្លារអាមេរិក៕
