ក្រុមហ៊ុន Samsung អាចនឹងប្រឈមមុខជាមួយនឹងការប្រកួតប្រជែងដ៏ខ្លាំងក្លាមួយចំនួននៅក្នុងអាជីវកម្មបន្ទះអេក្រង់ OLED។ ដោយយោងតាមរបាយការណ៍ថ្មីមួយបានបង្ហាញថាក្រុមហ៊ុនផលិតបន្ទះអេក្រង់ក្នុងប្រភេទចិនដែលមានឈ្មោះថា “BoE” បាននឹងកំពុងធ្វើបច្ចុប្បន្នភាពលើបន្ទាត់ចង្វាក់ផលិតកម្មរបស់ខ្លួននៅក្នុងរោងចក្រនាខេត្តស៊ីឈួនដើម្បីអនុញ្ញាតឱ្យបន្ទះអេក្រង់ OLED មានប្រសិទ្ធភាពខ្ពស់អាចទទួលយកបានជាមួយការបញ្ចូលនូវញាណដែលធ្វើអោយការសំគាល់ប៉ះកាន់តែមានភាពរលូនបំផុត។
ក្រុមហ៊ុន BOE បច្ចុប្បន្នបានចក់ដំណែកពីក្រុមហ៊ុន LG Display នៅក្នុងឧស្សាហកម្មបន្ទះអេក្រង់ LCD ហើយក្រុមហ៊ុនចិនមួយនេះគឺជាក្រុមហ៊ុនសំខាន់មួយក្នុងការផ្គត់ផ្គង់បន្ទះអេក្រង់ទៅអោយក្រុមហ៊ុន Huawei ក្នុងប្រទេសចិនថែមទៀតផង។ ជាបន្តទៅទៀតនេះក្រុមហ៊ុន BOE ត្រូវបានគេដឹងថាបាននឹងកំពុងសិក្សាលើគម្រោងផលិតកម្មបន្ទះអេក្រង់ថ្មីរបស់ខ្លួន ហើយបើតាមប្រភពបានចង្អុលបង្ហាញថាការផលិតបន្ទះអេក្រង់ OLED ថ្មីរបស់ BOE នឹងកើតឡើងក្នុងពេលឆាប់ៗនេះក្នុងទ្រង់ទ្រាយធំថែមទៀតផង។
កន្លងមកក្រុមហ៊ុន BOE បានផលិតបន្ទះអេក្រង់សម្រាប់ប្រើនៅលើម៉ាស៊ីនកុំព្យូទ័រ MacBook និង iPad រួចហើយ ដូច្នេះវាពិតជាអាចទៅរួចដែលក្រុមហ៊ុនផលិតបន្ទះអេក្រង់របស់ចិនមួយនេះបន្តចាប់ដៃសហការជាមួយ Apple ក្នុងការផ្គត់ផ្គងបន្ថែមទៀតសម្រាប់អេក្រង់ iPhone ជំនាន់ក្រោយ។ ហើយការផ្លាស់ប្តូរដៃគូផ្គត់ផ្គង់បន្ទះអេក្រង់ OLED នេះត្រូវបានគេមើលឃើញថាអាចនឹងផ្តល់នូវផលចំណេញច្រើនដល់ក្រុមហ៊ុន Apple ក្នុងការចំនាយលើបន្ទះអេក្រង់ OLED ដែលខ្លួនបានទិញពីក្រុមហ៊ុន Samsung។
បើយោងតាមរបាយការណ៍របស់ Sigmaintell Consulting បានអោយដឹងថាពេញមួយឆ្នាំ 2018 ក្រុមហ៊ុន BOE បាននាំចេញបន្ទះអេក្រង់ LCD TV panels បានចំនួន 54.3 លានបន្ទះ និង LCD Monitor panels បានចំនួន 37.3 លានបន្ទះ ខណះដែលក្រុមហ៊ុន LG បាននាំចេញចំនួន 48.6 លានបន្ទះសម្រាប់ LCD TV panels និង 34.5 លានបន្ទះសម្រាប់អេក្រង់ LCD Monitor panels៕
