កាលពីថ្ងៃទី 14 ខែមីនានេះ ក្រុមហ៊ុនបច្ចេកវិទ្យាអេឡិចត្រូនិចយក្ស Samsung Electronics បាននិយាយ ខ្លួននឹងចាប់ផ្តើមធ្វើការផលិតទ្រង់ទ្រាយធំទៅលើបន្ទះឈីបកម្រិតខ្ពស់ DRAMសម្រាប់ទូរស័ព្ទដៃដែលមានសមត្ថភាពខ្ពស់បំផុតសម្រាប់ប្រើប្រាស់នៅលើស្មាតហ្វូនប្រណិតៗជាច្រើ នដូចជាស្មាតហ្វូនដែលមានអេក្រង់បត់បានជាដើម។
បន្ទះឈីបថ្មី 12 gigabyte DRAM របស់ក្រុមហ៊ុននេះ គឺមានសមត្ថភាពខ្ពស់ជាងមុនដល់ទៅ 1.5 ដងបើធៀបជាមួយនឹងបន្ទះឈីប 8GB ដែលប្រើប្រាស់នៅលើកុំព្យូទ័រ ultra-thin laptops នៅក្នុងទីផ្សារ។ វាប្រើប្រាស់នូវបន្ទះឈីប 16 gigabit DRAM ចំនួន 6 នៅខាងក្នុងផ្អែកទៅលើបច្ចេកវិទ្យា 10-nanometer chip fabrication technologyរបស់ក្រុមហ៊ុនបច្ចេកវិទ្យានេះ។
សមត្ថភាពខ្ពស់នៃបន្ទះឈីបសម្រាប់ប្រើប្រាស់នៅលើស្មាតហ្វូនទាំងនេះគឺពិតជាមានសារៈសំខាន់មែនទែនជាមួយនឹងការកើនឡើងនៃបច្ចេកវិទ្យាថ្មីៗនៅលើស្មាតហ្វូនរួមមានបច្ចេកវិទ្យា AI អេក្រង់ធំជាមួយនឹងកម្រិតភាពច្បាស់ខ្ពស់ជាងមុន កាមេរ៉ាច្រើនរួមទាំងការប្រើប្រាស់ជាមួយនឹងបច្ចេកវិទ្យា 5G Network Service ថែមទៀត។ រ៉េម 12GB នេះ នឹងដំណើរការដំបូងបំផុតនៅលើស្មាតហ្វូនដែលមានអេក្រង់ដែលអាចបត់បាន Galaxy Fold របស់ក្រុមហ៊ុន Samsung ដែលនឹងឈានជើងចូលទៅក្នុងទីផ្សារនៅដើមខែមេសាខាងមុខនេះ។
បន្ទះឈីបនេះនឹងធ្វើការផ្គត់ផ្គង់ទៅកាន់ក្រុមហ៊ុនផលិតស្មាតហ្វូនជាច្រើនទៀតផងដែរ ប៉ុន្តែក្រុមហ៊ុនបច្ចេកវិទ្យា Samsung នៅមិនទាន់ទម្លាយអំពីដៃគូសក្តានុពលរបស់ខ្លួនសម្រាប់ផលិតផលថ្មីនេះនៅឡើយទេ។ ល្បឿននៃការបញ្ជូនទិន្នន័យរបស់ម៉េមូរីឈីបថ្មីនេះគឺដល់ទៅ 34.1GB ក្នុងមួយវិនាទី។ វាមានទំហំតូចត្រឹមតែកម្រាស់ 1.1mm ដែលធ្វើអោយស្មាតហ្វូនទាំងនេះមានកម្រាស់ស្តើងជាងមុន និងស្រាលជាងមុនថែមទៀត នេះបើតាមការបញ្ជាក់របស់ក្រុមហ៊ុនបច្ចេកវិទ្យាទាំងនេះ។
លោក Chun Se-won អនុប្រធានអគ្គនាយករបស់ក្រុមហ៊ុន Samsung Electronics បាននិយាយថា “ជាមួយនឹងការផលិតទ្រង់ទ្រាយធំទៅលើឈីប 12GB នេះ ក្រុមហ៊ុន Samsung គឺមានការផ្តល់នូវម៉េមូរីកម្រិតខ្ពស់សម្រាប់ប្រើប្រាស់ទៅលើស្មាតហ្វូនជំនាន់ថ្មីទាំងនេះ ចាប់ពីទំហំ 12GB និង 512GB eUFS 3.0 storage។ យើងកំពុងតែពង្រឹងទៅលើជំហររបស់យើងនៅក្នុងនាមជាក្រុមហ៊ុនផលិតម៉េមូរីស្មាតហ្វូនកម្រិតខ្ពស់ ដែលល្អបំផុត ដើម្បីបំពេញនូវតម្រូវការនៃការកើនឡើងយ៉ាងឆាប់រហ័សរបស់ក្រុមហ៊ុនផលិតស្មាតហ្វូនជាច្រើននៅលើពិភពលោក៕”
