នៅក្នុងរយៈពេលប៉ុន្មានឆ្នាំចុងក្រោយនេះ ក្រុមហ៊ុន Samsung បានស្ថិតនៅក្រោមសម្ពាធដ៏ខ្លាំងក្លា នៅក្នុងទីផ្សារស្មាតហ្វូនប្រទេសចិន ដែលមានចំណែកទីផ្សារចំនួនតិចជាង 1 ភាគរយ ស្របពេលដែលក្រុមហ៊ុននេះ ធ្លាប់មាន 20 ភាគរយ នៅឆ្នាំ 2013 កន្លងទៅ។ ដៃគូប្រកួតប្រជែងក្នុងស្រុក ដូចជាក្រុមហ៊ុន Huawei និងក្រុមហ៊ុន Xiaomi បានផ្តល់ឱ្យ Samsung នូវពេលវេលាដ៏លំបាក នៅក្នុងទីផ្សារដែលរកកម្រៃបាន។ ទោះជាយ៉ាងណាក៏ដោយ ឥឡូវនេះ ក្រុមហ៊ុន Samsung មានអារម្មណ៍ថា ខ្លួនមានឱកាសល្អ នៅក្នុងការទទួលបានចំណែកទីផ្សារ ដែលបាត់ខ្លះត្រឡប់មកវិញ។
នៅពេលថ្មីៗនេះ Galaxy S10 ដែលជាស៊េរីស្មាតហ្វូនចុងក្រោយបំផុតរបស់ក្រុមហ៊ុន Samsung ទទួលបានលទ្ធផលយ៉ាងល្អ សម្រាប់ការលក់នៅក្នុងប្រទេសចិន ដោយបានផ្តល់ទំនុកចិត្តដល់ក្រុមហ៊ុន ដើម្បីនិយាយថា ស្មាតហ្វូននេះ នឹងជួយឱ្យក្រុមហ៊ុន Samsung ទទួលបានចំណែកទីផ្សារ ដែលបាត់បង់នៅក្នុងប្រទេសនេះត្រឡប់មកវិញ។ ក្រុមហ៊ុន Samsung បានយកជំហានសំខាន់ៗមួយចំនួន ដើម្បីកែលម្អអាជីវកម្មស្មាតហ្វូនរបស់ខ្លួន នៅក្នុងប្រទេសចិន។ ក្រុមហ៊ុននេះ បានសុំទោសចំពោះការដំណើរការមិនល្អរបស់ខ្លួន នៅក្នុងប្រទេសចិន និងបានធ្វើឱ្យមានការផ្លាស់ប្តូរផ្នែកសំខាន់ៗ មួយចំនួនផងដែរ។ ក្នុងនោះក៏មានប្រតិបត្តិការមួយចំនួនត្រូវបានសម្រួល ហើយក៏មានការផ្លាស់ប្តូរអ្នកគ្រប់គ្រងនៅក្នុងតំបន់ទៀតផង។
យុទ្ធសាស្រ្តរបស់ក្រុមហ៊ុន សម្រាប់ប្រទេសចិន ឥឡូវនេះ ពាក់ព័ន្ធនឹងការផ្តោតទៅលើអតិថិជន ដែលមានឆន្ទៈចំណាយច្រើន លើផលិតផលល្អៗ របស់ខ្លួន។ ក្រុមហ៊ុននេះ ក៏បានសហការជាមួយអ្នកផ្តល់សេវាកម្មក្នុងស្រុក ដូចជាក្រុមហ៊ុន Alibaba, WeChat, Baidu និងអ្នកដទៃ ដើម្បីផ្តល់ជូននូវលក្ខណៈពិសេស នៃបញ្ញ៉ាសិប្បនិម្មិត AI និងសេវាកម្ម IoT ។ ក្រុមហ៊ុន Samsung ក៏បានណែនាំបច្ចេកវិទ្យាថ្មីមួយចំនួន នៅក្នុងប្រទេសចិនជាមុនសិន។ ស្មាតហ្វូន Galaxy A8s គឺជាស្មាតហ្វូនដំបូង ដែលមានអេក្រង់ Infinity-O ។ មិនតែប៉ុណ្ណោះ ស្មាតហ្វូននេះ ត្រូវបានគេដាក់បង្ហាញ នៅក្នុងប្រទេសចិន វាក៏ត្រូវបានគេដាក់ចេញលក់ជាលើកដំបូងផងដែរ។
ប្រធានផ្នែកទូរស័ព្ទចល័ត លោក DJ Koh បាននិយាយនៅក្នុងកិច្ចប្រជុំទូទៅប្រចាំឆ្នាំ របស់ក្រុមហ៊ុនថា " Samsung មានភាពរឹងមាំនៅក្នុងប្រទេសចិន ក្នុងរយៈពេលពីរឆ្នាំចុងក្រោយនេះ។ យើងបានផ្លាស់ប្តូរអ្វីៗគ្រប់យ៉ាង ពីអង្គការ និងប្រជាជនរបស់យើង ទៅតាមបណ្តាញចែកចាយ»។ លោកបានបន្ថែមថា លោកមានសុទិដ្ឋិនិយម ចំពោះគំរូស្មាតហ្វូន និងតម្លៃពាក់កណ្តាល នឹងនាំមកនូវការផ្លាស់ប្តូរ សម្រាប់សំណាងរបស់ក្រុមហ៊ុន នៅក្នុងប្រទេសចិន៕
