ស្មាតហ្វូនស៊េរីថ្មី OPPO Reno នឹងបង្ហាញខ្លួននៅក្នុងប្រទេសចិននៅថ្ងៃទី 10 ខែមេសាខាងមុខនេះ ប៉ុន្តែរបាយការណ៍ថ្មីមួយទៀត បានទម្លាយថា ស្មាតហ្វូននេះ ក៏នឹងបង្ហាញខ្លួនសម្រាប់ទីផ្សារអន្តរជាតិផងដែរ នៅក្នុងរយៈពេលប៉ុន្មានសប្តាហ៍ក្រោយនេះ។ ក្រុមហ៊ុន OPPO ត្រូវបានគេនិយាយថា គឺបានផ្ញើនូវលិខិតអញ្ជើញសម្រាប់ព្រឹត្តិការណ៍មួយរបស់ខ្លួននៅក្នុងទីក្រុង Zurich ប្រទេសស្វីសនៅថ្ងៃទី 24 ខែមេសាខាងមុខនេះ គឺជាទីកន្លែងដែលក្រុមហ៊ុននឹងបង្ហាញនូវស្មាតហ្វូន OPPO Reno។ សម្រាប់ Version ដែលបង្ហាញខ្លួននៅក្នុងទីផ្សារអ៊ឺរ៉ុបនឹងបំពាក់នូវប្រព័ន្ធកាមេរ៉ា 3 គ្រាប់ជាមួយនឹងបច្ចេកវិទ្យា 10x zoom និង 5G ផងដែរ។
កាមេរ៉ាគោលរបស់ស្មតហ្វូន OPPO Reno គឺមានទំហំដល់ទៅ 48MP Sony IMX586 sensor ហើយវាក៏មានកាមេរ៉ាទី ២ ទំហំ 8MP super wide-angle និងកាមេរ៉ាទី ៣ គឺ periscope lens 13MP sensor ។ ស្មាតហ្វូននេះប្រើប្រាស់នូវបន្ទះឈីប Snapdragon 855 របស់ក្រុមហ៊ុន Qualcomm ។ បើនិយាយអំពីការរចនារូបរាងវិញនោះ ស្មាតហ្វូននេះមានអេក្រង់ពេញគែមយ៉ាងស្រស់ស្អាតគ្មាន notch ឬរន្ធប្រហោងនៅលើអេក្រង់នោះទេ។ ក្រុមហ៊ុនបច្ចេកវិទ្យា Oppo ក៏ធ្វើការផ្លាស់ប្តូរប្រើប្រាស់នូវកាមេរ៉ាផុសឡើងដែលត្រូវគេហៅឈ្មោះថា “Sharkfin selfie” នោះ។ សម្រាប់លក្ខណៈពិសេសជាច្រើនទៀតគឺមានដូចជា ColorOS 6 ផ្អែកនៅលើប្រព័ន្ធប្រតិបត្តិការ Android 9 Pie, dual-frequency GPS, និងអេក្រង់ដែលមានទំហំដល់ទៅ 93.1% បើធៀបទៅនឹងតួខ្លួនរបស់វាថែមទៀតផង។ ក្រុមហ៊ុន Oppo នឹងបញ្ចេញនូវជំនាន់មួយទៀតរបស់ស្មាតហ្វូននេះ ដែលប្រើប្រាស់ជាមួយនឹងបន្ទះឈីប Snapdragon 710 ផងដែរ៕
