ថ្ងៃនេះ មានព័តមានថ្មីមួយ បានបញ្ជាក់ថា ក្រុមហ៊ុន Apple នឹងបញ្ចេញនូវទូរស័ព្ទ iPhones ចំនួន 3 ស៊េរីម៉ូដែលទៀតនៅឆ្នាំក្រោយនេះ ហើយទូរស័ព្ទទាំង 3 ស៊េរីនេះ នឹងមានការរចនារូបរាងដូចគ្នាទៅនឹងទូរស័ព្ទ iPhone X។ ឥឡូវនេះ អ្នកវិភាគម្នាក់ បានចេញមកអះអាងថា ទូរស័ព្ទ iPhones ស៊េរីឆ្នាំ 2018 នឹងបំពាក់នូវថាមពលថ្មកាន់តែប្រសើរជាងមុនដោយសារតែការកែលម្អរូបរាងកាន់តែប្រសើរជាងមុននោះ។ គួរបញ្ជាក់ថា ទូរស័ព្ទ iPhone X នាពេលបច្ចុប្បន្ននេះ ប្រើប្រាស់ថាមពលថ្មរូបរាង L (2-CelL) ។ លោក Ming-Chi Kuo អ្នកវិភាគរបស់ក្រុមហ៊ុន KGI Securities បានទស្សន៍ទាយថា ក្រុមហ៊ុន Apple នឹងពង្រឹងទៅលើបច្ចេកវិទ្យាថាមពលថ្មនេះ នៅឆ្នាំក្រោយដើម្បីធ្វើការពង្រឹងនូវទំហំនៃថាមពលថ្មនៅក្នុងទូរស័ព្ទ iPhones OLED ទំហំ 5.8 អ៊ីញ និង 6.5 អ៊ីញនៅក្នុងឆ្នាំ 2018 នេះបើតាមការបញ្ជាក់របស់ 9To5Mac ។
លោក Kuo បាននិយាយទៀតថា ទូរស័ព្ទ iPhone អេក្រង់ 5.8 អ៊ីង អាចនឹងមានថាមពលថ្មចន្លោះពី 2,900mAh និង 3,000mAh។ ទូរស័ព្ទ iPhone X នាពេលបច្ចុប្បន្ននេះ ប្រើប្រាស់ថាមពលថ្មត្រឹមតែ 2,716mAh ប៉ុណ្ណោះ។ ប្រសិនបើការទស្សន៍ទាយរបស់លោក Kuo ជាការពិតនោះ ទូរស័ព្ទ iPhone 2018 អេក្រង់ 5.8 អ៊ីង អាចនឹងមានថាមពលថ្មធំ និងប្រសើរជាងមុនដល់ទៅ 10%។ ជាមួយនឹងការរចនារូបរាងថាមពលថ្មអក្សរ L នេះ គឺបានអនុញ្ញាតឱ្យក្រុមហ៊ុន Apple នាំយកនូវថាមពលថ្មកាន់តែធំជាងថាមពលថ្មរបស់ iPhone 8 Plus។ នេះគឺពិតជាគួរឱ្យភ្ញាក់ផ្អើលមែនទែន ដែលថា iPhone X មានរូបរាងតូចជាង iPhone 8 Plus នោះ។
លោក Kuo ក៏ដូចជាអ្នកវិភាគផ្សេងៗទៀតផងដែរ ដោយបានសន្មត់ថា ក្រុមហ៊ុន Apple នឹងបញ្ចេញនូវទូរស័ព្ទ iPhone ចំនួន 3 ម៉ូដែលនៅឆ្នាំ 2018 ខាងមុខនេះ។ កាលពីមុនលោក បាននិយាយថា ទូរស័ព្ទ iPhones ចំនួន 2 នឹងប្រើប្រាស់អេក្រង់ OLED ដែលមានទំហំ 5.8 អ៊ីង និងទំហំ 6.5 អ៊ីង ស្រប ពេលដែលទូរស័ព្ទ iPhones ម៉ូដែលទី 3 នឹងប្រើប្រាស់អេក្រង់ទំហំ 6.1 អ៊ីង TFT-LCD ។ សម្រាប់ម៉ូដែលអេក្រង់ 6.1 អ៊ីងនេះ នឹងមានឈ្មោះហៅថា “iPhone X Plus” និង iPhone 5.8 អ៊ីង គឺជាជំនាន់បន្ទាប់របស់ iPhone X ។ សម្រាប់ម៉ូដែល iPhones ទាំង 3 ម៉ូដែលនេះ ក៏នឹងមានស៊ុមព័ទ្ធអេក្រង់ស្តើងដូចគ្នាទៅនឹង iPhone X អញ្ចឹងដែរ។
លោក Kuo បាននិយាយទៅកាន់អ្នកវិនិយោគជាច្រើនថា ទូរស័ព្ទ iPhone LCD អេក្រង់ 6.1 អ៊ីង នឹងចាប់ផ្តើមប្រើប្រាស់ថាមពលថ្មរូបរាងដូចគ្នាទៅនឹងថាមពលថ្មរបស់ iPhone 8 និង iPhone 8 Plus។ អ្នកវិភាគរូបនេះ បានអះអាងទៀតថា នេះប្រហែលជាវិធីដ៏ល្អមួយ ដែលក្រុមហ៊ុន Apple អាចកាត់បន្ថយការចំណាយបានខ្លះ ទៅលើការផលិតទូរស័ព្ទនេះ។ ទោះបីជា iPhone 2018 អេក្រង់ 6.1 អ៊ីង នឹងប្រើប្រាស់ថាមពលថ្មដូចគ្នាក្តី លោក Kuo នៅតែនិយាយថា ស្មាតហ្វូនទាំងនេះ នឹងអាចប្រើប្រាស់បានយូរជាងទូរស័ព្ទ iPhone 8 និង iPhone 8 Plus៕
