នៅក្នុងការផ្លាស់ប្តូរស្របទៅតាមទស្សនវិស័យនៅក្នុងឆ្នាំ 2018 Sony ក្រុមហ៊ុនបច្ចេកវិទ្យាដ៏ធំបំផុតរបស់ប្រទសសជប៉ុន បានប្រកាសបង្ហាញនូវគំរូស្មាតហ្វូន Xperia ស៊េរីថ្មីរបស់ខ្លួនចំនួន 2 ម៉ូដែល ដែលសុទ្ធសឹងតែប្រើប្រាស់នូវអេក្រង់ដែលមានស៊ុមព័ទ្ធអេក្រង់ស្តើង ដូចនឹងបណ្តាក្រុមហ៊ុននានា ដែលបានបញ្ចេញនៅក្នុងឆ្នាំ 2017 នេះអញ្ចឹងង។ យោងតាមរបាយការណ៍ដែលបានចេញផ្សាយនាពេលថ្មីៗនេះ បានបញ្ជាក់ថា មួយនៅក្នុងចំណោមស្មាតហ្វូនដែលនឹងបង្ហាញខ្លួននាពេលខាងមុខនេះ អាចជាជំនាន់បន្ទាប់របស់ស្មាតហ្វូន Xperia XZ Premium ។
នៅក្នុងគេហទំព័រ Vortex.ge ក៏បានអះអាងអំពីលក្ខណៈសម្បត្តិមួយចំនួន និងមុខងារសំខាន់សម្រាប់ស្មាតហ្វូនស៊េរីថ្មីនៅក្នុងឆ្នាំ 2018 នេះ របស់ក្រុមហ៊ុន Sony បន្ថែមពីលើព័ត៌មាននៃការរចនារូបរាងរបស់ស្មាតហ្វូននេះផងដែរ។ របាយការណ៍នេះ បានបង្ហាញទៀតថា រូបភាព Renders ដែលយើងឃើញនៅលើអត្ថបទនេះ គឺផ្អែកទៅលើការរចនារូបរាងព្រាងរបស់ក្រុមហ៊ុន Sony ផ្ទាល់តែម្តង។ ស្មាតហ្វូននេះ នឹងមានជ្រុងកោងបន្តិចជាមួយនឹងផ្នែកខាងក្រោយភ្លឺចែងចាំង។ លក្ខណៈពិសេសរបស់ស្មាតហ្វូននេះ គឺប្រើប្រាស់ឧបាល័រភ្លោះនៅផ្នែកខាងមុខ ប្រព័ន្ធកាមេរ៉ាភ្លោះ អេក្រង់កម្រិត 4K (អេក្រង់ទំហំ 5.5 អ៊ីង) រ៉េមទំហំ 6GB ម៉េមូរីក្នុងម៉ាស៊ីនទំហំ 128GB និងបន្ទះឈីប Snapdragon 845។ ស្មាតហ្វូននេះ ក៏ត្រូវគេដឹងថានឹងប្រើប្រាស់ប្រព័ន្ធស្កេនក្រយ៉ៅដៃក្រោមអេក្រង់ដំបូងបំផុតផងដែរ។
សម្រាប់ទូរស័ព្ទ Sony ម៉ូដែលទី 2 នោះ នឹងមានប្រព័ន្ធឧបាល័រខាងមុខភ្លោះ និងប្រព័ន្ធកាមេរ៉ាភ្លោះ ស្របពេលដែលប្រព័ន្ធស្កេនក្រយ៉ៅដៃ គឺស្ថិតនៅផ្នែកខាងក្រោយ។ សម្រាប់លក្ខណៈសម្បត្តិផ្សេងទៀត គឺមិនទាន់ដឹងនៅឡើយទេ។ ហើយនៅពេលនេះ យើងនៅមិនទាន់អាចធ្វើការបញ្ជាក់ច្បាស់អំពីព័ត៌មានលម្អិតខាងលើបាននៅឡើយទេ គ្រាន់តែដឹងថា ក្រុមហ៊ុន Sony បានធ្វើការរចនារូបរាង Renders ថ្មីសម្រាប់ស្មាតហ្វូនជំនាន់ថ្មីនេះ៕