កាលពីប៉ុន្មានថ្ងៃមុននេះ មានការលើកឡើងជាច្រើនស្តីពីលក្ខណៈពិសេសរបស់ស្មាតហ្វូន OUKITEL K6 គឺជាស្មាតហ្វូនជំនាន់បន្ទាប់របស់ក្រុមហ៊ុន OUKITEL ដែលជាក្រុមហ៊ុនមួយកំពុងទទួលបានប្រជាប្រិយភាពយ់ាងខ្លាំងទាក់ទងទៅនឹងសមត្ថភាពថាមពលថ្ម។ ស្មាតហ្វូនថ្មីនេះ ក៏ទើបតែត្រូវបានក្រុមហ៊ុន បញ្ចេញនូវវីដេអូផ្សព្វផ្សាយថ្មីផងដែរ។ នៅក្នុងវីដេអូនេះ បានបញ្ជាក់ថា ស្មាតហ្វូន OUKITEL K6 ត្រូវបានក្រុមហ៊ុនបំពាក់នូវថាមពលថ្មធំ ប៉ុន្តែលោកអ្នកប្រហែលជាមិនបានដឹងនោះទេថាតើវាមានទំហំធំប៉ុណ្ណានោះទេ។ ស្មាតហ្វូនថ្មីនេះ មានថាមពលថ្ម ទំហំរហូតដល់ទៅ 6300mAh និងប្រើប្រាស់កំរិតនៃញសាកថ្ម 5V/3A fast charging។
ដើម្បីបញ្ជាក់ពីសមត្ថភាពនោះ ក្រុមហ៊ុន OUKITEL បានដាក់ស្មាតហ្វូន OUKITEL K6 នៅជាប់ទៅនឹងទូរស័ព្ទ iPhone X ដើម្បីធ្វើការប្រៀបធៀបថាមពលថ្មរបស់ស្មាតហ្វូនទាំងពីរនេះ។ នេះប្រហែលជាមិនមែនជាការប្រៀបធៀបដ៏ល្អបំផុតនោះទេ ដោយសារតែទូរស័ព្ទ iPhone X មានថាមពលត្រឹមតែ 2,716mAh ដែលទាបជាងពាក់កណ្តាលនៃថាមពលថ្មរបស់ស្មាតហ្វូន OUKITEL K6 ។ ក្រោយការចាក់ចម្រៀងរយៈពេល 1 ម៉ោងនោះ ស្មាតហ្វូន OUKITEL K6 នៅសល់ថាមពលថ្ម 97% ខណៈពេលដែលទូរស័ព្ទ iPhone X នៅសល់ថាមពលថ្ម 73%។
ក្រោយការប្រើប្រាស់ WeChat Voice Calling នៅលើអេក្រង់បើកចោលរយៈពេលមួយម៉ោង ស្មាតហ្វូន OUKITEL នៅសល់ថាមពលថ្ម 90% ខណៈពេលដែលថាមពលថ្មរបស់ iPhone X ធ្លាក់នៅត្រឹមតែ 63%។ សម្រាប់ការតេស្តលើកទី 3 នេះ គឺការប្រើប្រាស់ Video Recording រយៈពេលមួយម៉ោង ស្មាតហ្វូន OUKITEL K6 នៅសល់ថាមពល 80% ខណៈពេលដែល iPhone X នៅសល់តែ 36% ។ សម្រាប់ការតេស្ត៍មួយទៀតនោះ គឺការទស្សនាវីដេអូ FullHD រយៈពេល 1 ម៉ោង 16 នាទីនោះ iPhone X គឺរលត់ថ្ម ខណៈពេលដែល OUKITEL K6 នៅសល់ថាមពលថ្ម 65%។ ស្មាតហ្វូនស៊េរីថ្មី OUKITEL K6 បំពាក់នូវថាមពលថ្មខ្លាំងមិនធម្មតានោះទេ។
សូមជំរាបថា ស្មាតហ្វូន OUKITEL K6 ថ្មីនេះ មានអេក្រង់ទំហំ 6 អ៊ីង FullHD+ (2160 x 1080ភិចសែល) និងដំណើរការប្រព័ន្ធប្រតិបត្តិការ Android 7.1 Nougat ព្រមទាំងបំពាក់នូវបន្ទះឈីប MediaTek’s Helio P23 64-bit octa-core SoC និងរ៉េមទំហំ 6GB ។ ស្មាតហ្វូនស៊េរីថ្មីនេះ នឹងដាក់លក់នៅខែនេះ៕
