ក្រុមហ៊ុន OPPO និង Vivo បាត់បង់នូវទីផ្សារហាងលក់រាយរបស់ខ្លួនចំនួន 10,000 ហាងនៅក្នុងប្រទេសឥណ្ឌា បន្ទាប់ពីក្រុមហ៊ុនបច្ចេកវិទ្យាផលិតស្មាតហ្វូនទាំងពីរនេះ បានសម្រេចចិត្តធ្វើការកាត់បន្ថួនូវការធ្វើពាណិជ្ជកម្មរបស់ខ្លួន ដែលផ្តល់ជូនទៅកាន់ក្រុមហ៊ុនលក់រាយនោះ។ យោងទៅតាមរបាយការណ៍មួយចេញពី Economic Times បានឱ្យដឹងថា ក្រុមហ៊ុនបច្ចេកវិទ្យាទាំងពីរនេះ បានកាត់បន្ថយប្រាក់ចំណេញរបស់ខ្លួន ដែលបានផ្តល់ទៅកាន់ខ្សែសង្វាក់ធំរបស់ខ្លួនធ្លាកពី 23-25% ចុះមកត្រឹម 14-15 % វិញ។ ម្យ៉ាងវិញទៀត ក្រុមហ៊ុនលក់រាយតូចៗ ជាច្រើនក៏ទទួលនូវការកាត់បន្ថយនៃទំហំពាណិជ្ជកម្មរបស់ខ្លួនពី 15-16% ទៅត្រឹម 5-6% វិញផងដែរ។
ដោយសារតែការសម្រេចចិត្តនេះ ហាងលក់រាយជាច្រើនប្រហែលជា 10,000 Stores ត្រូវបានបញ្ឈប់នូវការលក់ស្មាតហ្វូនទាំងនេះ។ ក្រុមហ៊ុនលក់រាយបានរងគ្រោះ ដោយសារតែការសម្រេចចិត្តរបស់ក្រុមហ៊ុននេះ គឺ Sangeetha Mobile ដែលបានសម្រេចចិត្តបញ្ឈប់នូវការលក់រាយទៅលើឧបករណ៍ស្មាតហ្វូនរបស់ក្រុមហ៊ុន Oppo និង Vivo នៅក្នុងរដ្ឋ Tamil Nadu។ ក្រៅពីការកាត់បន្ថយទៅលើការធ្វើទំហំពាណិជ្ជកម្មនេះ ហេតុផលផ្សេងទៀតដែលជម្រុញឱ្យអ្នកលក់រាយបញ្ឈប់នូវការលក់ស្មាតហ្វូន Oppo និង Vivo នៅក្នុងរដ្ឋ Tamil Nadu គឺដោយសារតែការប្រើប្រាស់នូវទំហំពាណិជ្ចកម្មផ្សេងគ្នា នៃរដ្ឋផ្សេងគ្នាដែលធ្វើឱ្យមានបញ្ហាកាន់តែស្មុគស្មាញទៅលើហាងជាច្រើននៅក្នុងប្រទេសនៃតំបន់អាស៊ីខាងត្បូងក្នុងការលក់ផលិតផលរបស់ក្រុមហ៊ុនបច្ចេកវិទ្យាទាំងពីរនេះ។
អ្នកនាំពាក្យរបស់ក្រុមហ៊ុន Oppo នៅក្នុងប្រទេសឥណ្ឌា បានអះអាងថា ខ្លួនបានកាត់បន្ថយនូវទំហំពាណិជ្ចកម្មទៅលើក្រុមហ៊ុនលក់រាយជាច្រើនដោយសារតែការសម្រេចចិត្តរបស់ក្រុមហ៊ុនក្នុងការផ្តោតទៅលើធនធានរបស់ខ្លួនទៅលើទីផ្សាររបស់ផលិតផលថ្នាក់កណ្តាល និងផលិតផលលំដាប់ខ្ពស់។ អ្នកនាំពាក្យសារភាពថា នឹងមានការកាត់បន្ថយទៅលើចំនួននៃហាងដោយសារតែការប៉ះពាល់ទៅលើទំនិញ និងពន្ធទៅលើការលក់នៅក្នុងហាងជាច្រើន។ ទន្ទឹមនឹងនេះផងដែរ ក្រុមហ៊ុន Vivo នៅក្នុងប្រទេសឥណ្ឌា បានបដិសេធទៅលើរបាយការណ៍ទាំងនេះ ដែលថាខ្លួន បានបោះបង់ចោលនូវហាងលក់រាយជាច្រើនរបស់គាត់ ហើយក្រុមហ៊ុន បានអះអាងថា ក្រុមហ៊ុនមានគម្រោងក្នុងការបើកហាងជាច្រើនទៀតនៅក្នុងឆ្នាំ 2018 ខាងមុខនេះ។
ទោះជាយ៉ាងណាក៏ដោយ នាយកប្រតិបត្តិជាច្រើនមកពីក្រុមហ៊ុនលក់រាយផ្តល់នូវហេតុផលផ្សេងៗគ្នា ទៅលើទំហំពាណិជ្ជកម្មដែលជាផ្នែកមួយនៃយុទ្ធសាស្រ្តរបស់ក្រុមហ៊ុនបច្ចេកវិទ្យាទាំងពីរនេះនៅក្នុងការកាត់បន្ថយទៅលើការវិនិយោគនៅពេលដែលពួកគេឈានដល់ចំនែកទីផ្សារជាក់លាក់ពិតប្រាកដមួយ។ ក្រុមអ្នកសា្រវជ្រាវ បានអះអាងថា ក្រុមហ៊ុនផលិតស្មាតហ្វូនទាំងពីរនេះ នឹងប្រឈមមុខនូវការប្រកួតប្រជែងយ៉ាងខ្លាំងនៅក្នុងទីផ្សារនៃប្រទេសឥណ្ឌានៅឆ្នាំនេះ ហើយការកាត់បន្ថយទៅលើការវិនិយោគប្រហែលជា បានជះឥទ្ធិពលទៅលើចំណែកទីផ្សាររបស់ពួកគេនៅពេលអនាគតដ៏ខ្លីខាងមុខនេះ។ នេះប្រហែលក្លាយជាបញ្ហាដ៏ធំមួយសម្រាប់ក្រុមហ៊ុនបច្ចេកវិទ្យាទាំងពីរនេះ ស្របពេលដែលអ្នកវិភាគជាច្រើននៅក្នុងឧស្សាហកម្មនេះកាលពីមុនលើកឡើងថា កំណើនទីផ្សារនៅក្រៅប្រទេស គឺពិតជាសំខាន់ណាស់សម្រាប់ក្រុមហ៊ុនបច្ចេកវិទ្យាចិនទាំងនេះ៕