Huawei ដែលជាក្រុមហ៊ុនផលិតស្មាតហ្វូនរបស់ប្រទេសចិនពេលនេះ បាននឹងកំពុងតែស្ថិតនៅក្នុងការជាប់គាំងជាមួយនឹងគម្រោងផែនការនៃការពង្រីកទីផ្សាររបស់ខ្លួនទៅកាន់សហរដ្ឋ អាមេរិក បន្ទាប់ពីកិច្ចព្រមព្រៀងជាលើកដំបូងរបស់ខ្លួនជាមួយនឹងក្រុមហ៊ុនចែកចាយរបស់សហរដ្ឋអាមេរិកមួយ បានបរាជ័យដោយសារតែមានសម្ពាធនយោបាយរវាងចិន និងអាមេរិកនោះ។ សម្រាប់កិច្ចព្រមព្រៀងជាលើកទីពីរ ក៏នៅមិនទាន់មានតម្រុយវិជ្ជមានដែរ។ សូមបញ្ជាក់ថា កន្លងមក Huawei ធ្លាប់បានប្រកាសថា ខ្លួននឹងដាក់លក់ស្មាតហ្វូនស៊េរីថ្មីរបស់ខ្លួនម៉ូ ដែល Huawei Mate 10 Pro ជាមួយនឹងក្រុមហ៊ុនចែកចាយ AT&T នៅក្នុងខែកុម្ភៈខាងមុខនេះ។
ប៉ុន្តែយោងតាមសារព័ត៌មាន The Wall Street Journal ក្រុមហ៊ុនចែកចាយនេះ បានច្រានចោលនូវកិច្ចព្រមព្រៀងនេះ ដោយគ្មានការពន្យល់អ្វីនោះទេ។ AT&T គឺជាក្រុមហ៊ុនចែកចាយធំបំផុតលំដាប់ទី 2 នៅក្នុងសហរដ្ឋអាមេរិក ហើយការលុបចោលកិច្ចព្រមព្រៀងនេះ ធ្វើឱ្យក្រុមហ៊ុន Huawei អាចបិទទីផ្សាររបស់ខ្លួននៅសហរដ្ឋអាមេរិកបានផងដែរ។ យោងតាមការបញ្ជាក់របស់ Android Police សម្រាប់កិច្ចព្រមព្រៀងលើកទី 2 ជាមួយនឹងក្រុមហ៊ុន Verizon ហាក់ដូចជាមិនទំនងនោះទេ ដោយសារតែក្រុមហ៊ុននេះក៏ស្ថិតនៅក្រោមសម្ពាធនយោបាយ ដើម្បី លុប ចោលនូវការដាក់លក់ស្មាតហ្វូន Mate 10 Pro ផងដែរ។
ក្រុមហ៊ុន AT&T និង Verizon មិនទាន់ធ្វើអធិប្បាយទៅលើរឿងនេះនោះទេ ប៉ុន្តែក្រុមហ៊ុន Huawei និយាយថា ខ្លួននឹងដាក់លក់ស្មាតហ្វូន Mate 10 Pro នៅក្នុងសហរដ្ឋអាមេរិកបើទោះជាគ្មានដៃគូសហការក៏ដោយ។ ការលុបចោលរបស់ក្រុមហ៊ុន AT&T កើតឡើងប៉ុន្មានសប្តាហ៍នេះបន្ទាប់ពីគណៈកម្មាធិការស៊ើបអង្កេតព្រឹទ្ធសភានិងសភាអាមេរិកផ្ញើសំបុត្រទៅកាន់ FCC ដោយលើកឡើងថា ក្រុមហ៊ុន Huawei មានការគំរាមកំហែងផ្នែកសន្តិសុខសុវត្ថិភាព។ វាពិតជាមានការព្រួយបារម្ភមែនទែនអំពីកិច្ចព្រមព្រៀងរវាងក្រុមហ៊ុនចែកចាយនៅសហរដ្ឋអាមេរិកជាច្រើនជាមួយនឹងក្រុមហ៊ុន Huawei ។
នេះ គឺជាពេលវេលាដ៏ភ្ញាក់ផ្អើលមួយផងដែរ ដែលក្រុមហ៊ុន Huawei ប្រកាសបង្ហាញស្មាតហ្វូន Mate 10 Pro នៅក្នុងព្រឹត្តិការណ៍ Consumer Electronics Show 2018 នៅក្នុងសប្តាហ៍នេះ។ នៅក្នុងការប្រកាសបង្ហាញនេះ លោក Richard Yu ដែលជានាយកប្រតិបត្តិរបស់ក្រុមហ៊ុន Huawei បាននិយាយថា ក្រុមហ៊ុនដែលមានស្តង់ដារខ្ពស់បំផុតទៅលើឯកជនភាព និងសុវត្ថិភាពរបស់អ្នកប្រើប្រាស់ ប្រកាសការលុបចោលកិច្ចព្រមព្រៀងនៅពេលនេះ គឺជាការបាត់បង់ដ៏ធំមួយសម្រាប់អ្នកប្រើប្រាស់ជាច្រើន៕
