Huawei បានក្លាយជាក្រុមហ៊ុនបច្ចេកវិទ្យាដ៏ធំមួយនៅក្នុងទីផ្សារស្មាតហ្វូនពិភពលោក។ កាលពីឆ្នាំមុននេះ ស្មាតហ្វូន Huawei P10 និង P10 Plus ត្រូវបានបង្ហាញខ្លួននៅក្នុងព្រឹត្តិការណ៍ MWC 2017។ ព្រឹត្តិការណ៍តាំងពិពរណ៍នេះ នឹងប្រារព្ធធ្វើឡើងនៅទីក្រុងបាសេឡូណានៅខែក្រោយក្នុងឆ្នាំ 2018 នេះហើយនៅក្នុងព្រឹត្តិការណ៍នេះ ក្រុមហ៊ុន Huawei ត្រូវបានគេព្យាសករណ៍ថា នឹងប្រកាសចេញស្មាតហ្វូនជំនាន់បន្ទាប់របស់ខ្លួនផងដែរ។ កាលពីពេលមុននេះ យើងជឿជាក់ថា ស្មាតហ្វូនថ្មីនោះ គឺជា Huawei P11 ប៉ុន្តែក្រោយមកប្រភពព័ត៌មានជាច្រើន បានបញ្ជាក់ថានោះ គឺជាម៉ូដែល Huawei P20 ទៅវិញ។
សម្រាប់ស្មាតហ្វូនស៊េរីថ្មី Huawei P20 ត្រូវគេរំពឹងថា នឹងមានការរចនារូបរាងថ្មី។ ត្រឡប់ទៅកាន់ព្រឹត្តិការណ៍ XDA Developers នៅក្នុងខែធ្នូ រកឃើញនូវឯកសារផ្លូវការមួយដែលបានបញ្ជាក់ថា ស្មាតហ្វូនស៊េរីថ្មីនឹងប្រើប្រាស់នូវ Notch ដែលស្រដៀងគ្នាទៅនឹងទូរស័ព្ទ iPhone X ។ សម្រាប់ Firmware របស់ស្មាតហ្វូន Huawei P20 នឹងមានលេខម៉ូដែល EML-AL00, EML-L09, EML-L29 និង EML-TL00។
កាលពីសប្តាហ៍មុននេះ មានពាក្យចចាមអារ៉ាមថា ស្មាតហ្វូន Huawei P20 នឹងប្រើប្រាស់អេក្រង់ Full HD កម្រិតភាពច្បាស់ដល់ទៅ 1920×1080 ភិចសែល ប៉ុន្តែព័ត៌មានថ្មី បានបង្ហាញថា ស្មាតហ្វូននេះ មិនមែនជារបស់ស្មាតហ្វូន P20 នោះទេ។ សម្រាប់ស្មាតហ្វូន Huawei P20 ត្រូវបានគេធ្វើតេស្ត៍នៅលើ Benchmark ជាមួយនឹងការប្រើប្រាស់កម្រិតភាពច្បាស់ដល់ទៅ Full HD+ កម្រិត 2244×1080 ភិចសែលថែមទៀត។ បន្ថែមពីនេះទៀត តាមរយៈ HTML5 Test ស្មាតហ្វូននេះ នឹងដំណើរការប្រព័ន្ធប្រតិបត្តិការ Android 8.0 ។
រហូតមកដល់ពេលនេះ ព័ត៌មានអំពីលក្ខណៈសម្បត្តិរបស់ស្មាតហ្វូន Huawei P20 គឺនៅមិនទាន់ដឹងនៅឡើយទេ។ មុននេះមានព័ត៌មានមួយដែលទទួលបានពី Evan Blass បានបញ្ជាក់ថា ស្មាតហ្វូននេះ នឹងមានកាមេរ៉ាចំនួន 3 គ្រាប់។ ហើយប៉ុន្មានថ្ងៃក្រោយមក រូបភាពជាច្រើនសន្លឹករបស់ស្មាតហ្វូននេះក៏ចែកចាយនៅលើវេបសាយ Weibo របស់ចិនផងដែរ។ នៅខែក្រោយនេះ នៅក្នុងព្រឹត្តិការណ៍ MWC 2018 ដែលនឹងធ្វើឡើងនៅក្នុងទីក្រុងបាសេឡូណាក្នុងប្រទេសអេស្ប៉ាញ។ ស្មាតហ្វូន Huawei ស៊េរីថ្មីនេះ ត្រូវបានគេរំពឹងថានឹងបង្ហាញខ្លួននៅក្នុងព្រឹត្តិការណ៍នេះជាក់ជាមិនខាន៕