Samsung Galaxy S9 និង Galaxy S9 Plus គឺជាស្មាតហ្វូនស៊េរីថ្មីដំបូងបំផុតនៅឆ្នាំនេះ ដែលភ្ជាប់ជាមួយនឹងបន្ទះឈីប Snapdragon 845 ស៊េរីថ្មីរបស់ក្រុមហ៊ុន Qualcomm។ ស្មាតហ្វូនទាំងពីរស៊េរីថ្មីនេះ មានលក្ខណៈស្រដៀងគ្នាជាច្រើនទៅនឹងស្មាតហ្វូនជំនាន់មុនរបស់ខ្លួនផងដែរ ស្របពេលដែលស្មាតហ្វូន Galaxy S9+ នឹងមានការពង្រឹងទៅលើប្រព័ន្ធកាមេរ៉ាខាងក្រោយ។ ដូជគ្នាទៅនឹងឆ្នាំមុនដែរ មុននឹងមានការបង្ហាញខ្លួនផ្លូវការរបស់ផលិតផលថ្មិៗ គឺតែងតែមានស្មាតហ្វូនរាប់ពាន់គ្រឿងទៀត ដែលនឹងត្រូវបានគេលួចចម្លងនូវការរចនាម៉ូដតាមស្មាតហ្វូនស៊េរីថ្មីទាំងនោះ។ ពេលនេះ មានលេចចេញនូវសា្មតហ្វូនថ្មីមួយ ដែលបានចំលងរូបរាងរបស់ Galaxy S9+ ដែលបានក្លូន Clone ដោយក្រុមហ៊ុន Huaqiangbei/Huaqiang North ដែលត្រូវបានគេស្គាល់ថាជាក្រុមហ៊ុនផលិតគ្រឿងអេឡិចត្រូនិកមួយនៅក្នុងទីក្រុង Shenzhen។
រូបភាពជាច្រើននេះ បានបង្ហាញថា ស្មាតហ្វូនស៊េរីថ្មី “Galaxy S9+” នឹងមានពណ៌ខៀវ និងពណ៌មាស ដែលភ្ជាប់ជាមួយនឹងប្រព័ន្ធកាមេរ៉ាភ្លោះ ប្រព័ន្ធស្កេនក្រយ៉ៅដៃ និងម៉ាកយីហោ Samsung ផងដែរ។ ស្មាតហ្វូននេះ គឺពិតជាមានការរចនារូបរាងភ្លឺចែងចាំងដូចជាកញ្ចក់តែម្តងនៅលើពណ៌ខៀវនេះ។ នេះគឺជាស្មាតហ្វូន Clone ដែលពិតជាមានការរចនារូបរាងយ៉ាងល្អស្រស់ស្អាតតែម្តង។ សម្រាប់ស៊ុមព័ទ្ធអេក្រង់ផ្នែកខាងលើរបស់ស្មាតហ្វូននេះ គឺពិតជាមានទំហំក្រាស់ជាងស្មាតហ្វូន Galaxy S8+។ ប៉ុន្តែអ្វីដែលអស្ចារ្យនោះ គឺវាប្រើប្រាស់នូវ UI ថែមទៀត។ ដោយសារតែនេះ គឺជាស្មាតហ្វូនប្រភេទ Clone គឺមិនមានភ្ជាប់ជាមួយនឹងមុខងារនៃជំនួយការឆ្លាតវៃ Bixby ដែលមានន័យថា ស្មាតហ្វូននេះ មិនមានប៊ូតុង Bixby នោះទេ។ សម្រាប់ប៊ូតុង Power គឺផ្លាស់ប្តូរទៅផ្នែកខាងឆ្វេង ស្របពេលដែលប៊ូតុងនោះ គឺជាកន្លែងរបស់ប៊ូតុង Bixby នោះ។
សូមជំរាបថា នេះគឺជាស្មាតហ្វូនដែលចំលងរូបរាងចេញពីស្មាតហ្វូនដើមប៉ុណ្ណោះ។ ចំពោះ Galaxy S9 និង Galaxy S9+ របស់ក្រុមហ៊ុន Samsung នឹងប្រកាសចេញនៅក្នុងព្រឹត្តិការណ៍ MWC នៅក្នុងខែកុម្ភៈឆ្នាំ 2018 ខាងមុខនេះ។ ហើយការលក់ស្មាតហ្វូននេះ គឺចាប់ផ្តើមនៅខែមីនាផងដែរ។ រង់ចាំតាមដានជាមួយខ្ញុំទាំងអស់គ្នាថា តើនឹងមានអ្វីប្លែកបន្តទៀតជាមួយនឹងស្មាតហ្វូនស៊េរីថ្មីនេះ៕
