កន្លងមកមានព័តមានថា Apple នឹងបញ្ចេញនូវទូរស័ព្ទ iPhones អេក្រង់ធំនៅឆ្នាំនេះ។ ទូរស័ព្ទអេក្រង់ធំនេះ នឹងជួយជម្រុញទៅលើកំណើននៃការលក់នៅឆ្នាំនេះ របស់ក្រុមហ៊ុនទៅលើការនាំចេញជាសកលនោះ នេះបើតាមការបញ្ជាក់របស់លោក Ming-Chi Kuo អ្នកវិភាគរបស់ក្រុមហ៊ុន KGI Securities។ ប្រភពព័តមានខាងលើបានបញ្ជាក់ថា Apple នឹងបញ្ចេញនូវទូរស័ព្ទ iPhones ស៊េរីថ្មីនៅក្នុងរដូវស្លឹកឈើជ្រុះខាងមុខនេះ ហើយ ជាមួយនឹងអេក្រង់ OLED ចំនួន 2 ម៉ូដែល និងមួយទៀតប្រើប្រាស់អេក្រង់ LCD ។ វត្តមានទូរស័ព្ទស៊េរីថ្មីទាំងនេះ នឹងធ្វើឱ្យការនាំចេញរបស់ក្រុមហ៊ុន Apple មានការកើនឡើងនៅលើពិភពលោកកាន់តែខ្លាំងក្លាដូចវត្តមានរបស់ iPhone X នៅក្នុងប្រទេសចិនដែរ។
លោក Kuo បានសរសេរថា “យើងជឿជាក់ថា សម្រាប់ទូរស័ព្ទអេក្រង់ OLED ទំហំ 6.5 អ៊ីង និង iPhones អេក្រង់ទំហំ 6.1 អ៊ីង LCD នឹងបង្កើនទៅលើចំណែកទីផ្សាររបស់ក្រុមហ៊ុន Apple នៅក្នុងប្រទេសចិន ហើយទូរស័ព្ទ iPhone LCD ទំហំ 6.1 អ៊ីងនេះ អាចនឹងមានតម្លៃ US$650-750 ហើយទូរស័ព្ទនេះ នឹងផ្តល់នូវភាពងាយស្រួលសម្រាប់អ្នកប្រើប្រាស់ជាច្រើននៅជុំវិញពិភពលោកជាមួយនឹងការប្រើប្រាស់នូវបច្ចេកវិទ្យា 3D Sensing និងការរចនារូបរាងអេក្រង់ពេញលេញដែលជាបទពិសោធន៍ប្រើប្រាស់ដ៏អស្ចារ្យបំផុត។”
ជាមួយនឹងវត្តមានស៊េរីថ្មីទាំងអស់នេះ លោក Kuo បាននិយាយទៀតថា ការនាំចេញទូរស័ព្ទ iPhones នឹងមានការកើនឡើងដល់ទៅ 5% ទៅ 10% នៅក្នុងឆ្នាំ 2018 នេះបើធៀបទៅនឹងឆ្នាំមុន។ ការព្យាករណ៍របស់គាត់ គឺជាគំនិតសុទិដ្ឋិនិយមជាងការទស្សន៍ទាយកំណើននៃការនាំចេញស្មាតហ្វូនទូទាំងពីភពលោកដែលរំពឹងថា ទូរស័ព្ទទាំងនេះ អាចនឹងស្ថិតនៅក្នុងចន្លោះនៃមានការកើនឡើង 5% និងការធ្លាក់ចុះ 5% ។
ទោះជាយ៉ាងណាក៏ដោយ លោក Kuo នៅតែបង្ហាញជំនឿជឿជាក់ថា Apple អាចនឹងបញ្ចប់ការលក់ទូរស័ព្ទ iPhone X នៅក្នុងរដូវក្តៅនេះ។ របាយការណ៍ថ្មីៗនេះ បានបញ្ជាក់ថា Apple iPhone X នៅមិនទាន់សម្រេចនូវជោគជ័យតាមការរំពឹងទុកនោះទេ។ របាយការណ៍មួយដែលចេញកាលពីសប្តាហ៍នេះ បានផ្សាយថា ការកម្ម៉ង់ទិញសមាសភាគសម្រាប់ iPhone X មានចំនួនតិចជាងការរំពឹងទុកដល់ទៅ 15%-30% នៅក្នុងត្រីមាសទី 1 នេះ។ ការលក់ធ្លាក់ចុះនេះ គឺដោយសារតែកត្តាតាមរដូវកាលក៏ដោយ មនុស្សជាច្រើនជឿជាក់ថា គឺដោយសារតែការលក់យឺតនៃ iPhone 8 និង iPhone 8 Plus ដែលធ្វើឱ្យប៉ះពាល់ទៅដល់ការលក់របស់ iPhone X ផងដែរ។
សម្រាប់ក្រុមហ៊ុន Apple ដាក់លក់ជាផ្លូវការនូវ iPhone X នៅខែវិច្ឆិកា កាលពីឆ្នាំមុននេះ គឺមានតម្លៃចាប់ផ្តើម $1000 ភ្ជាប់ជាមួយនឹងមុខងារថ្មីៗជាច្រើនគឺ Face ID, Animoji, Wireless Charging និង Portrait Mode ផងដែរ។ មានពាក្យចចាមអារ៉ាមជាច្រើនចេញពីប្រទេសចិន បាននិយាយអំពីទូរស័ព្ទ iPhone X ថា មានការធ្លាក់ចុះទៅលើការនាំចេញនៅក្នុងឆមាសទី 1 ឆ្នាំ 2018 នេះ។ ការព្យាករណ៍ទៅលើការនាំចេញរបស់លោក Kuo សម្រាប់ iPhone X គឺមានចំនួនទាបជាងអ្វីដែលអ្នកវិភាគផ្សេងទៀតធ្វើការទស្សន៍ទាយទុកនោះ៕