ថ្មីៗនេះ នៅក្នុងព្រឹត្តិការណ៍តាំងពិពរណ៍ Consumer Electronics Show (CES) 2018 ក្រុមហ៊ុន Vivo ប្រកាសចេញនូវស្មាតហ្វូន X20 Plus ប្រើប្រាស់បច្ចេកវិទ្យាស្កេនក្រយ៉ៅដៃក្រោមអេក្រង់ដំបូងបំផុតនៅក្នុងពិភពលោក។ នៅដើមខែនេះ ស្មាតហ្វូននេះ ក៏ទទួលនូវវិញ្ញាបនបត្រ 3C រួមនឹងវិញ្ញាបនបត្រពី TENAA ហើយកាលពីសប្តាហ៍មុននេះ។ ពាក្យចចាមអារ៉ាមមុននេះ បាននិយាយថា ក្រុមហ៊ុន Vivo អាចនឹងប្រកាសចេញនូវស្មាតហ្វូន Vivo X20 Plus UD។ នៅថ្ងៃនេះ ក្រុមហ៊ុន Vivo បានបញ្ជាក់ជាផ្លូវការថា ស្មាតហ្វូន Vivo X20 Plus បច្ចេកវិទ្យាស្កេនក្រយ៉ៅដៃក្រោមអេក្រង់នឹងប្រកាសចេញជាផ្លូវការនៅថ្ងៃទី 24 ខែមករាខាងមុខនេះ។
យោងតាមព័តមានមួយចេញពីប្រទេសចិន បង្ហាញថា ក្រុមហ៊ុន Vivo នឹងរៀបចំនូវព្រឹត្តិការណ៍មួយសម្រាប់បង្ហាញស្មាតហ្វូននេះនៅក្នុងទីក្រុងប៉េកាំង ប្រទេសចិននៅថ្ងៃទី 24 ខែមករានេះហើយ ដោយនឹងចាប់ផ្តើមនៅវេលាម៉ោង 7:30 PM។ សំរាប់លក្ខណៈសម្បត្តិ និងតម្លៃរបស់ស្មាតហ្វូន នៅមិនទាន់ប្រកាសចេញនៅឡើយទេ។ របាយការណ៍មុននេះ បានទម្លាយថា លក្ខណៈសម្បត្តិរបស់ស្មាតហ្វូននេះ គឺស្រដៀងគ្នាទៅនឹងស្មាតហ្វូន X20 Plus ផងដែរ។
Vivo X20 Plus គឺមានភ្ជាប់ជាមួយនឹងប្រព័ន្ធស្កេនក្រយ៉ៅដៃក្រោមអេក្រង់នឹងប្រើប្រាស់នូវសេនស័រ Clear ID 9500 optical under-display fingerprint sensor របស់ក្រុមហ៊ុន Synaptics ។ សេនស័រនេះអាចស្ថិតនៅចន្លោះកញ្ចក់អេក្រង់ និងអេក្រង់ OLED បាន។ ក្រៅពីការដោះសោរសម្រាប់ស្មាតហ្វូន X20 Plus នៅក្នុងរយៈពេល 0.6 ឬ 0.7 វិនាទីនោះ បច្ចេកវិទ្យាស្កេនក្រយ៉ៅដៃក្រោមអេក្រង់នេះក៏អាចធ្វើការទូទាត់ប្រព័ន្ធបង់ប្រាក់បានផងដែរ។ ស្មាតហ្វូននេះ ត្រូវបានគេដឹងថា នឹងមានអេក្រង់ទំហំ 6.43 អ៊ីង កម្រិតភាពច្បាស់ OLED ហើយវាទ្រទ្រង់នូវ FHD+ ជាមួយនឹង aspect ratio 18:9។ ស្មាតហ្វូននេះ ប្រើប្រាស់បន្ទះឈីប Snapdragon 660 រូមជាមួយនឹងរ៉េមទំហំ 4GB និងម៉េមូរីក្នុងម៉ាស៊ីនទំហំ 128GB។ ស្មាតហ្វូននេះដំណើរការដោយប្រព័ន្ធប្រតិបិត្តិការណ៍ Android 7.1.2 Nougat OS ។
ប្រព័ន្ធកាមេរ៉ាភ្លោះរបស់ស្មាតហ្វូននេះ មានទំហំ 12MP+5MP នៅផ្នែកខាងក្រោយ ស្របពេលដែលកាមេរ៉ាខាងមុខមានទំហ 12MP។ ស្មាតហ្វូននេះមានថាមពលថ្ម 3800mAh។ របាយការណ៍មុននេះ បានទម្លាយថា ស្មាតហ្វូន Vivo X20 Plus ប្រព័ន្ធស្កេនក្រយ៉ៅដៃក្រោមអេក្រង់នេះ នឹងដាក់លក់នៅក្នុងតម្លៃ 3,998 យ័ន (~$625) និងម៉ូដែល X20 Plus ធម្មតាមានតម្លៃ 3,498 យ័ន (~$546) ៕