ពីមួយថ្ងៃទៅមួយថ្ងៃការបែកធ្លាយព័ត៌មានទាក់ទងនឹងកំពូលជំនាន់ថ្មី Samsung Galaxy S9 និង S9+ បានលេចចេញជាហូរជាហែរនៅលើបណ្តាញសារព័ត៌មានបរទេសល្បីៗ ក៏ដូចជាបណ្តាញសារព័ត៌មានក្នុងប្រទេសកម្ពុជាផងដែរ។ កំពូលស្មាតហ្វូនបងប្អូនរួមជំនាន់ទាំងពីរនេះត្រូវបានគេសម្ម៉ត់ថានឹងបង្ហាញខ្លួនជាផ្លូវការក្នុងព្រឹត្តិការណ៍ Mobile World Congress 2018 នៅខែក្រោយនេះ។
យើងមិនទាន់ដឹងច្បាស់ពីការរចនារូបរាងរបស់ពួកវាពិតប្រាកដនៅឡើងទេ ប៉ុន្តែបើតាមព័ត៌មានបែកធ្លាយចេញពីក្រុមហ៊ុនផ្ទាល់ថាស្មាតហ្វូនដែលនឹងបំពាក់បន្ទះឈីប Qualcomm Snapdragon 845 ជំនាន់ថ្មីចុងក្រោយនេះនឹងធ្វើការផ្លាស់ប្តូររចនាបថរូបរាងអោយកាន់តែមានភាពប្រណិតជាងជំនាន់ Galaxy S8 និង S8+ ដោយពួកវានឹងមានកាត់បន្ថយគែមអេក្រង់លើក្រោមអោយកាន់តែតូចស្តើង និងគែមអេក្រង់ឆ្វេងស្តាំកាន់តែកោងធំជាងជំនាន់មុនផងដែរ ហើយក្នុងនោះម៉ូដែលធំគឺ Galaxy S9+ នឹងបំពាក់កាមេរ៉ាភ្លោះថែមទៀតផង។
ក្រុមហ៊ុន DBS Design ដែលជាក្រុមហ៊ុនល្បីឈ្មោះមួយក្នុងការរចនារូបរាងគំរូនៃឧបករណ៍ និងទូរស័ព្ទកំពូលៗរបស់ក្រុមហ៊ុនល្បីៗក្នុងពិភពលោកមុនពេលប្រកាសចេញផ្លូវការណ៍នោះពេលនេះបានបញ្ចេញនូវវីដេអូ reader ថ្មីចុងក្រោយរបស់ខ្លួនដែលបានបង្ហាញពីរូបភាពគំរូរូបរាងការរចនារបស់ Galaxy S9 និង S9+ ។ ក្នុងវីដេអូ reader រូបភាពគំរូនេះបានបង្ហាញច្បាស់ថារូបរាងរចនាបថ Galaxy S9 និង S9+ ហាក់មិនសូវខុសពីជំនាន់មុនប៉ុន្មានឡើយហើយចំនុចដែលខុសគ្នាបន្តិចនោះគឺត្រង់គែមខាងលើអេក្រង់គឺតូចស្តើងជាង និងគែមក្រោមអេក្រង់វិញហាក់កាត់អស់ស្ទើរគ្មានសល់ ចំនែកគែមកោងសងខាងវិញឃើញថារាងធំជាងជំនាន S8/S8+ បន្តិចអបដោយស៊ុមលោហៈដែលមានទម្រង់រចនាបថដដែល។
ចំនុចដែលខុសគ្នាខ្លាំងនោះគឺត្រង់កាមេរ៉ាខាងក្រោយរបស់វាដោយពួកវាត្រូវបានប្រើប្រាស់កែវលែនកាមេរ៉ាបញ្ឈរជាមួយទ្រនាប់ស្កែមក្រយ៉ៅម្រាមដៃស្ថិតនៅពីក្រោមកាមេរ៉ាសម្រាប់ Galaxy S9 រី Galaxy S9+ វិញបំពាក់កាមេរ៉ាភ្លោះដែលមានសែនស័រកាមេរ៉ានៅពីក្រោមតែមិនឃើញមានទ្រនាប់ស្កែនក្រយ៉ៅម្រាមដៃនោះទេ។ តើ DBS ភ្លេចគិតដល់ជំនុចមួយនេះ ឬមានហេតុផលអ្វីផ្សេង ឬក៏ Galaxy S9+ នឹងបំពាក់បច្ចេកវិទ្យាស្កែនក្រយ៉ៅម្រាមដៃក្រោមកញ្ចក់អេក្រង់ នេះគ្រាន់តែជាការសន្និដ្ឋានរបស់ខ្ញុំតែប៉ុណ្ណោះមិនអាចយកជាការពិតបានឡើយ ម្ល៉ោះហើយមានតែចាំដល់ពេលពួលវាប្រកាសចេញជាផ្លូវការប៉ុណ្ណោះទើបអ្វីៗត្រូវបានបញ្ជាក់ច្បាស់លាស់។ បើតាមប្រភពព័ត៌មានចចាមអារ៉ាមចុងក្រោយបានឲ្យដឹងថា Samsung Galaxy S9 និង S9+ នឹងបង្ហាញខ្លួននៅលើឆាកក្នុងព្រឹត្តិការ Mobile World Congress 2018 នៅទីក្រុងបែកឡាំងប្រទេសអាល្លឺម៉ង់ខែក្រោយនេះ ហើយវាក៏នឹងចេញដាក់លក់ក្នុងទីផ្សារនៅថ្ងៃទី 16 ខែមីនា៕