ថ្មីៗនេះ យោងតាមរបាយការណ៍ថ្មីមួយ បានបញ្ជាក់ថា ក្រុមហ៊ុន LG Electronic ទំនងប្រហែលជាប្រកាសចេញនូវស្មាតហ្វូនជំនាន់ថ្មីរបស់ LG V30 នៅក្នុងព្រឹត្តិការណ៍ MWC 2018 ខាងមុខនេះ។ យោងតាមប្រភពមួយដែលផ្សាយចេញពី The Korea Herald បានបង្ហាញថា ស្មាតហ្វូនស៊េរីថ្មីនេះមានការពង្រឹងទៅលើសមត្ថភាពទៅលើ AI ហើយស្មាតហ្វូនជំនាន់ថ្មីនេះ ប្រហែលជាមានឈ្មោះថា "V30+ α"។ ព័ត៌មានថ្មីនេះ គឺមិនទាន់បង្ហាញអំពីមុខងារច្បាស់លាស់នៃបច្ចេកវិទ្យាAI នៅឡើយទេ ប៉ុន្តែក្រុមហ៊ុន LG ប្រហែលជាដំណើរការមុខងារនេះ សម្រាប់ដំណើរការជាមួយនឹងក្រុមហ៊ុន Google តែម្តង។
ថ្មីៗនេះ ការផ្លាស់ប្តូរយុទ្ធសាស្រ្តរបស់ក្រុមហ៊ុន LG Mobile ប្រហែលជាអាចទៅរួច ពីព្រោះថា ក្រុមហ៊ុន LG តែងតែប្រើប្រាស់នូវព្រឹត្តិការណ៍ MWC នៅក្នុងទីក្រុងបាសេឡូណា ដើម្បីធ្វើការប្រកាសចេញនូវស្មាតហ្វូនស៊េរីថ្មី ម៉ូដែលចុងក្រោយរបស់ប្រភេទ G-Series។ នៅក្នុងព្រឹត្តិការណ៍ CES 2018 កន្លងទៅនេះ លោក Jo Seong-Jin នាយកប្រតិបត្តិរបស់ក្រុមហ៊ុន LG បានអះអាងថា ក្រុមហ៊ុនរបស់លោក នឹងធ្វើការប្រកាសបង្ហាញនូវស្មាតហ្វូនស៊េរីថ្មីសម្រាប់ធ្វើការប្រកួតប្រជែងជាមួយនឹងក្រុមហ៊ុនស្មាតហ្វូនជាច្រើនទៀតនៅលើទីផ្សារ។
បន្ថែមពីនេះទៀត ក៏មានពាក្យចចាមអារ៉ាមជាច្រើន បានបញ្ជាក់ថា លោក Jo Seong-Jin បានបញ្ជាទៅកាន់ក្រុមការងាររបស់គាត់ ដើម្បីធ្វើការអភិវឌ្ឍទៅលើស្មាតហ្វូន LG G7 ហើយកាលបរិច្ឆេទនៃការដាក់លក់ស្មាតហ្វូននេះគឺមានរយៈពេលមួយខែ ឬអាចច្រើនជាងនេះ។ ក្រោយព្រឹត្តិការណ៍ CES 2018 កន្លងទៅ ក្រុមហ៊ុន LG ក៏មានការផែនការជាច្រើនក្នុងការប្រកាសខចេញនូវស្មាតហ្វូនស៊េរីថ្មីជាច្រើន ម៉ូដែលផ្សេងទៀតផងដែរ។ សម្រាប់ស្មាតហ្វូន LG V30 គឺជាស្មាតហ្វូនស៊េរីថ្មីចុងក្រោយបំផុត ហើយវាក៏ជាស្មាតហ្វូនដំបូងបំផុត ដែលមានការពង្រឹងសមត្ថភាពកាន់តែច្រើនបន្ថែមទៀតនៅក្នុងឆ្នាំ 2018 ខាងមុខនេះ៕