កាលពីម្សិលមិញនេះ យើងទទួលបានរូបភាព 3D Renders របស់ស្មាតហ្វូនស៊េរីថ្មី Huawei P20 Lite ដែលផ្តល់នូវគំនិតថ្មីមួយទៀត អំពីរូបរាងរបស់ស្មាតហ្វូននេះ។ នៅថ្ងៃនេះ យើងក៏ទទួលបាននូវរូបភាព 3D Renders របស់ស្មាតហ្វូនថ្នាក់ខ្ពស់ P20 Plus វិញម្តង។ តាមរយៈការបែកធ្លាយនៅក្នុង @OnLeaks ក្រុមហ៊ុន Huawei បញ្ចេញនូវគំរូចំនួន 2 របស់ស្មាតហ្វូន Huawei P20 និង Huawei P20 Plus។ សម្រាប់គំរូទីមួយរបស់ស្មាតហ្វូននេះគឺមានប៊ូតុង Home ជាមួយនឹងប្រព័ន្ធស្កេនក្រយ៉ៅដៃ ខណៈពេលដែលម៉ូដែលមួយទៀត គឺមិនមានប្រព័ន្ធស្កេនក្រយ៉ៅដៃនៅផ្នែកខាងមុខនោះទេ។
ស្មាតហ្វូន Huawei P20 Plus ត្រូវគេដឹងថានឹងមានអេក្រង់ទំហំ 6 អ៊ីង ជាមួយនឹងវិមាត្រ 155.3x74.2x7.7mm។ ស្មាតហ្វូន P20 Plus នឹងមាន Notch នៅលើអេក្រង់សម្រាប់ដាក់នូវកាមេរ៉ា សេនស័រ និងឧបាល័របំពងសំឡេងថែមទៀត ស្របពេលដែលផ្នែកខាងក្រោមគឺនៅមានស៊ុមព័ទ្ធអេក្រង់ក្រាស់ដដែល។ នៅផ្នែកខាងក្រោយគឺពិតជាអស្ចារ្យដោយសារតែក្រុមហ៊ុនបច្ចេកវិទ្យា Huawei នឹងប្រើប្រាស់នូវកាមេរ៉ាស្ទាយ៍ដូចគ្នាទៅនឹង iPhone X ដែរ។ កាមេរ៉ាខាងក្រោយរបស់ស្មាតហ្វូននេះមានដល់ទៅ 3 គ្រាប់ដែលកាមេរ៉ាទី 3 មានទំហំធំជាងគេ។ វាមានពាក្យចចាមអារ៉ាមបញ្ជាក់ថា វានឹងមានភ្លើង LED Flash នៅផ្នែកខាងក្រោមកាមេរ៉ាទី 3 នេះផងដែរ។
ផ្នែកខាងក្រោយរបស់ស្មាតហ្វូននេះ បានធ្វើពីកញ្ចក់ ហើយនៅក្រោមខាងឆ្វេង គេសង្កេតឃើញថា មានម៉ាកយីហោរបស់ក្រុមហ៊ុន Huawei ។ ស្មាតហ្វូននេះប្រើប្រាស់នូវ USB-C port។ ស្មាតហ្វូន Huawei P20 Plus នឹងបំពាក់នូវបន្ទះឈីប Kirin 970 ហើយកាមេរ៉ាមួយគ្រាប់ នឹងមានសមត្ថភាពក្នុងការថត 5x zoom ហើយកាមេរ៉ាខាងមុខវិញមានទំហំដល់ទៅ 24MP។ ក្រុមហ៊ុន Huawei ក៏បានត្រៀមនឹងរៀបចំនូវព្រឹត្តិការណ៍មួយនៅថ្ងៃទី 27 ខែមីនាខាងមុខនេះ សម្រាប់ការសម្ភោធស្មាតហ្វូន P-Series នៅក្នុងទីក្រុងប៉ារីសនៃប្រទេសបារាំងថែមទៀតផង៕