Moto G6 Plus គឺជាស្មាតហ្វូនស៊េរីថ្មីមួយក្នុងចំណោមស្មាតហ្វូនស៊េរីថ្មីជាច្រើនរបស់ក្រុមហ៊ុនបច្ចេកវិទ្យា Motorola ដែលមានគម្រោងក្នុងការប្រកាសបង្ហាញខ្លួនជាផ្លូវការនៅក្នុងឆមាសទី 1 ឆ្នាំនេះ។ ស្មាតហ្វូននេះនឹងបង្ហាញខ្លួនក្នុងចំណោមផលិតផលបច្ចេកវិទ្យាជាច្រើននៅក្នុងព្រឹត្តិការណ៍ Mobile World Congress (MWC) 2018 នៅក្នុងខែកុម្ភៈនេះ ហើយវានឹងដាក់លក់នៅចុងនិទាឃរដូវនេះផងដែរ។
សម្រាប់ស្មាតហ្វូនស៊េរីថ្មីជាច្រើនសម្រាប់ឆ្នាំ 2018 នេះបែកធ្លាយជាបន្តបន្ទាប់តាំងពីខែមករាមកម្ល៉េះ។ យ៉ាងហោចណាស់ស្មាតហ្វូនថ្នាក់ខ្ពស់ និងស្មាតហ្វូនថ្នាក់កណ្តាលចំនួន 3 ម៉ូដែលនឹងបង្ហាញខ្លួននៅក្នុងឆ្នាំនេះមានដូចជា Moto G6, Moto G6 Plus និង Moto G6 Play ។ សម្រាប់ព័ត៌មានលម្អិតរបស់ស្មាតហ្វូនស៊េរីថ្មីនេះបែកធ្លាយកាលពីខែមុននេះជាមួយនឹងរូបភាពរបស់វាផងដែរ។
ស្មាតហ្វូន Moto G6 Plus ត្រូវគេរំពឹងថា នឹងបង្ហាញខ្លួនជាមួយពណ៌ជាច្រើនសម្រាប់ធ្វើការជ្រើសរើស ហើយនៅលើរូបភាពនេះអ្នកអាចមើលឃើញនូវពណ៌ខៀវ ពណ៌ស្លែរ ពណ៌មាស ពណ៌ទឹកប្រាក់ និងពណ៌សផងដែរ។ លោកអ្នកប្រហែលជាដឹងហើយថា ស្មាតហ្វូន Moto G6 Plus នឹងភ្ជាប់ជាមួយនឹងបន្ទះឈីប Snapdragon 630 processor និងរ៉េមផ្ទុកទិន្នន័យបណ្តោះអាសន្នទំហំ 3GB/4GB/6GB RAM ។ ស្មាតហ្វូននេះមានអេក្រង់ទំហំ 5.93 អ៊ីញជាមួយនឹងកម្រិតអេក្រង់ FHD+ display 18:9 aspect ratio ហើយនៅផ្នែកខាងក្រោយគេសង្កេតឃើញមានប្រព័ន្ធស្កេនក្រយ៉ៅដៃ និងប្រព័ន្ធកាមេរ៉ាភ្លោះផងដែរ។
Moto G6 Plus ត្រូវរំពឹងថា នឹងដាក់លក់នៅក្នុងតម្លៃប្រហែលជា $330 ប៉ុន្តែតម្លៃខ្ពស់ជាងនេះ អាស្រ័យទៅលើជម្រើសមួយណាដែលអ្នកចង់ទិញនោះ។ យើងនៅមិនទាន់ដឹងអំពីកាលបរិច្ឆេទនៃការដាក់លក់ជាផ្លូវការនៅឡើយទេរបស់ស្មាតហ្វូននេះ៕
