យោងតាមប្រភពមួយដែលចេញពីខាងក្នុងក្រុមហ៊ុន ដែលបានបញ្ជាក់កាលពីថ្ងៃទី 21 ខែកុម្ភៈ ម្សិលមិញនេះ បានបញ្ជាក់ថា ស្មាតហ្វូនស៊េរីថ្មី Galaxy S9 និង Galaxy S9+ របស់ក្រុមហ៊ុន Samsung Electronics នឹងដាក់លក់នៅលើទីផ្សារពិភពលោកនៅថ្ងៃទី 16 ខែមីនាខាងមុខនេះហើយ។ នៅក្នុងប្រទេសកូរ៉េ ក្រុមហ៊ុនបច្ចេកវិទ្យាយក្សនេះនឹងចាប់ផ្តើម បើកអោយមានការកម្មង់ទិញមុនសម្រាប់ស្មាតហ្វូនទាំងពីរនេះ តាមរយៈក្រុមហ៊ុន SK Telecom, KT និង LG Uplus នៅថ្ងៃទី 28 ខែកុម្ភៈនេះតទៅ។ សម្រាប់អតិថិជន ដែលធ្វើការកម្មង់ទិញមុនទៅលើស្មាតហ្វូន Galaxy នេះអាចទទួលស្មាតហ្វូនរបស់គេនៅចន្លោះថ្ងៃទី 9 ដល់ថ្ងៃទី 15 ខាងមុខនេះ។
បុគ្គលិកម្នាក់ បាននិយាយថា “ថ្មីៗនេះ ក្រុមហ៊ុន Samsung បានផ្ញើរនូវលិខិតសម្រាប់ការកម្មង់ទិញមុន និងកាលបរិច្ឆេទទៅកាន់ក្រុមហ៊ុនចែកចាយស្មាតហ្វូនរួចរាល់ហើយ។” សម្រាប់លក្ខណៈសម្បត្តិមួយចំនួនសំខាន់ៗ របស់ស្មាតហ្វូនទាំងពីរនេះ ក៏ត្រូវគេដឹងផងដែរថា ស្មាតហ្វូន Galaxy S9 នឹងមានអេក្រង់ទំហំ 5.8 អ៊ីង ខណៈពេលដែលស្មាតហ្វូន Galaxy S9+ នឹងមានអេក្រង់ទំហំ 6.2 អ៊ីង ហើយនឹងប្រើប្រាស់ប្រព័ន្ធស្កេនប្រស្រីភ្នែក បច្ចេកវិទ្យាស្កេនមុខ បច្ចេកវិទ្យា Samsung Pay និងការពង្រឹងសមត្ថភាពនៃ Bixby ផងដែរ។
ស្មាតហ្វូន Galaxy S9 និង Galaxy S9+ ត្រូវបានគេដឹងថា នឹងប្រើប្រាស់កាមេរ៉ាខាងមុខទំហំ 8MP និងកាមេរ៉ាខាងក្រោយទំហំ 12MP ស្របពេលដែលស្មាតហ្វូន Galaxy S9+ នឹងមានប្រព័ន្ធកាមេរ៉ាភ្លោះទំហំ 12MP ដូចគ្នា។ ស្មាតហ្វូននេះ នៅតែប្រើប្រាស់ប្រព័ន្ធស្កេនក្រយ៉ៅដៃនៅខាងក្រោយក្រោមកាមេរ៉ា។ ៕
