កាលពីចុងខែមករា កន្លងទៅនេះ ក្រុមហ៊ុន Samsung បានប្រកាសជាផ្លូវការពីថ្ងៃសម្ពោធ ត្រកូល Galaxy ថ្មីមួយ ដែលគេជឿជាក់ថា ជា Galaxy S9 /S9+។ ខាងក្រោមជាចំណុចពិសេសទាក់ទងទៅលក្ខណៈសម្បត្តិរបស់ទូរស័ព្ទ Galaxy S9 | S9+ ថ្ងៃសម្ពោធ តំលៃ និងព័ត៌មានចចាមរាមជាច្រើនទៀត។
•ថ្ងៃប្រកាសសម្ពោធទូរស័ព្ទ Galaxy S9/S9+៖
កម្មវិធីនឹងចាប់ផ្តើមនៅម៉ោង 12 រំលាងអធ្រាត ចូលថ្ងៃទី 26 កុម្ភៈ ក្រុមហ៊ុន សាមសុង នឹងប្រកាសសម្ពោធទូរស័ព្ទស៊េរីថ្មីនេះ ក្នុងកម្មវិធីប្រជុំសមាជទូរស័ព្ទពិភពលោក នាទីក្រុងប៉ាសេឡូណា ប្រទេសអេស្ប៉ាញ។ អ្នកអាចទស្សនាការផ្សាយបន្តផ្ទាល់ តាមរយៈតំណខាងក្រោម៖ http://www.samsung.com/global/galaxy/events/unpacked/
•លក្ខណៈសម្បត្តិរបស់ទូរស័ព្ទ៖
នៅដើមសប្តាហ៍នេះ រូបភាពមួយចំនួនរបស់ Galaxy S9/S9+ បានបែកធ្លាយដែលគេអាចសន្មត់ថា ទូរស័ព្ទដៃមួយនេះ មានទំហំអេក្រង់ 5.7 អ៊ីង អេក្រង់គ្មានគែម Full Infinity Display, RAM 4GB, សិនស័រសម្រាប់ស្កេនម្រាមដៃត្រូវបានដាក់ខាងក្រោយចំកណ្តាល និងបំពាក់ Speaker AKG ដ៏ទាន់សម័យទំនើបបំផុត។ តាមរយៈ វីដេអូ 30 វិនាទី បង្ហាញថាចំណុចពិសេសរបស់ ត្រកូល Galaxy ជំនាន់ទី 9 នេះ គឺទាក់ទងនឹងកាមេរ៉ា និង 3D Emoji។ ទូរស័ព្ទ S9/S9+ ត្រូវបានគេដឹងថា បំពាក់កាមេរ៉ាភ្លោះ ដែលអាចថតវីដេអូ ‘super slo-mo’ ដ៏ឡួយបំផុត។
ព័ត៌មានខាងលើបញ្ជាក់ថា ទូរស័ព្ទ Galaxy S9/S9+ នឹងភ្ជាប់ជាមួយរន្ធដោតកាស និងរន្ធ Bixby។ ចំពោះពណ៌ មានជម្រើសដល់ទៅ 4 ពណ៌ គឺ៖ ពណ៌ទឹកសមុទ្រ ខ្មៅស្វាយ និងប្រផេះ។ សម្រាប់ការកក់ទិញទុកមុននឹងធ្វើឡើងចាប់ពីថ្ងៃទី 1 មីនា និងបានទូរស័ព្ទប្រើប្រាស់នៅថ្ងៃទី 16 មីនា នៅសហរដ្ឋអាមេរិក។ ចំពោះការកក់ទិញទុកនៅប្រទេសកម្ពុជា គឺប្រហែលជាពាក់កណ្តាលខែ មីនា ហើយទូរស័ព្ទមួយនេះ ត្រូវគេប៉ាន់តំលៃប្រមាណជាង 800 ដុល្លា៕