កាលពីខែកញ្ញាឆ្នាំ 2017 កន្លងទៅនេះ ក្រុមហ៊ុន Xiaomi ទើបតែបានប្រកាសចេញនូវស្មាតហ្វូន Mi 5X ដែលដាក់លក់ផ្តាច់មុខនៅក្នុងប្រទេសចិន។ ស្មាតហ្វូនដូចគ្នានេះដែរ ក៏ត្រូវបានគេដាក់លក់នៅជុំវិញពិភពលោកដូចជា Mi A1 ដែលជាស្មាតហ្វូន Android One ដំបូងបំផុត របស់ក្រុមហ៊ុនចិនមួយនេះ ។ នៅពេលនេះ មានបែកធ្លាយពាក្យចចាមអារ៉ាមជាច្រើន ដោយបានបញ្ជាក់ថា ក្រុមហ៊ុនបច្ចេកវិទ្យានេះ ចាប់ផ្តើមរួចហើយក្នុងការដំណើរការទៅលើស្មាតហ្វូន Mi 6X ។
ព័ត៌មានបែកធ្លាយជាច្រើន បានទម្លាយអំពីការរចនាទៅលើស្មាតហ្វូនស៊េរីថ្មីនេះ ហើយដូចគ្នាទៅនឹងស្មាតហ្វូន Mi A1 ដែរ ស្មាតហ្វូន Mi 6X ត្រូវបានគេហៅជាអន្តរជាតិថា Mi A2។ ក្រុមអ្នករចនាម៉ូដនៅ Tech Configurations ទើបតែបង្កើតនូវគំនិតថ្មីសម្រាប់ស្មាតហ្វូន Mi A2 ដោយផ្អែកទៅលើព័ត៌មាននៃពាក្យចចាមអារ៉ាមរបស់វានោះ។ គំនិតនៃការរចនាទៅលើស្មាតហ្វូន Xiaomi Mi A2 គឺមានការប្រើប្រាស់អេក្រង់ពេញលេញ ការប្រើប្រាស់ស៊ុមព័ទ្ធអេក្រង់ស្តើងផ្នែកខាងលើ និងផ្នែកខាងក្រោមដែលស្តើងជាងស្មាតហ្វូន Mi A1 ។ នៅផ្នែកខាងលើ គេសង្កេតឃើញមានកាមេរ៉ា Selfie ទំហំ 20MP ដែលភ្ជាប់មកជាមួយ LED flash, f/2.2 aperture និង Smart Beauty 4.0 ដូចគ្នាទៅនឹងស្មាតហ្វូន Redmi Note 5 Pro ដែលមានសមត្ថភាពក្នុងការថតរូបភាព Selfie ជាមួយនឹងបច្ចេកវិទ្យា AI ។
ប្រព័ន្ធស្កេនក្រយ៉ៅដៃរបស់ស្មាតហ្វូននេះ គឺស្ថិតនៅផ្នែកខាងក្រោយរបស់ស្មាតហ្វូន Mi A1 ។ ស្មាតហ្វូននេះបំពាក់នូវប្រព័ន្ធកាមេរ៉ាភ្លោះដែលមានភ្លើង LED Flash ភ្ជាប់មកជាមួយផងដែរ។ កាមេរ៉ាភ្លោះនេះមានទំហំ 12MP + 5MP ភ្ជាប់ជាមួយនឹងមុខងារ f/2.2 aperture lens, PDAF និង OIS ។ ស្មាតហ្វូន Mi A2 មានអេក្រង់ទំហំ 6 អ៊ីញកម្រិតភាពច្បាស់ FHD+ resolution និង18:9 aspect ratio ផងដែរ។
ស្មាតហ្វូន Mi A2 នឹងប្រើប្រាស់នូវបន្ទះឈីប Snapdragon 636 ដែលធ្លាប់ដាក់ឱ្យដំណើរការនៅលើស្មាតហ្វូន Redmi Note 5 Pro ។ ស្មាតហ្វូននេះមានរ៉េមផ្ទុកទិន្នន័យទំហំ 4GB/32GB និង 6GB/64GB ។ នៅផ្នែកខាងក្រោមរបស់ស្មាតហ្វូននេះគឺមានរន្ធដោតកាសស្តាប់ 3.5mm audio jack, USB-C និងឧបាល័រសំឡេងផងដែរ។ ស្មាតហ្វូននេះមានពណ៌ទឹកប្រាក់ ពណ៌ក្រហម និងពណ៌ខ្មៅ៕