ចាប់តាំងពីការទិញយកក្រុមហ៊ុន Nokia តាមរយៈក្រុមហ៊ុនបច្ចេកវិទ្យា HMD Global របស់ប្រទេសហ្វាំងឡងម៉ាកយីហោរបស់ក្រុមហ៊ុន Nokia ចាប់ផ្តើមងើបឡើងមកវិញហើយ។ពេលនេះតាមទិន្នន័យស្រាវជ្រាវរបស់ Counterpoint research បង្ហាញថាម៉ាកយីហោរបស់ក្រុមហ៊ុន Nokia ដំណើរការយ៉ាងល្អនៅក្នុងឆ្នាំនេះ។ក្រុមហ៊ុន Nokia លក់ស្មាតហ្វូនបានចំនួន 4.4 លានគ្រឿងនៅក្នុងត្រីមាសទី 4 ឆ្នាំ 2017 នេះ។
បើទោះបីនេះមិនមែនជាតួរលេខច្រើនខ្លាំងក្លាក៏ដោយវាក៏នឹងធ្វើឱ្យលោកអ្នកមានការភ្ញាក់ផ្អើលដោយសារតែទិន្នន័យនេះខ្ពស់ជាងក្រុមហ៊ុន HTC, Sony, Google, Alcatel, Lenovo, OnePlus, Gionee, Meizu, Coolpad, Asus និងជាច្រើនទៀត។ក្រុមហ៊ុនបច្ចេកវិទ្យា HMD Global ពេលនេះមានចំនែកទីផ្សារសរុបចំនួន 5% នៃចំនែកទីផ្សារសរុបដែលមានចំណែកទីផ្សារទូរស័ព្ទថោកដល់ទៅ 15% និងចំនែកទីផ្សារ 1% នៃស្មាតហ្វូន។នេះពិតជាគួរឱ្យចាប់អារម្មណ៍ខ្លាំងក្លាមែនទែនបន្ទាប់ពីក្រុមហ៊ុននេះរងការឈឺចាប់អស់រយៈពេលជាច្រើនឆ្នាំមកហើយនោះ។
Nokia គឺជាក្រុមហ៊ុនផលិតទូរស័ព្ទតម្លៃធូរថ្លៃនាំមុខគេនៅលើពិភពលោក។
មូលដ្ឋានរឹងមាំខ្លាំងក្លាជាងគេរបស់ក្រុមហ៊ុនបច្ចេកវិទ្យា Nokia គឺនៅក្នុងចក្រភពអង់គ្លេសប៉ុន្តែវាក៏មានភាពរឹងមាំនៅក្នុងទីផ្សារអ៊ឺរ៉ុបនិងមជ្ឍឹមបូព៌ាដែលជួយឱ្យក្រុមហ៊ុនបច្ចេកវិទ្យានេះមានការលក់កើនឡើងខ្លាំងក្លាវិញនោះ។សម្រាប់ទីផ្សារទូរស័ព្ទតម្លៃថោកពេលនេះមានភាពរឹងមាំដោយសារតែវត្តមានរបស់ Nokia 3310 ស៊េរីថ្មី។ក្រុមហ៊ុនបច្ចេកវិទ្យា Nokia នៅមិនទាន់ប្រកាសបង្ហាញស្មាតហ្វូនស៊េរីថ្មីរបស់ខ្លួននៅឡើយទេនៅឆ្នាំនេះប៉ុន្តែក្រុមហ៊ុននេះប្រហែលជាត្រៀមខ្លួនក្នុងការប្រកាសបង្ហាញនូវស្មាតហ្វូន Nokia 9, Nokia 7, Nokia 3310 LTE នៅក្នុងព្រឹត្តិការណ៍ MWC ខាងមុខនេះនៅទីក្រុងបាសេឡូណានៃប្រទេសអេស្ប៉ាញ។
