ក្រុមហ៊ុន HMD Global ដែលជាក្រុមហ៊ុនមេរបស់ Nokia គ្រោងប្រកាសចេញទូរស័ព្ទស្មាតហ្វូនដែលប្រើប្រព័ន្ធសេវា 4G នៅខែឧសភាក្នុងទីផ្សារប្រទេសឥណ្ឌាដោយសហការណ៍ជាមួយក្រុមហ៊ុនបណ្តាញទូរគមនាគមន៍ដ៏ធំបំផុតរបស់ឥណ្ឌាដែលមានឈ្មោះថា Reliance Industries’ JioPhone។ ក្រុមហ៊ុនទាំងពីបានសំឡឹងមើលឃើញថាមានអ្នកប្រើប្រាស់ទូរស័ព្ទចល័តប្រមាណ 500 លាននាក់ដែលពួកគេទាំងនោះមិនទាន់ចង់ផ្លាស់ប្តូរទៅប្រើទូរស័ព្ទប្រភេទស្មាតហ្វូនទៅឡើយទេដោយសារតែកត្តាតម្លៃ និងលទ្ធភាពរបស់ពួកគេនៅមានកម្រិត។
នាយកប្រត្តិបត្តិក្រុមហ៊ុន HMD លោក Florian Seiche បានប្រាប់ទៅកាន់កាសែត ET របស់ឥណ្ឌាថា ប្រទេសឥណ្ឌាគឺជាទីផ្សារមួយក្នុងចំណោមទីផ្សារធំៗទាំងបីដែលរកប្រាក់ចំណូលបានខ្ពស់ ហើយក្រុមហ៊ុនបានកំនត់គោលដៅរបស់ខ្លួនក្នុងការប្រគូតប្រជែងទីផ្សារដើម្បីឈរក្នុងតារាងក្រុមហ៊ុនកំពូលទាំងប្រាំនៅដំណាច់ឆ្នាំនេះ។ នាយកប្រតិបត្តិរូបនេះបាននិយាយទៀតថា ឆ្នាំនេះយើងបានកំនត់គោលដៅរបស់យើងដើម្បីធ្វើការវិនិយោគអោយកាន់តែខ្លាំងឡើងដើម្បីប្រគូតប្រជែងទីផ្សារ និងដណ្តើមចំនែកទីផ្សារក្នុងប្រទេសឥណ្ឌា។
យើងនឹងបង្កើនការលក់តាមរយះការផ្តល់ជូននូវអ្វីដែលជាតម្រូវការរបស់អតិថិជន និងបង្កើនសកម្មភាពទីផ្សារអោយកាន់ខ្លាំងក្លាជាងមុន។ យុទ្ធសាស្ត្រដ៏សំខាន់របស់យើងដើម្បីបង្កើនចំនែកទីផ្សារអោយរីកកាន់តែរហ័រគឺយើងនឹងធ្វើការប្រកាសចេញលក់នូវទូរស័ព្ទដំណើរការដោយប្រព័ន្ទ 4G ស៊េរី Nokia 8110 ដែលនឹងសហការណ៍ជាមួយដៃគូបណ្តាញទូរគមនាគមន៍ធំៗនៅខែឧសភាខាងមុខនេះ។ ជាងនេះទៅទៀតនៅខែក្រោយនេះក្រុមហ៊ុន Nokia គ្រោងប្រកាសចេញទូរស័ព្ទស្មាតហ្វូនជាច្រើនស៊េរីផងដែរក្នុងទីផ្សារប្រទេសឥណ្ឌារួមមាន Nokia 8 Sirocco, Nokia 7 Plus, Nokia 6 និង Nokia 1។
លោក Ajey Mehta អគ្គនាយកក្រុមហ៊ុន HMD Global ប្រចាំប្រទេសឥណ្ឌាបានមានប្រសាសន៍ ក្រុមហ៊ុនបានធ្វើការពិភាក្សារួចរាល់ហើយជាមួយដៃគូផលិតកម្ម Foxconn ជុំវិញការបង្កើនចង្វាក់ផលិតកម្មស្មាតហ្វូន និងទូរស័ព្ទចល័តដែលមានមុខងារទំនើបនៅក្នុងប្រទេសឥណ្ឌា។ លោក Mehta បន្តថា ក្រៅពីនេះក្រុមហ៊ុនរបស់ខ្លួនបានបង្កើនហាងលក់រាយប្រមាណ 10% បន្ថែមទៀតដោយបច្ចុប្បន្ននេះយើងមានហាងលក់រាយប្រមាណ 110,000 ហាង និងតំណាងចែកចាយចំនួន 510 ។
សម្រាប់ក្រុមហ៊ុនយើងបណ្តាហាងលក់រាយគឺជាអាជីវកម្មស្នូលដែលជម្រុញអោយអាជីវកម្មរបស់យើងបន្តកើនឡើងជាលំដាប់។ ក្រៅតែបានបង្កើនហាក់លក់របស់ខ្លួនក្នុងនោះក្រុមហ៊ុនក៏បានធ្វើការពិភាក្សាជាមួយបណ្តាហាងលក់ជាច្រើនទៀតដើម្បីពង្រីកម៉ាកសញ្ញារបស់យើងអោយកាន់តែខ្លាំងក្លាផងដែរ។ សម្រាប់ការលក់នៅលើប្រព័ន្ធអនឡាញក្រុមហ៊ុនមានតែប្រមាណ 30% ប៉ុណ្ណោះក្នុងទីផ្សារប៉ុន្តែទោះជាយ៉ាងណាវាគឺជាផ្នែកដ៏សំខាន់មួយក្នុងការជម្រុញអោយអជីវកម្មរបស់យើងអោយកាន់តែមានភាពល្អប្រសើរទ្វេរឡើង។
ប្រសិនបើយើងចង់ក្លាយជាក្រុមហ៊ុនដែលមានការប្រគូតប្រជែងខ្ពស់យើងត្រូវតែមានការផ្សព្វផ្សាយទាំងនៅលើប្រព័ន្ធអេឡិចត្រូនិក (e-commerce) និងនៅលើអនឡាញ (Online)។ ជាងនេះទៅទៀតកត្តាតម្លៃយើងក៏ត្រូវគិតផងដែរដោយ Nokia បានកំនត់តម្លៃផលបត្រគ្រឹះគឺ 100 ដុល្លារអាមេរិកប្រហែល 6,500 រ៉ូពី នេះបើតាមការបញ្ជាក់បន្ថែមពីលោក Florian Seiche៕