កាលពីខែមុននេះ ស្មាតហ្វូនស៊េរីថ្មីរបស់ក្រុមហ៊ុន Huawei ដែលមានលេខម៉ូដែល NEO-AL00 បានបង្ហាញខ្លួននៅលើ TENAA ប៉ុន្តែលក្ខណៈសម្បត្តិជាច្រើន និងរូបភាពរបសស្មាតហ្វូនស៊េរីថ្មីនេះនៅមិនទាន់ដឹងនៅឡើយទេនៅពេលនោះ។ ពេលនេះ នៅក្នុងបញ្ជីរបស់លេខម៉ូដែល NEO-AL00 គឺធ្វើការអាប់ឌែត ប៉ុន្តែលក្ខណៈសម្បត្តិរបស់ស្មាតហ្វូននេះ នៅមិនទាន់ដឹងនៅឡើយដែរ។ នៅដើមខែនេះ បញ្ជីនេះ ក៏ធ្វើការអាប់ឌែតជាមួយនឹងការផ្លាស់ប្តូរទៅលើការរចនារូបរាងថ្មី។ សម្រាប់រឿងនេះ យើងគិតថា ស្មាតហ្វូនស៊េរីថ្មីនេះ គឺស្ថិតនៅក្នុងការអភិវឌ្ឍនៅឡើយទេ។
ការអាប់ឌែតចុងក្រោយបំផុតនៃបញ្ជីនេះ បានទម្លាយថា លេខម៉ូដែល NEO-AL00 គឺមានរ៉េមទំហំ 6GB និងម៉េមូរីក្នុងម៉ាស៊ីនទំហំ 512GB នោះ។ សម្រាប់ការប្រើប្រាស់ទំហំម៉េមូរីដល់ទៅ 512GB នៅលើស្មាតហ្វូន គឺជារឿងដំបូងបំផុតមិនធ្លាប់មាននោះទេ។ នៅក្នុងខែធ្នូ ឆ្នាំ 2017 នេះ ក្រុមហ៊ុន Samsung ក៏បានប្រកាសអំពីការចាប់ផ្តើមនូវការផលិតទ្រង់ទ្រាយធំទៅលើម៉េមូរីក្នុងម៉ាស៊ីន UFS នៅលើស្មាតហ្វូនដំបូងបំផុតដែលមានទំហំ 512GB នោះផងដែរ។ ប្រសិនបើក្រុមហ៊ុន Samsung គឺជាក្រុមហ៊ុនតែមួយគត់ក្នុងការផ្តល់នូវម៉េមូរីទំហំ 512GB នោះ នៅលើស្មាតហ្វូន ក្រុមហ៊ុននេះ គឺពិតជាមិនទុកឱកាសក្នុងការប្រកាសនូវស្មាតហ្វូនស៊េរីថ្មីរបស់ខ្លួននោះទេ។
ស្របពេលដែលក្រុមហ៊ុន Huawei នឹងផ្តល់នូវដំណោះស្រាយក្នុងការផ្ទុកទិន្នន័យធំបែបនេះនោះ យើងនៅមិនទាន់ដឹងថាតើ ក្រុមហ៊ុននេះមានរោងចក្រក្នុងការផលិតនូវបន្ទះឈីបធំបែបនេះហើយឬនៅនោះទេ។ រហូតមកទល់ពេលនេះ យើងនៅមិនទាន់ដឹងអំពីព័ត៌មានផ្សេងទៀតរបស់ស្មាតហ្វូនដែលមានលេខកូដ NEO-AL00 នៅឡើយទេ។ ប្រសិនបើពាក្យចចាមអារ៉ាមនេះ គឺជារឿងពិតនោះ ក្រុមហ៊ុននេះ ទំនងប្រហែលជាកំពុងតែធ្វើការនៅលើស្មាតហ្វូនស៊េរីថ្មីស៊េរី Mate Series ដែលមានឈ្មោះហៅថា Huawei Mate X នោះ។ កាលពីខែមុននេះ ក្រុមហ៊ុនបច្ចេកវិទ្យានេះក៏ធ្វើការស្នើនូវម៉ាក Trademark នៅលើ “MateX” នៅក្នុងទ្វីបអ៊ឺរ៉ុប។
ដូចអ្វិដែលយើងគ្រប់គ្នាដឹងហើយនោះ ក្រុមហ៊ុន Huawei គឺត្រៀមខ្លួនក្នុងការប្រកាសចេញនូវស្មាតហ្វូនស៊េរីថ្មីជាច្រើនស៊េរីនៅក្នុងឆ្នាំ 2018 នេះគឺនៅថ្ងៃទី 27 ខែមីនានៅក្នុងទីក្រុងប៉ារីសប្រទេសបារាំង។ ក្រុមហ៊ុនបច្ចេកវិទ្យានេះ នឹងបង្ហាញនូវស្មាតហ្វូន Huawei P20 និង P20 Pro ។ ស្មាតហ្វូន Huawei P20 Pro នឹងប្រើប្រាស់នូវកាមេរ៉ាចំនួន 3 គ្រាប់ដូចជា 40MP RGB sensor, 20MP Monochrome sensor និង 8MP Telephoto sensor នោះ។ ក្រុមហ៊ុនបច្ចេកវិទ្យានេះ ក៏នឹងប្រកាសបង្ហាញនូវស្មាតហ្វូន Porsche Design Huawei P20 limited edition ផងដែរសម្រាប់ជាជម្រើស៕