ក្រុមហ៊ុន LG នឹងធ្វើការបង្ហាញនូវស្មាតហ្វូនដំបូងបំផុតរបស់ខ្លួនដែលប្រើប្រាស់នូវ Notch ដែលមានរូបរាងស្រដៀងគ្នាទៅនឹង iPhone X ឬ Essential Phone នោះ។ ក្រុមហ៊ុននេះបានបញ្ជាក់រួចមកហើយថា ឈ្មោះរបស់ស្មាតហ្វូននេះគឺ G7 ThinQ ហើយយើងក៏ធ្លាប់បានឃើញនូវរូបភាព Renders និងរូបភាពជាច្រើនសន្លឹករបស់ស្មាតហ្វូននេះផងដែរ។ ពេលនេះ រូបភាពបែកធ្លាយថ្មីរបស់ស្មាតហ្វូន LG G7 ThinQ បានបង្ហាញនូវរូបរាងកាន់តែស្អាតរបស់ស្មាតហ្វូននេះផងដែរ។
តាមរយៈការទម្លាយរបស់ Evan Blass រូបភាពរបស់ស្មាតហ្វូន G7 ThinQ ដែលឃើញនេះ គឺជាវត្តមានរបស់ស្មាតហ្វូនស៊េរីថ្មីរបស់ក្រុមហ៊ុន LG ។ វាគឺជាស្មាតហ្វូនស៊េរីថ្មីដែលប្រើប្រាស់នូវប៊ូតុង power នៅគែមផ្នែកខាងស្តាំ ហើយវាស្រដៀងគ្នាទៅនឹងរូបភាព Renders របស់ G7 ThinQ ដែលបែកធ្លាយកាលពីសប្តាហ៍មុននេះផងដែរ។ ស្មាតហ្វូននេះមានលក្ខណៈខុសប្លែកពីស្មាតហ្វូន LG G6 និង LG V30 ។ ស្មាតហ្វូន G7 ThinQ ក៏មានប្រើប្រាស់នូវប្រព័ន្ធស្កេនក្រយ៉ៅដៃនៅផ្នែកខាងក្រោយដែលជិតប្រព័ន្ធកាមេរ៉ាភ្លោះ និងភ្លើង LED Flash និង Laser Auto Focus ផងដែរ។
ស្មាតហ្វូន G7 ThinQ នឹងបង្ហាញនៅខែក្រោយនេះ នៅថ្ងៃទី 2 ខែឧសភា។ យោងតាមពាក្យចចាមអារ៉ាមជាច្រើនទៀត បានបញ្ជាក់ថា ស្មាតហ្វូននេះនឹងប្រើប្រាស់នូវ Software ថ្មីៗ សម្រាប់ដំណើរការនៅលើ Notch នេះ។ ដូចគ្នាទៅនឹងស្មាតហ្វូន LG V30S ThinQ (ប្រកាសបង្ហាញខ្លួននៅក្នុងខែកុម្ភៈ) ស្មាតហ្វូន G7 ThinQ នឹងប្រើប្រាស់បច្ចេកវិទ្យា AI សម្រាប់ដំណើរការនៅលើកាមេរ៉ា ការបញ្ជាជាសំឡេង និងជាច្រើនទៀត៕
