យោងតាមបណ្តាញផ្សព្វផ្សាយ www.gizmochina.com បានចេញកាលពីម្សិលមិញនេះ ក្រុមហ៊ុន Huawei ដែលជាក្រុមហ៊ុនផលិតផលស្មាតហ្វូនរបស់ដ៏ធំរបស់ប្រទេសចិន បានរកប្រាក់ចំណូលបានដល់ទៅ 15 លានដុល្លារអាមេរិក នៅក្នុងរយៈពេលត្រឹមតែ 10 វិនាទីនៅក្នុងការដាក់លក់ Huawei P20 & P20 Pro ជាលើកដំបូងរបស់ខ្លួន។ ស្មាតហ្វូន P20 និង P20 Pro ត្រូវបានក្រុមហ៊ុនដាក់លក់ហើយនៅក្នុងប្រទេសចិន កាលពីថ្ងៃព្រហស្បតិ៍កាលពីសប្តាហ៍មុននេះ ហើយក៏មានដាក់លក់នៅក្នុងកម្មវិធី Flash Sale ផងដែរ។ ប្រភពខាងលើនេះ បានបញ្ជាក់បន្ថែមថា ក្រុមហ៊ុន Huawei មានគោលដៅក្នុងការលក់ស្មាតហ្វូនស៊េរីថ្មីចុងក្រោយ P20 និង P20 Pro របស់ខ្លួនចំនួន 20 លានគ្រឿង ។
យើងនៅមិនទាន់ដឹងអំពីចំនួនជាក់លាក់នៃការលក់ស្មាតហ្វូនស៊េរីថ្មីនេះ នៅក្នុងព្រឹត្តិការណ៍លក់ Flash Sale នេះទេ ប៉ុន្តែបើសិនជាការរកប្រាក់ចំណូលដល់ទៅ 15 លានដុល្លារនេះ គឺពិតជាលក់នៅក្នុងចំនួនច្រើនណាស់។ ប្រាក់ចំណូលដ៏គួរឱ្យភ្ញាក់ផ្អើល ដែលបានមកពីការលក់ស្មាតហ្វូនស៊េរីថ្មីនេះ នឹងអាចអោយយើងដឹងបានថា មិនយូរទេស្មាតហ្វូនស៊េរីថ្មីទាំងពីរនេះ នឹងដាក់លក់នៅលើទីផ្សារជាច្រើនទៀតជាមួយនឹងកំនើនលឿនបែបនេះនោះ ។ ស្មាតហ្វូន P20 Pro ត្រូវបានគេរំពឹងថា នឹងលក់ដាច់ច្រើនជាង ដោយសារតែការរចនារូបរាង និងការប្រើប្រាស់នូវប្រព័ន្ធកាមេរ៉ា 3 គ្រាប់របស់វានោះ។
គួរបញ្ជាក់ផងដែរថា ស្មាតហ្វូន Huawei P20 បានដាក់លក់នៅក្នុងតម្លៃ 3700 យន់ ដែលស្មើរនឹង 589 ដុល្លា ស្របពេលដែលស្មាតហ្វូន P20 Pro លក់នៅក្នុងតម្លៃ 4000 យ៉ន់ ស្មើរហ្នឹង 637 ដុល្លាប៉ុណ្ណោះ។ ស្មាតហ្វូនទាំងពីរនេះ អាចរកទិញ បាននៅក្រុមហ៊ុនចែកចាយផ្លូវការរបស់ក្រុមហ៊ុន Huawei និងក្រុមហ៊ុនចែកចាយ ដែលជាដៃគូរបស់ Huawei ផងដែរ៕