ក្រុមហ៊ុន ASUS ទើបតែបញ្ជាក់ថា ខ្លួនកំពុងតែធ្វើការនៅលើស្មាតហ្វូនស៊េរិថ្មីមួយ ប៉ុន្តែឈ្មោះ ហើយនិងកាលបរិច្ឆេទរបស់ស្មាតហ្វូននេះ គឺស្ថិតនៅក្នុងភាពអាថ៌កំបាំងនៅឡើយ។ នៅក្នុងកិច្ចសម្ភាសន៍ផ្តាច់មុខនៅក្នុងព្រឹត្តិការណ៍នៃការសម្ពោធ ហាងទី 100 របស់ក្រុមហ៊ុន ASUS នៅ Ayala Malls Feliz នៅក្នុងប្រទេសហ្វីលីពីនកាលពីម្សិលមិញនេះ។
លោក Jerry Shen ដែលជានាយកប្រតិបត្តិរបស់ក្រុមហ៊ុន ASUS Global បញ្ជាក់ថា ទៅថ្ងៃមុខ ក្រុមហ៊ុន ប្រហែលជាផ្តោតសំខាន់ទៅលើស្មាតហ្វូនសម្រាប់លេងហ្គេមវិញម្តង។ កន្លងមក ក៏មានពាក្យចចាមអារ៉ាមនានា បានបញ្ជាក់នៅក្នុងព្រឹត្តិការណ៍ MWC 2018 ផងដែរ។ ប៉ុន្តែស្មាតហ្វូននេះ នៅមិនទាន់ដាក់ឈ្មោះឱ្យដឹងនៅឡើយទេ។
ថ្មីៗនេះ ក្រុមហ៊ុនបច្ចេកវិទ្យានេះ ទើបតែបញ្ចេញនូវស្មាតហ្វូន Zenfone 5, Zenfone 5Z, Zenfone 5Q និង Zenfone Max M1 ប៉ុន្តែក្រុមហ៊ុននេះក៏មានគម្រោងក្នុងការបញ្ចេញនូវស្មាតហ្វូន Zenfone ស៊េរីថ្មីមួយទៀតនៅក្នុងត្រីមាសទី 2 ឆ្នាំ 2018 ខាងមុខនេះអាចជាប្រភេទម៉ូដែល Zenfone Live និង Zenfone Max M2 ។ សម្រាប់ Zenfone Selfie និង Zenfone AR នឹងមិនបង្ហាញខ្លួននោះទេ។
តើស្មាតហ្វូនលេងហ្គេមស៊េរីថ្មីនេះ នឹងមានឈ្មោះហៅដូចម្តេច? នៅក្នុងរយៈពេលមួយទស្សវត្សន៍នេះ ក្រុមហ៊ុន ASUS ទើបតែបានបញ្ចេញនូវម៉ាកសម្រាប់លេងហ្គេម eSports ជាមួយនឹង ROG (Republic of Gamers) និងផលិតផលលេងហ្គេមនៅលើកុំព្យូទ័រ Strixជាច្រើនម៉ូដែលផងដែរ។ សម្រាប់កុំព្យុទ័រលេងហ្គេមស៊េរីថ្មីនេះអាចនឹងមានឈ្មោះហៅថា Zenfone ROG?
សម្រាប់គំនិតនៃការរចនាទៅលើស្មាតហ្វូនស៊េរីថ្មីនេះ គឺផ្តោតទៅលើការលេងហ្គេមដែលមានម៉ូដែលដូចជា Z2 Poseidon និង Z3 Venom ។ នៅក្នុងរយៈពេល 6 ខែកន្លងមកនេះ គឺមានចេញនូវស្មាតហ្វូនសម្រាប់ការលេងហ្គេមមួយចំនួន ដូចជា Razer Phone និង Black Shark ដែលកំពុងតែឈានមុខគេបំផុត នៅក្នុងចំណោមទូរស័ព្ទលេងហ្គេមប្រភេទ Android។
